Read Tzeltal Números 3 Bible Online

Números 3 - Tzeltal bible

Números 3

¹Hich ay te sts'umbalic Aarón soc Moisés ta yorahil c'oponot yu'un Jehová te Moisés ta Wits Sinaí.

²Hich ay sbihilic te snich'nab Aarón: ha te Nadab, te ba-alal, Abiú, Eleazar soc Itamar.

³Ha sbihilic te snich'nab Aarón, ha te sacerdotehetic te la yich'ic malel ta aceite scuenta ch'ultesel, te la yich' ya'telic ta sacerdotehil.

⁴Pero te Nadab soc Abiú lajic ta stojol Jehová te c'alal la yaq'uic yan c'ahc' ta stojol Jehová ta jochol taquin q'uinal Sinaí; mayuc yal-snich'nab hil. Te Eleazar soc Itamar a'tejic ta sacerdotehil ta stojol Aarón te statique.

⁵Te Jehová hich la yalbe te Moisés:

⁶Ac'a nohpojuc tal te jchahp yu'un Leví, ya me awac'ticlan ta stojol te sacerdote Aarón scuenta yu'un ya yac' sbahic ta a'batinel yu'un.

⁷Ha ya yac' sbahic ta a'batinel yu'un soc yu'un spisil te pueblo ta Nahilpac' Templo yu'un tahojibal, ta scuenta spasel a'tel ta Nahilpac' Templo.

⁸Ya scanantayic spisil te biluquetic yu'un te Nahilpac' Templo yu'un tahojibal, soc ya spasic spisil te bin a'botic spasic ta scuenta te snich'nab Israel ta banti te a'tel ta Nahilpac' Templo.

⁹Ya me awac'ticlambe te levitahetic ta stojol te Aarón soc te snich'nabe, como ta yohlil te snich'nab Israel ha'ic te jc'axel a'botic ta stojol.

¹⁰Te Aarón soc te snich'nab ya me awac' te ya x'a'tejic ta sacerdotehil. Te mach'a yan ya xnohpoj tal, ya me xcham, xchi.

¹¹Te Jehová la yalbe te Moisés:

¹²Ho'on la jquic' te levitahetic ta yohlil te snich'nab Israel scuenta sjelol spisil te ba-alaletic, ha te queremetic te nahil ya x'ayinic yu'un te snich'nab Israel. Ha cu'un ya xc'ohtic te levitahetic,

¹³como ho'on cu'un spisil te ba-alaletique. C'alal la jlajin spisil te ba-alal queremetic ta sq'uinal Egipto, ch'ultesbil c'ohtic cu'un spisil te ba-alaletic yu'un te snich'nab Israel soc sba-al schansbahlamic. Ho'on cu'un. Ho'on Jehovahon, xchi.

¹⁴Te Jehová hich la yalbe te Moisés ta jochol taquin q'uinal Sinaí:

¹⁵Ahtaya te sts'umbal Leví ta scuenta jujuchahp sna sme'static soc jujuchahp te mach'atic ayic ta snahic; ahtaya spisil winiquetic soc queremetic te ay jun u yayinelic, xchi.

¹⁶Hich te Moisés la yahtay hich te bin ut'il pasot ta mandar yu'un te Jehová.

¹⁷Hich ay sbihilic te snich'nab Leví: ha te Gersón, Coat soc Merari.

¹⁸Te sbihilic te snich'nab Gersón ta jujuchahp sna: ha te Libni soc Simei.

¹⁹Te snich'nab Coat ta jujuchahp sna: ha te Amram, Izhar, Hebrón soc Uziel.

²⁰Te snich'nab Merari ta jujuchahp sna: ha te Mahli soc Musi. Ha'ic te sts'umbal Leví ta scuenta jujuchahp sna te statique.

²¹Ta scuenta Gersón chicnaj te jchahp yu'un Libni soc yu'un Simei; ha'ic te jujuchahp yu'un Gersón.

²²Ta spisil te winiquetic soc queremetic te ahtaybilic te c'axem ta jun u yayinelic, ha ho'lajunwinic sbalunlajunbahc' (7,500).

²³Te jujuchahp yu'un Gersón la spas scampamentohic ta spat te Nahilpac' Templo, ta stojol banti ya xmahl c'ahc'al.

²⁴Te jtsobaw yu'un te sts'umbal Gersón, ha te Eliasaf snich'an Lael.

²⁵Ta banti te Nahilpac' Templo yu'un tahojibal ha hil ta scuenta te snich'nab Gersón scanantayel te nahilpac' soc smuhquil, te pac' yu'un te yochibal te Nahilpac' Templo yu'un tahojibal,

²⁶te paq'uetic yu'un te yamaq'uil, te pac' yu'un te yochibal te yamaq'uil ay ta sjoyobal te Nahilpac' Templo soc te scajtajib ta chiq'uel mahtanil, soc te lazohetic yu'un; spisil bintic ya sc'an pasel tey a.

²⁷Ta scuenta Coat chicnaj te jchahp yu'un Amram, te jchahp yu'un Izhar, te jchahp yu'un Hebrón soc te jchahp yu'un Uziel; ha'ic te jujuchahp yu'un te mach'atic yu'un Coat.

