Read Tzeltal Habacuc 2 Bible Online

Habacuc 2 - Tzeltal bible

Habacuc 2

¹Ya x'ayinon ta ilo-q'uinal cu'un, ya xtehc'ajon ta sba te ahnibal ts'ahc; ya jmahliy te bin ya yalbon te Jehová, te suhtib yu'un te bin c'opojon yu'une.

²Te Jehová la suhtbon jc'op, hich la yal: Ts'ihbaya te nahalsitil, ts'ihbaya ta tablahetic, scuenta yu'un ya xhu' ya yil te mach'a ya x'ahnimaj.

³Aunque ma to xc'oht ta pasel te nahalsitil, ya xc'oht ta pasel ta mero yorahil, ma ba ya spas lot. Aunque ya xhalaj, mahliya, yu'un ya me xc'oht ta pasel, ma ba ya xhalaj.

⁴Te mach'a ma tojuc yo'tan, ya stoy sba, yan te mach'a toj yo'tan ya xcuxaj ta scuenta sch'uhunel yo'tan.

⁵Te mach'a bayel ya yuch' vino, ya x'ac'awan ta c'abal; te jtoybahil ma ba lec ya xc'oht ta loq'uel; ya xmuc'ub snuc' hich te bin ut'il te tsobojibal mach'atic chamenic, soc ma xnoj sch'uht hich te bin ut'il te lajel, aunque ya stsob ta stojol spisil te nacionetic, soc ya stsob spisil te pueblohetique.

⁶¿Ma bal hichuc ya xhalot sc'oblal spisil te tsahbil-c'op soc te ixta'c'op ini? Hich ya yalic: ¡Obol sba te mach'a la sp'oltes te bin ma ha'uc yu'un! ¿Bin to ora ya xlaj yo'tan te ya xc'ulejub yu'un te bintic yich'oj scuenta prenda? xchihic.

⁷¿Ma bal orahuc ya xtal te mach'atic ay abet yu'un, soc te ya xwic' sitic te mach'atic ya yac' te ya xnihcat? Pojbil ya xc'ohat yu'unic.

⁸Te bin ut'il la apojbe sbiluc bayel nacionetic, spisil te yantic pueblohetic ya me spojbat abiluc, ta scaj smalbeyel sch'ich'el ants-winiquetic soc te uts'inel ta q'uinal, ta pueblohetic soc ta stojol spisil mach'atic nahinemic tey a.

⁹Obol sba te mach'a ma stojiluc ya sta te bin ya xtuhun yu'un ta sna, yu'un toyol ya yac' spechech, yu'un ma xtahot yu'un te bin chopole.

¹⁰Ta scuenta te snopojibal awu'un la awac' ta q'uexlal te ana, la ajinticlan bayel pueblohetic soc la ata amul ta scontrahinel acuxlejal.

¹¹Como c'alal ta ts'ahc ya x'awon te ton, soc ya sjac' te te' yu'un te ts'amte'.

¹²Obol sba te mach'a ya spas pueblo ta scuenta ch'ich', te ya ya'be yich' yip ta scuenta uts'inel.

¹³¿Ma bal ha'uc te Jehová te scuentahinej spisil te ya yac' te ya yich' lajinel ta c'ahc' te ya'tel te ants-winiquetic, soc te tojol ya xluhbic te nacionetique?

¹⁴Como hich ya xnoj ta q'uinal sna'beyel yutsilal te Jehová, te bin ut'il te ha' ya snojes te mar.

¹⁵¡Obol sba te mach'a ya ya'be yuch' te spat-xuhque! ¡Obol aba te yac awa'be te bin ch'a, te yac ayacubtes scuenta yu'un yac awilbe te sbaq'uetale!

¹⁶Yac awac' te bayel yac ata q'uexlal, ma ha'uc ich'el ta muc'; ha nix hich yac awuch' ha'at soc ya xchicnaj abaq'uetal, te copa ay ta swa'el sc'ab Jehová ya xc'oht ta atojol, soc ya sutp'in ta q'uexlal te awutsilale.

¹⁷Te uts'inel te c'oht ta stojol te Líbano ya me slajinat, soc te smilel te chambahlametic ya me ya'bat xiwel, ta scaj te la amalbe sch'ich'el ants-winiquetic soc te uts'inwanej la apas ta q'uinal, ta pueblohetic soc ta stojol spisil mach'atic nahinemic tey a.

¹⁸¿Bistuc te loc'omba te pasbil yu'un te mach'a ya sna' spasel, te uhltesbil loc'omba te ya yac' ta nopel lot, yu'un ha ya smuc'ulin yo'tan te ya'tel ta spasel loc'ombahetic te ma xc'opojique?

¹⁹¡Obol sba te mach'a hich ya yalbe te te': Cuxa awo'tan, soc te ya yalbe te ton te ma xc'opoj: Hahchan, te xchihe! ¿Ya bal xhu' ya xnohpteswan? Aunque potsbil ta oro soc ta plata, mayuc sch'uhlel.

²⁰Pero te Jehová ay ta ch'ul Templo yu'un; ¡ch'aban me ta stojol spisil te q'uinale!