Read Tzeltal Hageo 1 Bible Online

Hageo 1 - Tzeltal bible

Hageo 1

¹Ta schebal ha'bil yochel ta ajwalil a te Darío, ta primero c'ahc'al ta swaquebal u, tal sc'op Jehová ta scuenta te jalwanej Hageo ta stojol Zorobabel snich'an Salatiel, gobernador yu'un Judá, soc ta stojol Josué snich'an Josadac, te muc'ul sacerdote.

²Hich yaloj te Jehová te scuentahinej spisil: Hich ya yal te pueblo ini: Ma to yorahiluc te ya yich' xan cha'pasel te sna Jehová, xchihic.

³Ha yu'un tal te sc'op Jehová ta scuenta te jalwanej Hageo, hich la yal:

⁴¿Ha bal yorahil te ya xnahinex ta ch'albil nahetic awu'unic, yan te Na ini jihnem stuquel?

⁵Hich yaloj te Jehová te scuentahinej spisil: Nopahic ta lec te behetic awu'unique.

⁶Bayel bintic yac ats'unic, pero jtep nax yac atsobic; ya xwe'ex, pero ma ba ya xnoj ach'uhtic; ya x'uch'ex, pero ma ba ya xc'ax ataquinti'ilic; yac alap ac'u' apaq'uic, pero ma ba ya xq'uixnajex yu'un; te mach'a ya yich' tojel ta a'tel, ya yich' te stojol ta hotol yawil.

⁷Hich yaloj te Jehová te scuentahinej spisil: Nopahic ta lec te behetic awu'unique.

⁸Mohanic bahel ta wits, ich'ahic tal te' tey a, cha'pasahic xan te Na, hich tse'el co'tan ta stojol te Na soc hich ya x'ich'oton ta muc' a, xchi te Jehová.

⁹Bayel bintic yac alehic, pero mayuc lec yac atahic; te bin yac aq'uej ta anahic, ho'on ya juhxiy loq'uel. ¿Bin yu'un? xchi te Jehová te scuentahinej spisil. Como jimbilix te jnahe, yan te ha'exe ya x'ahnimajex bahel ta nahetic awu'unic.

¹⁰Ha scuentahil te ma ba la yac' taluc ha'al te ch'ulchan ta atojolic soc te q'uinal ma ba la yac' sit te bintic ts'umbil tey a.

¹¹La jquic' talel te sq'uepelal q'uinal ta stojol te lumq'uinal soc ta witsiltic, ta stojol te trigo, vino, aceite soc spisil bintic ya xcol ta lumq'uinal, ta stojol te ants-winiquetic soc te chambahlametic, soc ta stojol spisil ya'tel ac'ab, xchi.

¹²Hich te Zorobabel snich'an Salatiel, soc te Josué snich'an Josadac, te muc'ul sacerdote, soc jayeb xan te ants-winiquetic la sch'uhunic spasel te bin la yal te Jehová te Dios yu'unic soc te sc'op te jalwanej Hageo, hich te bin ut'il ticombil yu'un te Jehová te Dios yu'une. Xiw te pueblo ta stojol Jehová.

¹³Ha yu'un te Hageo, te ticombil yu'un Jehová, la sc'opon te ants-winiquetic ta scuenta smandar Jehová, hich la yal: Ho'on joquinejex te ha'exe, xchi te Jehová, xchi.

¹⁴Te Jehová la stijbe yo'tan te Zorobabel snich'an Salatiel, te gobernador yu'un Judá, soc la stijbe yo'tan te Josué snich'an Josadac, te muc'ul sacerdote, soc la stijbe yo'tanic te jayeb xan ants-winiquetique. Hich talic ta a'tel ta sna Jehová te scuentahinej spisil

¹⁵ta chaneb scha'winic (24) c'ahc'al ta swaquebal u ta schebal ha'bil yochel ta ajwalil a te Darío.