Read Tzeltal Números 27 Bible Online

Números 27 - Tzeltal bible

Números 27

¹Talic te yantsil-nich'nab Zelofehad snich'an Hefer, snich'an Galaad, snich'an Maquir, snich'an Manasés, te ha'ic yu'un te jchahp yu'un Manasés snich'an José. Te sbihilic te yantsil-nich'nab ha te Maala, Noa, Hogla, Milca soc Tirsa.

²La stehc'an sbahic ta stojol Moisés, te sacerdote Eleazar, te príncipaletic, soc spisil te pueblo ta yochibal te Nahilpac' Templo yu'un tahojibal, hich c'oht yalbeyic:

³Te jtatcotic cham ta jochol taquin q'uinal; pero ma ba la sjoquin sba soc te smohloltac Coré te la stoy sbahic ta stojol Jehová, ha cham ta scaj smul stuquel; mayuc hil queremetic yu'un.

⁴¿Bin yu'un te jc'axel ya xch'ay sbihil te jtatcotic ta banti sts'umbal ta scaj te mayuc jtuhluc hil squerem-nich'an? A'botcotic ta jcuentacotic te q'uinal ta yohlil te yermanotac te jtatcotique, xchihic.

⁵Te Moisés la yich' bahel ta stojol Jehová te c'op yu'unique.

⁶Hich la sjac' te Jehová:

⁷Lec te bin ya yalic te yantsil-nich'nab Zelofehad, a'beya sq'uinalic ta yohlil te yermanotac te statique, ya xc'ax ta stojol te antsetic te sq'uinal te statique.

⁸Hich xawalbe te snich'nab Israel: Teme ay mach'a cham te mayuc ya xhil squerem, ya me awa'be te yantsil-nich'an te sq'uinale.

⁹Teme mayuc yantsil-nich'an, ya me awa'be te sbanquil o yihts'in te sq'uinale;

¹⁰teme mayuc sbanquil o yihts'in, ya me awa'be sq'uinal te yermanotac te state.

¹¹Teme mayuc sbanquil o yihts'in te state, ya me awa'be sq'uinal te mach'a pajal sbihil soc, ha me yu'un ya xc'oht. Ha mandaril ya xc'oht ta stojol te snich'nab Israel, hich te bin ut'il pasot ta mandar yu'un Jehová te Moisés, xchi.

¹²Te Jehová la yalbe te Moisés: Mohan bahel ta wits Abarim ini, ya me awil bahel te q'uinal la jca'beyix te snich'nab Israel.

¹³Teme la awilixe, ha nix hichat ya xchamat,[40] hich te bin ut'il te abanquil Aarón.

¹⁴Como la ac'axuntaybonic te jmandar ta jochol taquin q'uinal Zin te c'alal hahchic ta c'op te pueblo, ma ba la awich'onic ta cuenta te Ch'ul Dioson ta stojolic tey ta ha'etic, xchi. (Ha te ha'etic yu'un Meriba te ay ta Cades ta jochol taquin q'uinal Zin.)

¹⁵Te Moisés la yalbe te Jehová:

¹⁶Jehová, Diosat yu'un scuxlejal spisil bintic cuxajtic, tsaha jtuhluc winic te ya scuentahin te pueblo,

¹⁷te ya xloc' bahel soc te ya x'och tal ta stojolic, te ya yic'ticlan bahel soc te ya yic'ticlan talel, scuenta yu'un te pueblo yu'un Jehová ma hichuc ya xc'oht te bin ut'il tuminchijetic te mayuc jcanan yu'unique, xchi.

¹⁸Te Jehová la yalbe te Moisés: Ic'a tal te Josué snich'an Nun, te jtuhl winic te ay yip yo'tan, cajambeya ac'ab ta sjol.

¹⁹A'beya stehc'an sba ta stojol te sacerdote Eleazar soc ta stojol spisil te pueblo, ya me awa'be yich' ya'tel ta stojolic.

²⁰A'beya ta stojol j'ohliluc te awa'tel, scuenta yu'un spisil te pueblo yu'un te snich'nab Israel ya sch'uhumbeyic te sc'ope.

²¹Te Josué ya xbaht ta stojol te sacerdote Eleazar te ha ya sjoc'obe te Jehová ta scuenta te Urim. Ta scuenta smandar te Josué ya xloq'uic bahel spisil te pueblo Israel, soc ta scuenta smandar ya x'ochic talel, xchi.

²²Te Moisés hich la spas te bin ut'il pasot ta mandar yu'un Jehová; la yic' tal te Josué, la ya'be stehc'an sba ta stojol te sacerdote Eleazar soc spisil te pueblo.

²³La scajambe sc'ab ta sjol, la ya'be yich' ya'tel, hich te bin ut'il pasot ta mandar yu'un Jehová te Moisés.