Read Tzeltal Habacuc 3 Bible Online

Habacuc 3 - Tzeltal bible

Habacuc 3

¹Te bin la yal ta sc'oponel Dios te Habacuc, ta scuenta Sigionot:[1]

²¡La jca'iybat ac'oblal, Jehová, xcham co'tan yu'un! Pasa xan awa'tel, Jehová, ta yorahil ayotcotic; ta yorahil ayotcotic ac'a ta na'el te awa'tele; aunque ilinemat, na'a me c'uxultayel.

³Ya xloc' tal Dios ta Temán, ya xloc' tal te Ch'ul Dios ta wits Parán. Te yutsilal la snojes te ch'ulchan, noj te bahlumilal ta halbeyel yutsil sc'oblal.

⁴Te sts'anabul hich ay te bin ut'il sacal q'uinal; ya xloc' tal sjahts' sc'ahc'al ta sc'ab, tey snac'oj sba a te yu'ele.

⁵Te jmilawal-chamel ya xnahilij bahel ta stojol, soc ta spat te yoc ya xloc' c'ahc'.

⁶Ya stehc'an sba, ya yac' nihcuc te q'uinale; ya yil, nihc te nacionetic yu'un. Te namey witsiltic ya xhemts'uj cohel, te namey tsehletic ya xch'ayic cohel; pero stalel ay te behetic yu'une.

⁷Quiloj te ay swocolic te nahilpaq'uetic yu'un Cusán, te nahilpaq'uetic yu'un te sq'uinal Madián ya xnihquic.

⁸¿Ilinemat bal, Jehová, ta stojol te muc'ul-ha'etic? ¿Acontrahinej bal te muc'ul-ha'etic ta awilimba? ¿Tihlem bal sc'ahc'al awo'tan ta stojol te mar c'alal mohat ta cawuhetic awu'un, ta carretahetic awu'un te ya xtsalwanic?

⁹La achahpan te t'ihmalte' awu'un, la anojes te yawil ta ya'tejibalul at'ihmalte'e. Ta scuenta te muc'ul-ha'etic la ajaticlan te q'uinale.

¹⁰La yilat te witsetic, nihquic yu'un; c'ax bahel te snojel ha'etic; c'opoj te xahab soc la stoy sc'ab ta toyol.

¹¹Tehc'aj te c'ahc'al soc te u ta banti ayic, yu'un te sjahts' te ya'tejibalul t'ihmalte' te t'im bahel, yu'un te sts'anabul te lanza te xlipet sjahts'.

¹²Soc awilimba la abehentay te q'uinal, soc sc'ahc'al awo'tan la ats'o' ta teq'uel te nacionetique.

¹³Loc'at tal ta scoltayel te pueblo awu'un, ta scoltayel te mach'a tsahbil awu'une. La ajimbe te jolal yu'un te sna te mach'a chopol, la achicnajtesbe te yich'o-ip c'alal ta ton.

¹⁴Ha nix ta slanzahic la alowbe te jtsobawetic yu'un te soldadohetic yu'unic, te talic hich te bin ut'il yic'al-ha'al yu'un ya spucotcotic bahel, te tse'el yo'tanic hich te bin ut'il muquen ya slajin te pobrehe.

¹⁵Behenat ta mar soc te cawuhetic awu'un, ta ha'etic te yaquic ta buhl.

¹⁶La jca'iy, la syuc' sba jch'uht yu'un; nihc que yu'un te sc'ope. Och sc'a'el ta jbaquel, jcohtol nihcon yu'un. Lamal co'tan ya jmahliy te sc'ahc'alel wocol te ya xc'oht ta stojol te pueblo te ya ya'botic guerra.

¹⁷Aunque ma xnichin te higuera, soc mayuc sit te ts'usubiletic, aunque ma xyac' sit te olivo, soc mayuc bin ya yac' te chahpambil q'uinal, aunque mayuquix tuminchijetic ta stsobojibal yu'unic, soc mayuc wacaxetic ta corral,

¹⁸tse'el co'tan ta stojol Jehová, yutsil co'tan ta stojol te Dios yu'un te jcolele.

¹⁹Ha quip te Jehová te Ajwalil; ya yac' te hich ya xc'oht te coc te bin ut'il yoc chij, soc ya yac' te ya xbehenon ta toyol q'uinal. Yu'un te jtsobaw yu'un te c'ayojetique. Ya xtuhun ta a'tejibaletic yu'un c'ayoj te ya yich' tijel ta c'abal.