Read Tzeltal Zacarías 13 Bible Online

Zacarías 13 - Tzeltal bible

Zacarías 13

¹Ta hich ora ya yich' jamel sloq'uib-ha' yu'un te sna David soc te mach'atic nahinemic ta Jerusalén scuenta spoquel mulil soc te bin bohloben sc'oblale.

²Ta hich ora, xchi te Jehová te scuentahinej spisil, ya jloq'ues ta q'uinal te sbihilic te loc'ombahetic, ma ba ya xna'otix; soc ya jloq'ueslan ta q'uinal te jalwanejetic soc te snopel bintic chopol.

³Teme ay to mach'atic ya yalic sc'op-jalwanej, hich ya xhalbotic yu'un te sme'stat: Ma ba ya xcuxajatix, como la awa'iy lot ta scuenta sbihil te Jehová, xchihic. Hich te sme'stat ya me slowic te c'alal ya yal sc'op-jalwanej.

⁴Ta hich ora ya xq'uexawic spisil te jalwanejetic yu'un te snahalsitic c'alal ya yalic sc'op-jalwanej; ma ba ya slapiquix te nuhcul te ay stsotsel yu'un ya ya'iyic lot.

⁵Tuhlutuhl hich ya yalic: Ma jalwanejucon, ya x'a'tejon ta q'uinal, ta jqueremil to a'tejon ta q'uinal, xchihic.

⁶Teme hich ya xjoc'obot: ¿Bin yu'un ehchenajem ac'ab? teme xchihe, hich ya sjac': Ha te la jquich' ehchentesel ta sna te camigotac, xchihic.

⁷¡Hahchan, espada, ta scontrahinel te jcanan cu'un, ta scontrahinel te winic te ha jmohlol! xchi te Jehová te scuentahinej spisil. Mila te jcanan, hich ya xpuhquic bahel te tuminchijetique, ya cac' jc'ab ta scontrahinel te tut tuminchijetique.

⁸Ta spisil te q'uinal, xchi te Jehová, cha'tsal ta yoxtsalal ya yich'ic lajinel soc ya xch'ayic bahel, pero te jtsal xan ya xhil tey a stuquel.

⁹Te jtsal xan ini ya cotses ta c'ahc', ya jlecubtes hich te bin ut'il ya yich' lecubtesel te plata, ya jtsaj hich te bin ut'il ya yich' tsajel te oro. Ya sc'oponon ta jbihil, soc ho'on ya ca'iybe sc'opic. Hich ya cal: Ha pueblo cu'un, xchihon; hich me ya yal: Ha Dios cu'un te Jehová, xchi.