Read Tzeltal Zacarías 2 Bible Online

Zacarías 2 - Tzeltal bible

Zacarías 2

¹Patil la jquil mohel, la jquil jtuhl winic te yich'oj ta sc'ab p'is yu'un ya sp'is.

²La joc'obe: ¿Banti ya xbahat? xchihon. Hich la sjac'bon: Ya xbohon ta sp'isel te Jerusalén, ta sna'el jayeb te sjamalil soc jayeb te snahtile, xchi.

³Te c'alal yac ta bahel a te ch'ul a'bat te yac sc'opombelon, tal ta tahel yu'un yan ch'ul a'bat,

⁴hich halbot yu'un: Ahnimajan, halbeya te querem ini: Mayuc sts'ahcul te Jerusalén ta scaj te c'ax tsobol ants-winiquetic soc chambahlametic te ya x'ayinic tey a.

⁵Ho'on sts'ahcul c'ahc' ya xc'ohon ta sjoyobal, xchi te Jehová, soc ya cac' ta ilel cutsilal ta yohlil, xchi.

⁶¡Bahanic! loc'anic ta ahnel ta q'uinal te ay ta stojol norte, xchi te Jehová, como ho'on la jpuquex bahel ta schanebal ic' ta ch'ulchan, xchi te Jehová.

⁷¡Bahan, Sión, ha'at te nahinemat soc te yantsil-nich'an Babilonia, loc'an ta ahnel!

⁸Hich yaloj te Jehová te scuentahinej spisil, te la sticonon bahel ta stojol te nacionetic te la spojbeyex abiluquic: Te mach'a ya spiquex, hich c'ohem te ya spicbe sch'uhlel jsit.

⁹Ya jtoy jc'ab ta stojolic, ya xpojbot sbiluquic yu'un te a'batetic yu'unique, xchi. Hich yac ana'ic a te ticombilon yu'un te Jehová te scuentahinej spisil.

¹⁰C'ayojinan, tse'eluc awo'tan, yantsil-nich'anat Sión, como ya xtalon ta nahinel ta awohlilic, xchi te Jehová.

¹¹Ta hich ora bayel nacionetic jun ya xc'ohtic soc te Jehová, ha pueblo cu'un ya xc'ohtic, soc ya xnahinon ta awohlil, xchi. Hich yac ana'ic a te ticombilon yu'un te Jehová te scuentahinej spisil.

¹²Te Jehová ya me yu'untay te Judá, ha te bin ya yich' hilel ta ch'ul q'uinal, soc yan buelta ya stsa xan te Jerusalén.

¹³¡Ac'a ch'abuc ta stojol Jehová spisil mach'atic ayic ta bahlumilal, como hahchemix ta ch'ul awilal banti nahinem!