Read Tzeltal Números 8 Bible Online

Números 8 - Tzeltal bible

Números 8

¹Te Jehová la yalbe te Moisés:

²Halbeya te Aarón: Te c'alal yac achahpan te scajtajib c'ahc', te huqueb c'ahc' yu'un ya me yac' sacubuc q'uinal ta stojol bahel te scajtajibe, xchi.

³Hich la spas te Aarón; la schahpan te yawilic c'ahc' scuenta yu'un ya yac' sacubuc q'uinal ta stojol bahel te scajtajib, hich te bin ut'il pasot ta mandar yu'un Jehová te Moisés.

⁴La yich' pasel te scajtajib c'ahc' ta oro tembil ta martillo; c'alal ta yoc ha to ta snich tembil ta martillo. Hich la spas te scajtajib c'ahc' te bin ut'il te seña a'bot yil yu'un Jehová te Moisés.

⁵Te Jehová la yalbe te Moisés:

⁶Parte xawac' te levitahetic ta yohlil te snich'nab Israel, soc lecubteslambeya sc'oblalic.

⁷Hich yac apas yu'un yac alecubteslambe sc'oblalic: Ya me atsihtsimbe ta ha' yu'un slecubtesbeyel sc'oblalic soc ac'a squits' stsotselic ta navaja ta scohtolic; ha ya sac' sc'u' spaq'uic, hich lecubtesbil ya xhilic.

⁸Patil ya me yiq'uic tal jcoht jcolel toro soc mahtanil harina wots'bil ta aceite; soc ha'at yac awic' tal jcoht xan jcolel toro scuenta mahtanil yu'un stojel mulil.

⁹Yac awac' ya xnohpojic tal te levitahetic ta Nahilpac' Templo yu'un tahojibal soc yac atsob tal spisil te pueblo yu'un te snich'nab Israel.

¹⁰Te c'alal la awac' nohpojuc tal ta stojol Jehová te levitahetic, te snich'nab Israel ya scajanlambe sc'abic ta sjolic te levitahetique.

¹¹Te Aarón ya yac' ta stojol Jehová te levitahetic scuenta tuchilambil mahtanil yu'un te snich'nab Israel, hich ya spasbeyic a te ya'tel te Jehová.

¹²Patil te levitahetic ya yac' sc'abic ta sjol te torohetic; te jcoht toro yac awac' scuenta mahtanil yu'un mulil, te yane scuenta scohtol chic'bil mahtanil ta stojol Jehová scuenta stojbeyel smulic te levitahetique.

¹³Yac atehc'anlan te levitahetic ta stojol Aarón soc snich'nab, yac awac'ticlan scuenta tuchilambil mahtanil yu'un Jehová.

¹⁴Hich parte yac awac' te levitahetic ta yohlil te snich'nab Israel, ha cu'un ya xc'ohtic te levitahetique.

¹⁵Ta patil te lecubtesbil sc'oblalic soc te ac'ticlambilic scuenta mahtanil, ya xtalic ta a'tel ta Nahilpac' Templo yu'un tahojibal.

¹⁶Jc'axel ac'bilic ta jcuenta te levitahetic ta yohlil te snich'nab Israel scuenta sjelol spisil ba-alal queremetic; la jquiq'uix scuenta sjelol te ba-alal queremetic yu'un spisil te snich'nab Israel.

¹⁷Como ho'on cu'un spisil ba-alaletic yu'un te snich'nab Israel, teme winic o chambahlam. C'alal la jcac' lajuc te ba-alaletic ta sq'uinal Egipto tey ch'ultesbil c'ohtic cu'un a.

¹⁸Ha quic'oj te levitahetic scuenta sjelol spisil te ba-alal queremetic yu'un te snich'nab Israel.

¹⁹Ho'on la jtsa te levitahetic ta yohlil te snich'nab Israel, la jcac'ticlambe scuenta smahtan te Aarón soc snich'nab yu'un ya x'a'tejic ta Nahilpac' Templo yu'un tahojibal ta scuenta te snich'nab Israel, soc te ya yaq'uic te stojel mulil yu'un te snich'nab Israel, scuenta yu'un mayuc tulan chamel ya xc'oht ta stojolic te c'alal ya xnohpojic tal ta ch'ul awilal, xchi.

²⁰Te Moisés, Aarón soc spisil te pueblo yu'un te snich'nab Israel hich la spasbeyic te levitahetic te bin ut'il spisil te bin pasot ta mandar yu'un Jehová te Moisés sc'oblal te levitahetique; te snich'nab Israel hich la spasbeyic.

²¹Te levitahetic la slecubtes sbahic soc la sac' sc'u'ic; hich te Aarón la yac'ticlambe scuenta tuchilambil mahtanil ta stojol Jehová, soc la yac' te stojel mulil yu'unic scuenta lecubtesbeyel sc'oblalic.

²²Ta patil ochic bahel te levitahetic ta spasel te ya'telic ta Nahilpac' Templo yu'un tahojibal ta stojol Aarón soc te snich'nabe. Hich la spasbeyic te bin ut'il pasot ta mandar yu'un Jehová te Moisés sc'oblal te levitahetique.

²³Patil te Jehová hich la yalbe te Moisés:

²⁴Te levitahetic te stahojiquix ho'eb scha'winic (25) ya'bilal ya x'ochic ta spasel te a'tel ta Nahilpac' Templo yu'un tahojibal;

²⁵yan teme stahojiquix lajuneb yoxwinic (50) ya'bilalic ya me xquehchanic spasel te ya'telic, ma ba ya x'a'tejiquix.

²⁶Pero ya xhu' ya scoltayic xan te yermanotac ta spasel te ya'telic ta Nahilpac' Templo yu'un tahojibal, pero ma ba ya spasiquix te tulan a'tele. Hich me yac achahpan te ya'telic te levitahetic, xchi.