Read Tzeltal Números 29 Bible Online

Números 29 - Tzeltal bible

Números 29

¹Te sba c'ahc'alil yu'un te shuquebal u, ay me ch'ul tsoblej awu'unic, ma me xapas awa'telic a; ha sc'ahc'alel te ya yich' oq'uesinel te xulubiletique.

²Ya me awaq'uic scuenta scohtol chic'bil mahtanil te sumet yic' ta stojol Jehová jcoht jcolel toro, jcoht tat tuminchij, soc huqueb tuminchijetic te jujun ya'bilal te mayuc bin jihnem yu'unic,

³soc te mahtanil lequil harina yu'unic wots'bil ta aceite, ha oxeb ta slajunebal efa[47] soc te jcoht jcolel toro, cheb ta slajunebal efa[48] soc te jcoht tat tuminchij,

⁴jun ta slajunebal efa[49] soc te jujucoht tuminchij;

⁵soc jcoht tat tentsun scuenta stojel mulil awu'unic;

⁶parte a te scohtol chic'bil mahtanil yu'un jujun u soc te mahtanil harina yu'un, soc te scohtol chic'bil mahtanil ya yich' aq'uel spisil ora soc te mahtanil harina soc te malbil mahtanil yu'unic hich te bin ut'il te mandaril yu'unique. Hich yac apas scuenta mahtanil te ya yich' chiq'uel ta stojol Jehová te sumet yic'.

⁷Ta slajunebal c'ahc'al ta shuquebal u, ay me ch'ul tsoblej awu'unic; ya me acom awe'elic, soc ma me xapas awa'telic a.

⁸Ya me awaq'uic scuenta scohtol chic'bil mahtanil te sumet yic' ta stojol Jehová jcoht jcolel toro, jcoht tat tuminchij, soc huqueb tuminchijetic te jujun ya'bilal te mayuc bin jihnem yu'unic,

⁹soc te mahtanil lequil harina yu'unic wots'bil ta aceite: ha oxeb ta slajunebal efa soc te jcoht jcolel toro, cheb ta slajunebal efa soc te jcoht tat tuminchij,

¹⁰jun ta slajunebal efa soc te jujucoht tuminchij;

¹¹soc ya me awac' jcoht tat tentsun scuenta mahtanil yu'un stojel mulil; parte a te mahtaniletic yu'un stojel mulil, te scohtol chic'bil mahtanil ya yich' aq'uel spisil ora, soc te mahtanil harina soc malbil mahtaniletic yu'unic.

¹²Ta yo'lajunebal (15) c'ahc'al ta shuquebal u, ay me ch'ul tsoblej awu'unic, ma me xapas awa'telic a, huqueb c'ahc'al yac apasic te q'uin scuenta yich'el ta muc' te Jehová.

¹³Ya me awaq'uic scuenta scohtol chic'bil mahtanil te sumet yic' ta stojol Jehová oxlajuncoht (13) jcolel torohetic, cha'coht tat tuminchijetic, soc chanlajuncoht (14) tat tuminchijetic te jujun ya'bilal, te mayuc bin jihnem yu'unic;

¹⁴soc te mahtaniletic yu'un lequil harina wots'bil ta aceite: ha oxeb ta slajunebal efa soc te jujucoht jcolel toro, cheb ta slajunebal efa soc te jujucoht tat tuminchij,

¹⁵soc jun ta slajunebal efa soc te jujucoht tuminchij;

¹⁶soc ya me awaq'uic jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc te malbil mahtanil yu'une.

