Read Tzeltal Zacarías 8 Bible Online

Zacarías 8 - Tzeltal bible

Zacarías 8

¹Tal ta jtojol te sc'op Jehová te scuentahinej spisil, hich la yal:

²Bayel xut'et co'tan ta stojol Sión, soc bayel ilimba te xut'et co'tan yu'un.

³Hich yaloj te Jehová: Ya suhton tal ta Sión soc ya xnahinon ta Jerusalén. Te Jerusalén ha pueblo yu'un bin Smelelil ya xc'oht sbihil, soc te wits yu'un Jehová te scuentahinej spisil, ha Ch'ul Wits ya xc'oht sbihil.

⁴Hich yaloj te Jehová te scuentahinej spisil: Te mamaletic soc me'eletic ya xhuhcajic yan buelta ta callehetic ta Jerusalén, tuhlultuhl yich'oj ta sc'abic snahbate'ic ta scaj te bayelix te ya'bilalique.

⁵Te callehetic yu'un te pueblo ya xnojic ta queremetic soc ach'ixetic te ya x'ixtajic tey a.

⁶Hich yaloj te Jehová te scuentahinej spisil: Aunque te mach'atic hilemic yu'un te pueblo hich ya yilic te ma xhu' ta pasel ini ta hich ora, ¿yu'un bal c'ax wocol ya quil te ho'one? xchi te Jehová te scuentahinej spisil.

⁷Hich yaloj te Jehová te scuentahinej spisil: Ya jcoltay te pueblo cu'un ta stojol te q'uinal banti ya xloc' tal c'ahc'al soc te q'uinal ta stojol smahlib c'ahc'al;

⁸ya quic'ticlan tal yu'un ya xnahinic ta Jerusalén. Ha pueblo cu'un ya xc'ohtic, soc ho'on Dioson yu'unic ya xc'ohon ta smelelil soc ta scuenta spasel bin toj.

⁹Hich yaloj te Jehová te scuentahinej spisil: A'beyahic yip ac'abic, ha'ex te yac awa'iybelic te c'opetic ini te yac yalbelic te jalwanejetic, te hich yac yalbelic a c'alal ta bin ora la yich' a'beyel te yich'o-ip c'alal ora ta cha'pasel te sna Jehová te scuentahinej spisil.

¹⁰Como ta nahil to mayuc stojol a'tel yu'un winiquetic o chambahlametic, soc mayuc lamal q'uinal la ya'iy te mach'a loc' bahel o te och talel, ta scaj te contra, como la jca'be scontrahin sbahic spisil.

¹¹Pero yo'tic ma hichuc ya jpasbeyiquix te mach'atic hilemic yu'un te pueblo te bin ut'il la jpas ta nahil, xchi te Jehová te scuentahinej spisil.

¹²Yu'un ya yich' ts'umbeyel lamal q'uinal: ya me yac' sit te sts'usubilic, ya sitin te awal-ts'unubil ta q'uinal, soc ya yac' sts'ujulel te ch'ulchan; ya ca'be yu'untayic spisil ini te mach'atic hilemic yu'un te pueblo.

¹³Hich te bin ut'il bohloben c'oblalil c'ohemex ta yohlil te nacionetic, pueblohex Judá soc pueblohex Israel, ha nix hich ya jcoltayex soc ha bendición ya xc'ohex. ¡Ma me xiwex! ¡A'beyahic yip ac'abic! xchi.

¹⁴Como hich yaloj te Jehová te scuentahinej spisil: Hich te bin ut'il la jnop te ya ca'beyic bin chopol te ame'atatic c'alal la shachbonic quilimba, soc ma ba la jsuht jc'op,

¹⁵ha nix hich la jnopix te ya jpasbe yo'tic te bin lec te Jerusalén soc te sna Judá; ma me xiwex.

¹⁶Ha ya sc'an te yac apasic ini: Talel c'axel smelelil yac ac'opon abahic, a'iyahic chahpanwanej ta smelelil soc ta scuenta bin ya yac' lamal q'uinal ta ochibaletic yu'un te pueblohetic awu'unique.

¹⁷Ma me ayuc mach'a ya snop ta yo'tan te bin chopol ta scontrahinel te spat-xuhc, ma me xamulanic yalel ta jamal lot, como ya jp'aj spisil ini, xchi te Jehová.

¹⁸Tal ta jtojol te sc'op Jehová te scuentahinej spisil, hich la yal:

¹⁹Hich yaloj te Jehová te scuentahinej spisil: Te scomel we'elil ta schanebal u, ta yo'ebal, shuquebal soc ta slajunebal u, ya xc'atp'uj ta tse'el-o'tanil soc yutsil-o'tanil, soc ta muc'ul q'uinetic yu'un te sna Judá. Ha yu'un c'uxuc ta awo'tanic te bin smelelil soc te lamal q'uinale.

²⁰Hich yaloj te Jehová te scuentahinej spisil: Ya to xtalic pueblohetic soc mach'atic nahinemic ta bayel pueblohetic.

²¹Te mach'atic nahinemic ta jun pueblo ya xtalic ta stojol yan pueblo, hich me ya yalic: ¡Conic ta sc'ambeyel bendición te Jehová, ya jlehtic te Jehová te scuentahinej spisil, xchihic. Ha nix hichon ya xbohon ec! xchihic te yantique.

²²Ya xtal ta Jerusalén bayel pueblohetic soc nacionetic te ay yipic ta slehel te Jehová te scuentahinej spisil, soc ta sc'ambeyel bendición.

²³Hich yaloj te Jehová te scuentahinej spisil: Ta hich ora, ay lajuntuhl jyanlumetic te bayel ta chahp sc'opic, ya stsacbe sti'il sc'u' jtuhl judio, hich ya yalbeyic: Ac'a jt'unatcotic bahel te ha'exe, como la jca'iycotic te sjoquinejex te Diose, xchihic.