Read Tzeltal Zacarías 14 Bible Online

Zacarías 14 - Tzeltal bible

Zacarías 14

¹Ya xtal sc'ahc'alel yu'un Jehová te ya yich' puhquel ta awohlil te bintic pojticlambil awu'une.

²Como ya jtsob tal spisil te nacionetic yu'un ya ya'beyic guerra te Jerusalén. Ya yich' ochintayel te muc'ul pueblo, ya yich'ic pojticlambeyel sbiluc ta snahic soc ya x'uts'inotic te antsetique. J'ohlil te muc'ul pueblo ya xbaht ta chuquel, pero te mach'atic hilemic ma ba ya yich'ic loq'uesel.

³Ta patil ya xloc' tal te Jehová, ya ya'be guerra te nacionetic, hich te bin ut'il tsalawan ta sc'ahc'alel guerra.

⁴Ta hich ora ya stehc'an sba ta Wits yu'un Olivohetic, te snuhp'usitayej sba soc Jerusalén ta stojol banti ya xloc' tal c'ahc'al. Ya xtop' ta ohlil te Wits yu'un Olivohetic, ta stojol banti ya xloc' tal c'ahc'al c'alal ta stojol smahlib c'ahc'al, ha muc'ul spamlej ya xc'oht a. Te j'ohlil wits ya xbaht ta stojol norte, te j'ohlil xan ya xbaht ta stojol sur.

⁵Ya me x'ahnex bahel ta spamlej yu'un te witsiltique, como te spamlej yu'un te witsiltic ya xc'oht c'alal ta Azal. Hich ya x'ahnex bahel te bin ut'il ahnex bahel ta scaj te nihquel ta yorahil Uzías, ajwalil yu'un Judá. Soc ya xtal te Jehová te Dios cu'un, sjoquinejix tal spisil te mach'atic ch'ultesbilique.

⁶Ta hich ora mayuc sacal q'uinal, mayuc sic soc mayuc me'sic.

⁷Mayuc yan c'ahc'al te pajal soc, ha nax na'bot sba yu'un Jehová, mayuc c'ahc'al soc mayuc ahc'abal, pero ta xtibiltay ay sacal q'uinal.

⁸Ta hich ora ya xloc' cuxul-ha' ta Jerusalén, j'ohlil ya x'oquin bahel ta mar ta stojol sloq'uib c'ahc'al, j'ohlil ya x'oquin bahel ta mar ta stojol smahlib c'ahc'al, hich ya spas ta yorahil snahtil c'ahc'al soc ta yorahil scomil c'ahc'al.

⁹Ha ajwalil ya xc'oht te Jehová ta swohlol bahlumilal. Ta hich ora stuquel ay te Jehová, soc stuquel ay te sbihile.

¹⁰Spisil te q'uinal ya xc'atp'uj ta muc'ul spamlej c'alal Geba ha to ta Rimón, te ay ta stojol sur yu'un Jerusalén. Toyol sc'oblal ya xc'oht te Jerusalén soc ya xnahinic tey a, c'alal te Puerta yu'un Benjamín c'alal ta yawil te nahil ochibal, ta ochibal yu'un te Angulo, soc c'alal ta toyol bahlal ts'ahc yu'un Hananeel c'alal ta yawil pits'el aceite yu'un te ajwalile.

¹¹Ya xnahinic tey a, mayuquix bin ora ya yich' xan jinel, jun yo'tan ya xnahinic ta Jerusalén.

¹²Ha ini te milawal-chamel te Jehová ya slajin a spisil te nacionetic te la ya'beyic guerra te Jerusalén: ha te ya xc'a' sbaq'uetalic te c'alal teq'uilic a, ya xc'a' sitic ta yawil, soc ya xc'a' yaq'uic ta yutil te yehique.

¹³Ta hich ora ya xchicnaj ta yohlilic bayel xiwel te ticombil yu'un Jehová; jujutuhl ya stsacbe sc'ab te smohlol, soc talel c'axel ya shach sc'abic ta scontrahinel sbahic.

¹⁴Ha nix hich te Judá ya yaq'uic guerra ta scoltayel Jerusalén. Ya yich' tsobel te c'ulejaliletic yu'un spisil te nacionetic ta sjoyobal: ha te oro, plata, soc bayel c'u'ul pac'aletic.

¹⁵Ha nix hich ay te jmilawal-chamel ta stojol te cawuhetic, mulahetic, camellohetic, burrohetic soc spisil te chambahlametic te ayic ta campamento yu'unic tey a.

¹⁶Spisil te mach'atic cuxul hilemic yu'un te nacionetic te la ya'beyic guerra te Jerusalén, ya xmohic bahel jujun ha'bil ta sch'uhuntayel te Ajwalil, ha te Jehová te scuentahinej spisil, soc ta spasel te q'uin scuenta Yax Nahetic.

¹⁷Teme ay pueblohetic ta bahlumilal te ma ba ya xmohic bahel ta Jerusalén ta sch'uhuntayel te Ajwalil, te Jehová te scuentahinej spisil, ma ba ya xtal ha'al ta stojolic.

¹⁸Teme ma ba ya xmohic bahel te mach'atic yu'un Egipto, ma ba ya xtal ha'al ta stojolic, ha ya xtal jmilawal-chamel te ya x'ehchentesotic yu'un Jehová te nacionetic te ma ba ya xmohic bahel ta spasel te q'uin scuenta Yax Nahetic.

¹⁹Ha me te castigo yu'un Egipto soc spisil te nacionetic te ma ba ya xmohic bahel ta spasel te q'uin scuenta Yax Nahetic.

²⁰Ta hich ora hich ya yich' ts'ihbayel ochel ta campanahetic yu'un te cawuhetic: Ch'ultesbil ta stojol Jehová, xchi. Soc te oxometic yu'un te sna Jehová hich ya xc'ohtic te bin ut'il te muc'ul tazahetic yu'un te scajtajib ta chiq'uel mahtanil.

²¹Spisil te oxometic ta Jerusalén soc ta Judá ch'ultesbil ya xc'ohtic ta stojol Jehová te scuentahinej spisil; spisil te mach'atic ya yaq'uic milbil mahtanil, ha ya yich'ic yu'un ya spayic tey a. Ta hich ora mayuquix jmambajel jchombajel ta sna te Jehová te scuentahinej spisil.