Read Tzeltal Zacarías 7 Bible Online

Zacarías 7 - Tzeltal bible

Zacarías 7

¹Ta schanebal ha'bil yochel ta ajwalil a te Darío, ta schanebal c'ahc'al ta sbalunebal u, ha te Quisleu sbihil, tal te sc'op Jehová ta stojol Zacarías.

²Ta hich ora te ants-winiquetic yu'un Bet-el sticonejiquix bahel a te Sarezer soc Regem-melec soc te winiquetic yu'un, yu'un ay bin la sc'anic ta stojol Jehová,

³soc yu'un ya sjoc'obeyic te sacerdotehetic te ayic ta templo yu'un Jehová te scuentahinej spisil, soc te jalwanejetic: ¿Ya bal sc'an te ya x'oc'otic soc ya jcom jwe'eltic ta yo'ebal u hich te bin ut'il jpasojtic te ayix orahe? xchihic.

⁴Tal ta jtojol te sc'op Jehová te scuentahinej spisil:

⁵Halbeya spisil te ants-winiquetic ta spahmal te q'uinal soc te sacerdotehetic: Te c'alal la acom awe'elic soc oq'uex ta yo'ebal u soc ta shuquebal u ta lajuneb schanwinic (70) ha'bil ini, ¿la bal acom awe'elic ta jcuenta?

⁶Soc te c'alal ya xwe'-uch'ex, ¿ma bal ya xwe'-uch'uquex ta acuentahic? xchihat.

⁷¿Ma bal ha'uc ini te c'opetic la yal te Jehová ta scuenta te nahil jalwanejetic, te c'alal ay mach'atic nahinemic ta Jerusalén soc te lamal q'uinal a, soc te ay mach'atic nahinemic a ta pueblohetic yu'un ta sjoyobal soc te Neguev soc te Sefela?

⁸Soc tal te sc'op Jehová ta stojol Zacarías, hich la yal:

⁹Hich yaloj te Jehová te scuentahinej spisil: Stojil me xawa'iyic chahpanwanej, pasahic c'uxultaywanej soc talel c'axel me xana'be yo'bolil abahic;

¹⁰ma me xawa'be swocol ta uts'inel te me'ba' ants, te me'ba' alal, te jyanlum o te pobre, soc ma me ayuc mach'a chopol bin ya snop ta yo'tan ta stojol te yermanohe, xchi.

¹¹Pero ma ba la sc'an la ya'iyic, la swalac'patiyic soc la smac schiquinic.

¹²La stulantesbe yo'tanic hich te bin ut'il diamante-ton scuenta yu'un ma ba ya ya'iyic te Ley soc te sc'op te Jehová te scuentahinej spisil te la sticon tal ta scuenta te espíritu yu'un, ta scuenta te nahil jalwanejetic yu'une. Ha yu'un bayel ilin te Jehová te scuentahinej spisil.

¹³Hich la yal: Hich te bin ut'il c'alal la jcawtay, ma ba la ya'iyic, ha nix hich c'alal la yawtayon ma ba la jca'iy, xchi te Jehová te scuentahinej spisil,

¹⁴ha la jpucticlan bahel ta sutu-ic' ta stojol spisil te nacionetic te ma ba sna'beyejic sbahe. Jimbil hil te q'uinal c'alal ihquitayot yu'unic, mayuc mach'a xtal xc'ax tey a; hich la sc'atp'unic ta jochol taquin q'uinal te t'ujbil q'uinale, xchi.