²⁸Te jayeb ta spisil te winiquetic soc queremetic te ay jun u yayinelic, ha jpic soc j'ohlil scha'bahc' (8,600).[4] Ha ay ta scuentahic scanantayel te ch'ul awilal.

²⁹Te jujuchahp yu'un te snich'nab Coat la spas scampamentohic ta stojol sur yu'un te Nahilpac' Templo.

³⁰Te jtsobaw yu'un te sts'umbal Coat ha te Elizafán snich'an Uziel.

³¹Ha ay ta scuentahic scanantayel te scaxahul te chapbil-c'op, te mesa, scajtajib c'ahc', te scajtajibic ta chiq'uel mahtanil soc pom, bintic ya xtuhun scuenta a'tel ta ch'ul awilal, te tsalul pac' soc spisil te bintic ay ta pasel tey a.

³²Te jolal yu'un te jtsobawetic yu'un te levitahetic, ha te Eleazar snich'an te sacerdote Aarón; ha jtsobaw yu'un te mach'atic ay ta scuenta scanantayel te ch'ul awilal.

³³Ta scuenta Merari chicnaj te jchahp yu'un Mahli soc te jchahp yu'un Musi; ha'ic te jujuchahp yu'un Merari.

³⁴Te jayeb ta spisil te winiquetic soc queremetic te c'axem ta jun u yayinelic, ha lajunwinic swaclajunbahc' (6,200).

³⁵Te jtsobaw yu'un te sts'umbal Merari, ha te Zuriel snich'an Abihail. La spas scampamentohic ta stojol norte yu'un te Nahilpac' Templo.

³⁶Ay ta scuenta te snich'nab Merari scanantayel te tablahetic yu'un te Nahilpac' Templo, te sc'atal-te'el, yoyal, scajtajibic soc spisil biluquetic yu'un, soc spisil te bintic ay ta pasel tey a,

³⁷soc nix te oyetic ta sjoyobal te yamaq'uil, te scajtajibic, te ts'acticlambil yich'o-ip, soc bintic ya schuquic a.

³⁸Ta stojol banti ya xloc' tal c'ahc'al yu'un te Nahilpac' Templo, ta stojol te yochibal te Nahilpac' Templo yu'un tahojibal, ya spas scampamentohic te Moisés, Aarón soc snich'nab, te ay ta scuentahic spasel te bin pasel ya sc'an ta ch'ul awilal ta scuenta te snich'nab Israel. Te mach'a yan ya xnohpoj tal, ya me xcham.

³⁹Ta spisil te levitahetic te la yich'ic ahtayel yu'un te Moisés soc Aarón ta scuenta smandar Jehová ta jujuchahp yu'un, spisil te winiquetic soc queremetic te c'axem ta jun u yayinelic, cha'pic soc ho'lajunbahc' (22,000).

⁴⁰Te Jehová la yalbe te Moisés: Ahtaya spisil te ba-alal queremetic yu'un te snich'nab Israel te ay jun u yayinelic, otsesa ta hun te sbihilique.

⁴¹Tsahbonic te levitahetic scuenta sjelol spisil te ba-alal queremetic yu'un te snich'nab Israel, soc te chambahlametic yu'un te levitahetic scuenta sjelol spisil te sba-al schansbahlamic te snich'nab Israel. Ho'on Jehovahon, xchi.

⁴²Hich te Moisés la yahtay spisil te ba-alal queremetic yu'un te snich'nab Israel, hich te bin ut'il pasot ta mandar yu'un te Jehová.

⁴³Spisil te winiquetic soc queremetic te ay jun u yayinelic te ahtaybilic ta scuenta sbihilic, ha cha'pic soc oxlajuneb schanlajunwinic swaclajunbahc' (22,273).

⁴⁴Te Jehová la yalbe xan te Moisés:

⁴⁵Tsaha te levitahetic scuenta sjelol spisil te ba-alaletic yu'un te snich'nab Israel, soc te schansbahlam te levitahetic scuenta sjelol te schansbahlam te snich'nab Israel; ho'on cu'un ya xc'oht te levitahetic. Ho'on Jehovahon.

⁴⁶Scuenta yu'un ya xcolic te oxlajuneb schanlajunwinic (273) ba-alal queremetic te c'axem ta yahtalul yu'un te levitahetic,

⁴⁷c'ambeya ho'eb siclo scuenta jujutuhl, ha te siclo yu'un te ch'ul awilal (te jun ciclo ha jtahb geras).[5]

⁴⁸Ya me awa'be te Aarón soc snich'nab te taq'uin ya xcolic a te jaytuhl c'axemic ta yahtalul, xchi.

⁴⁹Hich te Moisés la stsob te taq'uin te ya xcolic a te jaytuhl c'axemic ta yahtalul te hil yu'un te mach'a colemic yu'un te levitahetique.

⁵⁰Te taq'uin la yich' yu'un te ba-alal queremetic yu'un te snich'nab Israel, ha oxbahc' soc ho'eb sbalunwinic (1,365) siclohetic, hich te bin ut'il te sp'isol yalal te ch'ul awilal.

⁵¹Te Moisés la ya'be te Aarón soc snich'nab te taq'uin scuenta scolelic, hich te bin ut'il pasot ta mandar yu'un Jehová.