Read Tzeltal Miqueas 6 Bible Online

Miqueas 6 - Tzeltal bible

Miqueas 6

¹A'iya awa'iyic te bin ya yal te Jehová: ¡Hahchan, tija ta c'op te witsiltic, ac'a ya'iybat ac'op te tsehletique!

²A'iya awa'iyic, witsiltic soc te tulan yich'o-ip te lumq'uinal, te tijel ta c'op yu'un Jehová, como te Jehová ay c'op yu'un soc te pueblo yu'une, ya shach c'op soc Israel a.

³Pueblo cu'un, ¿bin jpasbeyejat, o bin jcuts'inejat a? Halbon ca'iy.

⁴La jloq'uesat tal ta sq'uinal Egipto, la jcac'at ta libre yu'un mosohil; la jticon bahel ta atojol te Moisés, te Aarón soc te María.

⁵Pueblohat cu'un, na'a me yo'tic bin la snop te Balac ajwalil yu'un Moab, soc te bin jac'bot yu'un te Balaam snich'an Beor. Na'a me c'alal ayat ta Sitim, c'alal c'axat bahel ta Gilgal, yu'un yac ana'ticlanic te bintic toj la spas te Jehová.

⁶¿Bin quich'oj ya xtalon ta stojol Jehová soc ya jch'uhuntay te Dios te mero toyol ay? ¿Ya bal jtehc'an jba ta stojol soc scohtol chic'bil mahtanil, soc wacaxetic te jun ya'bilalique?

⁷¿Lec bal ya ya'iy te Jehová teme ay bayel ta mil (1,000) ta coht tat tuminchijetic o lajunmil (10,000) uc'umetic yu'un aceite? ¿Ya bal ca'be te jba jnich'an scuenta stojol te jtoybahil, ya bal ca'be te sit jbaq'uetal scuenta stojol smul te jch'uhlele?

⁸Ha'at ants-winicat, te Jehová la yalbatix te bin lec, te bin ya sc'ambat ta atojol: ha te yac apas te bin toj ta pasel, te c'ux ta awo'tan te c'uxultaywanej, soc te peq'uel yac awac' aba ta stojol te Dios awu'une.

⁹Te sc'op te Jehová ya yawtay te pueblo, ¡ha p'ijil-o'tanil te xi'el te abihile! Ich'ahic ta cuenta te castigo soc te mach'a ya yaq'ue.

¹⁰¿Ay bal ta sna te mach'a chopol yo'tan c'ulejalil te ma lecuc stahoj, soc ay bal sp'isojibal te ma ts'acaluc, te p'ajbil?

¹¹¿Ya bal cal te mayuc smul te mach'a ay sp'isojibal te ma ts'acaluc, soc yawil te yich'oj yalal te ma meleluc?

¹²Te jc'ulejetic bayel ya x'uts'inwanic, te mach'atic nahinemic tey a ya xc'opojic ta lot, ya xlo'loywan te yehique.

¹³Ha yu'un hahch quehchentesat, hahch jinat ta scaj te muliletic awu'une.

¹⁴Ya xwe'at, pero ma xnoj ach'uht yu'un, stalel ay awocol ta wi'nal; yac atsob, pero mayuc bin ya xhil awu'un, soc te bin q'uejbil awu'un ya cac' ta lajel ta espada.

¹⁵Yac awa'iy ts'umbajel, pero ma ba yac atsobe sit; yac apits' olivahetic, pero ma ba yac atuhumbe te aceite yu'une; yac apits' ta teq'uel te ts'usub, pero ma ba yac awuch'be te ya'lele.

¹⁶Como ach'uhunej spasel te mandariletic yu'un Omri soc spisil bintic la spasic te mach'atic ay yu'un Acab, la at'unic te bintic la yalique; ha yu'un ya cac'at ta jinel soc ya cac' ta labanel te mach'atic nahinemic ta awohlilique. Ha yu'un yac awich'ic labanel yu'un te pueblo cu'une.