Read Tzeltal Números 23 Bible Online

Números 23 - Tzeltal bible

Números 23

¹Te Balaam la yalbe te Balac: Pasbon huqueb scajtajib ta chiq'uel mahtaniletic li'i, soc chahpambon huqueb jcolel torohetic soc huqueb tat tuminchijetic, xchi.

²Te Balac hich la spas te bin halbot yu'un Balaam. Ta schebalic la yaq'uic jcoht jcolel toro soc jcoht tuminchij scuenta chic'bil mahtanil ta jujun scajtajib.

³Te Balaam hich la yalbe te Balac: Hilan li'i ta banti ay te scohtol chic'bil mahtanil awu'un, ya xbohon ho'on; ya wan xtal stahon te Jehová. Ya calbat bin ya ya'bon jna', xchi. Hich baht ta wits te mayuc bin colem tey a.

⁴Tal ta tahel yu'un Dios te Balam, hich la yalbe te Dios: Jchahpanej huqueb scajtajib ta chiq'uel mahtanil; ta jujun scajtahib cac'oj jcoht jcolel toro soc jcoht tat tuminchij scuenta milbil mahtanil, xchi.

⁵Te Jehová la ya'be sc'op ta ye te Balaam, hich la yalbe: Suhtan bahel ta ban ay Balac, ya me awalbe te bin la jcalbat, xchi.

⁶Hich suht bahel, tey c'oht sta a te banti ay te scohtol chic'bil mahtanil yu'un, soc spisil te príncipaletic yu'un Moab.

⁷Te Balaam hich la yal ta sc'op-jalwanej: C'alal ta Aram la yic'on te Balac, te ajwalil yu'un Moab, c'alal ta witsiltic ta stojol banti ya xloc' tal c'ahc'al. La', bohlobtesbeya sc'oblal te Jacob, la', bohlc'optaya te Israel, xchi.

⁸¿Bin yu'un ho'on ya jbohlobtesbe sc'oblal te mach'a ma ba bohlobtesbot sc'oblal yu'un Dios? ¿Bin yu'un ya jbohlc'optay te mach'a ma ba bohlc'optaybil yu'un te Jehová?

⁹C'alal ta sba tontiquil ya quil, c'alal ta tsehltsehltic ya xchicnaj cu'un: ha jun pueblo te parte nahinem, te ma ba jun ayic soc te yantic nacionetique.

¹⁰¿Mach'a ya xhu' ya yahtay te ts'u'lum yu'un Jacob, o te jun ta schanebal parte yu'un te Israel? Ac'a chamucon hich te bin ut'il ya xcham te mach'atic toj yo'tanic, ha'uc nix hich ya xlaj corahil, xchi.

¹¹Ha yu'un te Balac la yalbe te Balaam: ¿Bin la apasbon? La quic'at tal yu'un yac abohlobtesbe sc'oblal te jcontra, pero la ac'ambe bendición, la yut.

¹²¿Ma bal ha'uc ya sc'an ya cal te bin ya yalbon te Jehová? xchi te Balaam.

¹³La yal te Balac: Awocoluc, la' joquinawon bahel ta yan lugar te banti ya xhu' yac awil xan; ha nax ya xhu' yac awil te mach'a nopol ayic, ma xhu' yac awil spisilic. Tey to me yac abohlobtesbe sc'oblalic a, xchi.

¹⁴Hich la yic' bahel ta spamlej yu'un Zofim, ta ba wits Pisga, soc la spasbe huqueb scajtajib ta chiq'uel mahtanil, soc la yac' jcoht jcolel toro soc jcoht tat tuminchij ta jujun scajtajib.

¹⁵Te Balaam la yalbe te Balac: Hilan li' ta banti ay te scohtol chic'bil mahtanil awu'un, ho'on ya xbaht jta jba soc Dios lum ta ine, xchi.

¹⁶Te Jehová loc' sta sba soc Balaam, la ya'be sna' te bin ya sc'an ya yal, hich la yalbe: Suhtan bahel ta banti ay Balac, hich me xawalbe, xchi.

¹⁷Hich tal ta banti ay te Balac, tey c'oht sta a ta banti ay te scohtol chic'bil mahtanil yu'un, soc te príncipaletic yu'un Moab. Te Balac la sjoc'oy: ¿Bin la yal te Jehová? xchi.

¹⁸Hich te Balaam la yal ta sc'op-jalwanej: Balac, hahchan, a'iya me awa'iy, a'iybon awa'iy jc'op, snich'anat Zipor:

¹⁹Te Dios ma hichuc te bin ut'il winic te ya ya'iy lot, soc ma hichuc te bin ut'il snich'an winic te ya suht sc'op. Te bin la yal, ¿ma bal yacuc spas? Teme c'opoj, ¿ma bal yacuc sc'ohtes ta pasel?

²⁰Ilawil, pasbilon ta mandar ta sc'anel bendición; ha la yac' bendición, ma xhu' ya jlajimbe sc'oblal.

²¹Mayuc mulil yu'un Jacob la yil, mayuc yiloj bin chopol ta Israel. Te Jehová te Dios yu'un, ha sjoquinej, ya yalic te ha ajwalil yu'unic.

²²Te Dios te la sloq'ueslan tal ta Egipto, hich ay te bin ut'il xulub ha'mal toro ta stojolic.

²³Como mayuc bin ya xhu' yu'un jwoyaw ta scontrahinel te Jacob, o te na'ojel ta scontrahinel Israel. Como yo'tic hich ya yich' halbeyel sc'oblal Jacob soc Israel: ¡Ilawil bin spasoj te Diose!

²⁴Te pueblo ini, hich ya xhahch te bin ut'il choj, hich ya stehc'an sba te bin ut'il choj. Ma ba ya spahcan sba ha to teme hu' yu'un sti'el te bin stsacoj soc te ya yuch'be sch'ich'el te bin smilticlanej, xchi.

²⁵Ha yu'un te Balac la yalbe te Balaam: Te bin ut'il ma ba la abohlobtesbe sc'oblal, ma me xac'ambe bendición, xchi.

²⁶Te Balaam la sjac'be te Balac: ¿Ma bal lajuc calbat te spisil bin ya yalbon te Jehová, hich ya jpas? xchi.

²⁷Te Balac la yalbe te Balaam: Awocoluc, la' me, ya quic'at bahel ta yan lugar; ha wan lec ya ya'iy te Dios teme tey yac abohlobtesbe sc'oblalic a, xchi.

²⁸Hich te Balac la yic' bahel te Balaam ta ba wits Peor, ta banti ya xchicnaj te jochol taquin q'uinal.

²⁹Ha yu'un te Balaam la yalbe te Balac: Pasbon huqueb scajtajib ta chiq'uel mahtaniletic li'i, soc chahpambon huqueb jcolel toro soc huqueb tat tuminchij, xchi.

³⁰Te Balac hich la spas te bin la yal te Balaam. Ta jujun scajtajib la yac' jujucoht jcolel toro soc jujucoht tat tuminchij.