Read Tzeltal Zacarías 10 Bible Online

Zacarías 10 - Tzeltal bible

Zacarías 10

¹C'ambeyahic ha'al te Jehová ta yorahil ya x'ach'ub ya'binal te'; te Jehová ya yac' taluc tsantsehwal, ya ya'beyex bayel ha'al soc yaxal ha'mal ta sq'uinal jujutuhl.

²Te loc'ombahetic ya xlo'loywanic soc te jna'ojeletic ya yilic te bin lotil; ya yalbe sc'oblal wayichil te mayuc scuentahil soc tojol te sc'opic scuenta smuc'ubtesel q'uinal ya'iyic. Ha yu'un bayuc nax ya xbahtic te pueblo hich te bin ut'il jtsohb tuminchijetic, soc ay swocolic ta scaj te mayuc jcanan yu'unique.

³Tihl hahchel sc'ahc'al co'tan ta stojol te jcananetic, ya ca'be castigo te jtsobawetique. Te Jehová te scuentahinej spisil ya scanantay te jtsohb tuminchijetic yu'un, ha te sna Judá, ha tulan cawu yu'un guerra ya xc'ohtic yu'un.

⁴Ta Judá ya xloc' tal te ton yu'un xuhc na, te ts'apbil-te' yu'un nahilpac', tey ya xloc' a te t'ihmalte' yu'un guerra, soc spisil te jtsobawetique.

⁵Hich ya xc'ohtic te bin ut'il soldadohetic ta guerra te ya sts'o'ic ta teq'uel te contra ta ahch'al ta callehetic; ya yaq'uic guerra, como ya xjoquinotic yu'un Jehová, soc ya stahic q'uexlal te mach'atic cajajtic ta cawu.

⁶Ya ca'be yip te sna Judá, ya jcoltay te sna José. Ya cac' te ya suhtic talel, como ya jna'be yo'bolil sbahic. Hich ya xc'ohtic te bin ut'il ma ba jp'ajojix, como ho'on Jehovahon te Dioson yu'unic, ya ca'iybeyic te sc'opique.

⁷Te Efraín hich ya xc'oht te bin ut'il soldado, soc tse'el yo'tan hich te bin ut'il ta scuenta vino; te yal-snich'nab ya me yilic soc ha tse'el yo'tanic yu'un, tse'el yo'tanic ta scuenta Jehová.

⁸Ya quic'ticlan talel ta scuenta xuxubtayel soc ya jtsobticlan, como la jcoltayiquix; hich ya xp'ohlic te bin ut'il ta nahil to.

⁹Aunque la jpucticlan bahel ta yohlil te pueblohetic, aunque namal ayic, ya me sna'onic tey a, ya xcuxajic soc te yal-snich'nabic soc ya suhtic xan talel.

¹⁰Ya quic'ticlan loq'uel ta Egipto, soc ya jtsobticlan talel ta Asiria, ya quic'ticlan tal ta sq'uinal Galaad soc Líbano, ma ba tic' ya x'ochic a.

¹¹Ya sohlic bahel ta mar yu'un wocol, ya jlajimbe yip te stselajan mar soc ya xtaquij spisil sc'ubulil te muc'ul-ha' Nilo. Ya xjimbot cohel te stoybahil Asiria soc ya xch'ay te bastón yu'un Egipto.

¹²Ya ca'be yipic ta scuenta Jehová, soc ya xbehenic ta scuenta te jbihile, xchi te Jehová.