¹⁷Ta schebal c'ahc'al ya me awaq'uic lahchaycoht (12) jcolel torohetic, cha'coht tat tuminchijetic, soc chanlajuncoht (14) tuminchijetic te jujun ya'bilal soc te mayuc bin jihnem yu'unic;

¹⁸soc te mahtanil harina soc malbil mahtanil te ya sjoquin te jcolel torohetic, tat tuminchijetic, soc jcolel tuminchijetic hich te bin ut'il jayeb halbil ta mandaril;

¹⁹soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

²⁰Ta yoxebal c'ahc'al ya me awaq'uic buluchcoht (11) jcolel torohetic, cha'coht tat tuminchijetic, chanlajuncoht (14) tuminchijetic te jujun ya'bilal, te mayuc bin jihnem yu'unic;

²¹soc te mahtanil harina soc malbil mahtanil yu'unic te ya sjoquin te jcolel torohetic, tat tuminchijetic, soc te jcolel tuminchijetic, hich te bin ut'il jayeb halbil ta mandaril;

²²soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

²³Ta schanebal c'ahc'al ya me awaq'uic lajuncoht (10) jcolel torohetic, cha'coht tat tuminchijetic soc chanlajuncoht (14) tuminchijetic te jujun ya'bilal, te mayuc bin jihnem yu'unic;

²⁴soc te mahtanil harina soc malbil mahtanil yu'unic te ya sjoquin te jcolel torohetic, tat tuminchijetic soc te jcolel tuminchijetic, hich te bin ut'il jayeb halbil ta mandaril;

²⁵soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

²⁶Ta yo'ebal c'ahc'al ya me awaq'uic baluncoht jcolel torohetic, cha'coht tat tuminchijetic, soc chanlajuncoht (14) tuminchijetic te jujun ya'bilal, te mayuc bin jihnem yu'unic;

²⁷soc te mahtanil harina soc malbil mahtanil yu'unic te ya sjoquin te jcolel torohetic, tat tuminchijetic soc tuminchijetic, hich te bin ut'il jayeb halbil ta mandaril;

²⁸soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

²⁹Ta swaquebal c'ahc'al ya me awaq'uic waxac-coht jcolel torohetic, cha'coht tat tuminchijetic, soc chanlajuncoht (14) tuminchijetic te jujun ya'bilal, te mayuc bin jihnem yu'unic;

³⁰soc te mahtanil harina soc malbil mahtanil yu'unic te ya sjoquin te jcolel torohetic, tat tuminchijetic soc tuminchijetic, hich te bin ut'il jayeb halbil ta mandaril;

³¹soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

³²Ta shuquebal c'ahc'al ya me awaq'uic huc-coht jcolel torohetic, cha'coht tat tuminchijetic, soc chanlajuncoht (14) tuminchijetic te jujun ya'bilal, te mayuc bin jihnem yu'unic;

³³soc te mahtanil harina soc malbil mahtanil yu'unic te ya sjoquin te jcolel torohetic, tat tuminchijetic soc tuminchijetic, hich te bin ut'il jayeb halbil ta mandaril;

³⁴soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, te mahtanil harina soc malbil mahtanil yu'une.

³⁵Ta swaxaquebal c'ahc'al ya me apasic tsoblej te bayel sc'oblal, ma me xapasic awa'telic a.

³⁶Ya me awaq'uic scuenta scohtol chic'bil mahtanil te sumet yic' te ya yich' chiq'uel ta stojol Jehová jcoht jcolel toro, jcoht tat tuminchij soc huqueb tuminchijetic te jujun ya'bilal, te mayuc bin jihnem yu'unic;

³⁷soc te mahtanil harina soc malbil mahtanil yu'unic te ya sjoquin te jcolel toro, tat tuminchij soc tuminchijetic, hich te bin ut'il jayeb halbil ta mandaril;

³⁸soc jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora, soc te mahtanil harina soc malbil mahtanil yu'une.

³⁹Ha te mahtaniletic yac awa'beyic Jehová ta yorahil te q'uinetic awu'unic, soc te mahtaniletic yu'un te bin achapojic soc te ta sc'anojel awo'tan yac awaq'uic, te scohtol chic'bil mahtaniletic, mahtaniletic harina, malbil mahtaniletic, soc mahtaniletic yu'un lamal q'uinal awu'unic, xchi te Jehová.

⁴⁰Te Moisés la yalbe ya'iy te snich'nab Israel spisil te bintic pasot ta mandar yu'un Jehová.