Read Tzeltal Sofonías 1 Bible Online

Sofonías 1 - Tzeltal bible

Sofonías 1

¹Ha te sc'op Jehová te tal ta stojol Sofonías snich'an Cusi, snich'an Gedalías, snich'an Amarías, snich'an Ezequías, ta yorahil Josías snich'an Amón, ajwalil yu'un Judá.

²Jc'axel ya jlajin spisil bintic ay ta sba te bahlumilal, xchi te Jehová.

³Ya jlajin ants-winiquetic soc chambahlametic, ya jlajin te mutetic ya xwihlic ta toyol soc te chayetic ta mar, ya cac' ch'ayuc bahel te mach'atic chopol yo'tanic, soc ya jlajin ta sba bahlumilal te ants-winiquetic, xchi te Jehová.

⁴Ya jach jc'ab ta scontrahinel te Judá soc ta scontrahinel spisil te mach'atic nahinemic ta Jerusalén. Jc'axel ya jlajin ta lugar ini jayeb xan hilem yu'un Baal soc te sbihilic te mach'atic ya x'a'tejic ta stojol te loc'ombahetic soc te sacerdotehetic yu'unique.

⁵Ya jlajin te mach'atic ya squejan sbahic ta sba sna ta sch'uhuntayel te bayel eq'uetic ta ch'ulchan, te mach'atic ya squejan sbahic yu'un ay bin ya yalic ta jamal ta scuenta Jehová soc yu'un ay bin ya yalic ta scuenta Milcom;

⁶te mach'atic ya yihquitayic st'unel te Jehová, te mach'atic ma ba ya slehic te Jehová o te ya sjoc'oyic.

⁷Ch'aban ta stojol te Jehová, te Ajwalil, como nopolix te sc'ahc'alel yu'un Jehová; te Jehová schahpanej milbil mahtanil soc sch'ultesej te ic'abiletic yu'une.

⁸Ta sc'ahc'alel te milbil mahtanil yu'un Jehová ya ca'be castigo te príncipaletic, te snich'nab te ajwalil, soc spisil mach'atic ya slapbeic sc'u' jyanlumetic.

⁹Soc ha nix ta sc'ahc'alel ya ca'be castigo spisil mach'atic ya swihluntayic ochel ta smarcohil ti'nahil, soc te mach'atic ya snojesic te sna yajwalic ta uts'inwanej soc lo'loywanej.

¹⁰Ta hich ora, xchi te Jehová, ya xchicnaj awetic c'alal ta ochibal yu'un Chay, ya xchicnaj ahcan c'alal ta Schebal Barrio soc tulan xnilet c'alal ta tsehletic.

¹¹Ahcanajanic ha'ex te nahinemex ta Mactes, como lajic spisil te jchombajeletique; lajic spisil te mach'atic ya ya'iyic mambajel chombajel ta plata.

¹²Ta hich ora ya jtsahtay quil ta tsumbil c'ahc' te Jerusalén, soc ya ca'be castigo te mach'atic slahmanej sbahic hich te bin ut'il vino te slahmoj sba, te hich ya yal ta yo'tanic: Te Jehová ma ba ya spas te bin lec o te bin ma lecuc, te xchihique.

¹³Ha yu'un ya me yich' pojel te sc'ulejalic, soc ya me yich'ic jinel te snahique. Ya spas snahic, pero ma ba ya xnahinic tey a, ya sts'unic ts'usubiletic, pero ma ba ya yuch'beyic te ya'lele.

¹⁴¡Nopolix te smuc'ul c'ahc'alel yu'un Jehová! ¡Nopolix yorahil! Ch'a ya xc'oht te aw ta sc'ahc'alel te Jehová, asta ya x'awon tey a te mach'a ay yip.

¹⁵Ha sc'ahc'alel ilimba, ha sc'ahc'alel mel-o'tan soc pich'il-o'tanil, ha sc'ahc'alel jinel soc lajinel, ha sc'ahc'alel yihc'al q'uinal soc ahc'abal, ha sc'ahc'alel macal ta tocal soc pimil ihc'al tocal,

¹⁶ha sc'ahc'alel yoq'uesinel corneta soc aw ta scontrahinel te pueblohetic te joybilic ta ts'ahc soc ta scontrahinel te toyol bahlal ts'ahquetique.

¹⁷Ya ca'be swocol te ants-winiquetic, hich ya xbehenic te bin ut'il ts'o'sitetic, como la sta smulic ta stojol Jehová. Ya xmalbot sch'ich'elic hich te bin ut'il ts'u'lum, soc te sbaq'uetalic hich te bin ut'il tsa'.

¹⁸Ta sc'ahc'alel yilimba te Jehová ma ba ya xcoltayotic yu'un te plata o te oro yu'unique; ya xlaj spisil te q'uinal ta sc'ahc'al te xut'et yo'tan, como ora nax jc'axel ya slajin spisil te mach'atic nahinemic ta q'uinal.