Read Tzeltal Zacarías 4 Bible Online

Zacarías 4 - Tzeltal bible

Zacarías 4

¹Cha'tal te ch'ul a'bat te yac sc'opombelon, la stijon hahchel hich te bin ut'il ya yich' tijel hahchel te mach'a wayele.

²La sjoc'obon: ¿Bin yac awil? xchi. La jac'be: Ya quil jun scajtajib c'ahc' pasbil ta oro te ay yawil aceite ta yahc'olal soc huqueb yawil c'ahc', soc huqueb tubohetic yu'un te yawil c'ahc' ayic ta sba.

³Ta sts'ehl te yawil c'ahc' ay cheb olivohetic, jun ta swa'el, yan ta sq'uexam, xchihon.

⁴La joc'obe te ch'ul a'bat te yac sc'opombelon: Tatil, ¿bin a ini? xchihon.

⁵Hich la sjac' te ch'ul a'bat te yac sc'opombelon: ¿Yu'un bal ma xana' bin a? xchi. Ma'uc, tatil, la jcut.

⁶Ha yu'un hich la yalbon: Ha te sc'op Jehová ini ta stojol Zorobabel, te hich ya yal: Ma ta scuentahuc soldadohetic soc ma ta scuentahuc yipic, ha ta scuenta te espíritu cu'un, xchi te Jehová te scuentahinej spisil.

⁷Ha'at muc'ul witsat, ¿mach'ayat a? Ya xc'atp'ujat ta spamlej ta stojol Zorobabel. Ha ya sloq'ues te ton te bayel sc'oblal te c'alal hich yacalic ta aw: ¡Mero t'ujbil! ¡Mero t'ujbil! te xchihique.

⁸Patil tal ta jtojol te sc'op Jehová te hich ya yal:

⁹Te sc'ab Zorobabel ya yotses te yich'o-ip te Na ini, soc ha nix te sc'ab te ya shu'tes. Hich yac ana'ic a te ticombilon yu'un te Jehová te scuentahinej spisil.

¹⁰Te mach'atic la sp'ajic te sc'ahc'alel te tut shahchibal te ya'tele, tse'el me yo'tanic yu'un c'alal ya yilic te plomo ta sc'ab te Zorobabel. (Te huqueb sit ini, ha sit te Jehová te ya yil spisil te q'uinale.)

¹¹La joc'obe xan: ¿Bin sc'oblal te cheb olivohetic ini te ayic ta swa'el soc ta sq'uexam te yawil c'ahc'? xchihon.

¹²Soc la joc'obe xan: ¿Bin sc'oblal te cha'chej olivohetic te ya smalic bahel te aceite yu'un oro ta scuenta te cheb tubohetic pasbilic ta oro? xchihon.

¹³Hich la sjac'bon: ¿Yu'un bal ma xana' bin a? xchi. Ma'uc, tatil, la jcut.

¹⁴Hich la sjac'bon: Ha te cha'tuhlic ini te tsahbilic te ayic ta stojol te Ajwalil yu'un swohlol bahlumilal, xchi.