Read Tzeltal Números 36 Bible Online

Números 36 - Tzeltal bible

Números 36

¹Te príncipaletic yu'un te sts'umbal Galaad snich'an Maquir, snich'an Manasés, te sts'umbal te snich'nab José, tal sc'oponic te Moisés soc te príncipaletic, ha te jtsobawetic yu'un te snahic te tatiletic yu'un te snich'nab Israel,

²hich la yalbeyic: Te Jehová la yalbe te cajwal Moisés te ya ya'be yich'ic sq'uinalic te snich'nab Israel ta scuenta seña ta na'el. Soc te Jehová la yalbe te cajwal Moisés te ya me ya'be te sq'uinal Zelofehad te yantsil-nich'nab, te ha pajal jbihilcotic soc.

³Pero teme ya xnuhpunic soc yan jchahp snich'nab Israel, te q'uinal yu'unic ya xch'ay ta banti a'bot hilel te jtatcotic, ha ya xc'oht ta stojol te jchahp yu'un te mach'atic ya xnuhpunic soc, hich ya xch'ay te q'uinal te hil ta jcuentacotic.

⁴Te c'alal ya xc'oht te ha'bil te ya xhil ta libre te snich'nab Israel, te sq'uinal te antsetic ya xc'oht ta stojol te jchahp yu'un te smamalalique; hich ya xch'ay te q'uinal a'bot hilel te jchahp yu'un te jtatcotic, xchihic.

⁵Ha yu'un te Moisés hich la yalbe te snich'nab Israel ta scuenta smandar te Jehová: Te winiquetic yu'un te sts'umbal José, melel bin ya yalic.

⁶Hich ay te bin la yal te Jehová sc'oblal te yantsil-nich'nab Zelofehad: Ya xhu' ya xnuhpunic mach'ayuc a ya sc'anic, pero ha nax te mach'atic ay ta jchahp yu'un te statique,

⁷scuenta yu'un te sq'uinal te snich'nab Israel ma ba ya sohl bahel ta yan jchahp yu'un Israel; como te jujuchahp yu'un Israel ay ta scuentahic te q'uinal yu'un te jchahp yu'un te statique.

⁸Soc mach'ayuc antsil te ay sq'uinal ta yohlil te snich'nab Israel, ha nax ya xnuhpun soc mach'a ay ta jchahp yu'un te state, scuenta yu'un jujutuhl snich'nab Israel ya yich' hilel te q'uinal yu'un te state,

⁹ma ba xmelmon ya xc'ax bahel ta jujuchahp. Te jujuchahp te snich'nab Israel ya me yich'ic hilel te q'uinal a'bot yich'ic, xchi.

¹⁰Te yantsil-nich'nab Zelofehad, hich la spasic te bin ut'il pasot ta mandar yu'un Jehová te Moisés.

¹¹Ha yu'un te Maala, Tirsa, Hogla, Milca soc Noa, te yantsil-nich'nab Zelofehad, nuhpunic soc te snich'nab stajunic.

¹²Nuhpunic soc snich'nab Manasés, te snich'an José. Hich te sq'uinalic hil ta scuenta te jchahp sts'umbal te state.

¹³Ha'ic ini te mandariletic soc te bintic yaloj Jehová ta scuenta Moisés ta stojol te snich'nab Israel ta spamlej yu'un Moab ta nopol te muc'ul-ha' Jordán, te snuhp'usitayej sba soc Jericó.