Read Tzeltal Miqueas 4 Bible Online

Miqueas 4 - Tzeltal bible

Miqueas 4

¹Ta slajibal c'ahc'al te wits yu'un te templo yu'un Jehová ha jolal ya xc'oht yu'un te witsiltique, toyol xan ya xc'oht yu'un te tsehletic, ya xbahtic tey a te pueblohetique.

²Ya xtal bayel nacionetic, hich ya yalic: La'ic, mohucotic bahel ta wits yu'un Jehová, ta sna te Dios yu'un Jacob, ha ya snohptesotic a te behetic yu'un, hich ya xbehenotic ta behetic yu'un, xchihic. Como ya xloc' tal ta Sión te Ley, ta Jerusalén ya xtal te sc'op Jehová.

³Ha ya xchahpanwan ta yohlil bayel pueblohetic soc ya stojobtes te nacionetic te ay yipic, te namal ayique. Ya sc'atp'unic ta azadonetic te espadahetic yu'unic, soc ta hocetic te slanzahique. Mayuc nación te ya shach espada ta scontrahinel yan nación, ma ba ya snopiquix bin ut'il ya yaq'uic guerra.

⁴Jujutuhl ya shuhcan sbahic ta ye'tal te sts'usubil soc ta ye'tal te higuera yu'une, mayuc mach'a ya xiwtesotic yu'un. ¡Hich yaloj te Jehová te scuentahinej spisil!

⁵Aunque spisil te pueblohetic ya xbehenic ta scuenta sbihilic te dios yu'unic, te ho'otic ya xbehenotic ta scuenta sbihil Jehová te Dios cu'untic sbahtel q'uinal.

⁶Ta hich ora, xchi te Jehová, ya jtsob tal te coxo' tuminchijetic, ya jtsob mach'atic puhquemic bahel, soc te mach'atic la jca'be swocolic.

⁷Te coxo'etic ya cac' te ha'ic te mach'atic hilemic, te mach'atic puhquemic ya cac' te ha tulan nación ya xc'ohtic. Ya xcuentahinotic yu'un Jehová ta wits Sión, ta ora ini soc ta sbahtel q'uinal.

⁸Te ha'at, bahlal ts'ahcat yu'un jtsohb tuminchijetic, tulan ahnibalat yu'un Sión, yac awich' yan buelta te cuentahinwanej la awa'iy ta nahil to, te cuentahinwanej yu'un te yantsil-nich'an Jerusalén.

⁹Yo'tic, ¿bin yu'un hich ya x'awonat? ¿Yu'un bal mayuc ajwalil awu'un? ¿Yu'un bal ch'ay bahel te j'ac'-o'tanil awu'un, te hich ya ya'bat sc'uxul hich te bin ut'il ants te ya x'ayin yal?

¹⁰Ahcanajan soc awonan, yantsil-nich'an Sión, hich te bin ut'il ants te ya x'ayin yal, como ya xloc'atix bahel ta pueblo, ya xnahinat ta q'uinal; ya xc'ohat c'alal ta Babilonia, tey ya xcolat ta libre a; te Jehová tey ya scoltayat loq'uel a ta sc'ab te acontrataque.

¹¹Yo'tic bayel nacionetic stsoboj sbahic ta scontrahimbelat, hich ya yalic: Ac'a bohlobuc sc'oblal, ac'a smulan yilel Sión te jsitique, xchihic.

¹²Pero ma ba ya sna'ic te bintic snopoj te Jehová, ma xc'oht ta yo'tanic te bintic chapal yu'un, ha te la stsobticlan hich te bin ut'il jtohmetic trigo ta swuyojibal.

¹³¡Hahchan, wuya, yantsil-nich'anat Sión! yu'un ya cac' te ha taq'uin ya xc'oht axulub, soc te bronce ya xc'oht te awech'ac: yac asesen bayel pueblohetic, soc yac awac' ta stojol Jehová te sbiluquic te yelc'anejic, soc yac awa'be sc'ulejalic te Ajwalil yu'un swohlol bahlumilal.