Read Tzeltal Zacarías 9 Bible Online

Zacarías 9 - Tzeltal bible

Zacarías 9

¹Ha ini te sc'op Jehová ta stojol te q'uinal yu'un Hadrac soc ta stojol Damasco: Spisil te ants-winiquetic soc spisil te jchahp sts'umbal Israel ya sc'an ya yac' sitic ta stojol Jehová.[6]

²Ha nix hich Hamat te jun smojon soc Damasco, soc te Tiro soc Sidón, aunque bayel sp'ijilic.

³Te Tiro la spas toyol ahnibal ts'ahc, soc hich la sbusan plata te bin ut'il ts'u'lum, soc hich la sbusan oro te bin ut'il ahch'al ta callehetic.

⁴Pero te Cajwaltic ya me spojbe sbiluc, ya smulbe yip ta mar soc ya xlajinot ta c'ahc'.

⁵Ya me yil te Ascalón, ya me xiw yu'un; ha nix hich te Gaza, ya me ya'iy bayel sc'uxul; soc ha nix hich te Ecrón, como ya xlaj te smuc'ul yo'tane. Ya xch'ay bahel te ajwalil yu'un Gaza, soc mayuc mach'a ya xnahin ta Ascalón.

⁶Ya xnahin jyanlumetic ta Asdod, soc ya jlajimbe stoybahil te filisteohetique.

⁷Ya jloq'uesbe te ch'ich' ta ye, soc ya jloq'uesbe te bintic ilobtic sba te ay ta yohlil te sbaquel ye. Ha nix hich yu'un Dios ya xc'ohtic te mach'atic ya xhilic yu'un; hich ya xc'ohtic te bin ut'il capitanetic yu'un Judá, soc te Ecrón hich ya xc'oht te bin ut'il te jebuseo.

⁸Ya cac' jcananetic ta sjoyobal te na cu'un scuenta yu'un mayuc mach'a ya x'och soc ya xloc'; ma ba ya xc'axix j'uts'inwanej ta stojol, como yacon ta yilel ta jsit nix.

⁹¡Tse'eluc me awo'tan, yantsil-nich'anat Sión! ¡awonanic soc yutsil q'uinal, yantsil-nich'anat Jerusalén! Ilawil, ya xtal ta atojol te ajwalil awu'un, toj yo'tan soc ya xcoltaywan, peq'uel yo'tan, cajal ta burro, ta tut burro te ha yal me' burra.

¹⁰Ya slajimbe te carretahetic yu'un guerra ta Efraín, soc te cawuhetic ta Jerusalén, ya yich'ic wac'ticlanel te t'ihmalte'etic yu'un guerra, ya yalbe sc'oblal lamal q'uinal ta stojol te nacionetique. Ya ya'iy cuentahinel c'alal ta jehch mar ha to ta yan jehch mar, c'alal ta muc'ul-ha' Éufrates ha to ta sti'il te bahlumilale.

¹¹Ha nix hichat, ta scuenta te ch'ich' yu'un te chapbil-c'op cu'un ta atojolic,[7] ya jloq'uesbat te jchuqueletic awu'un ta yawil ha' te mayuc ya'lel.

¹²Suhtanic talel ta ahnibal ts'ahc, ha'ex jchuquelex te ayix smuc'ul awo'tanic; yo'tic nix ya calbeyex te ya jsuhtbeyex cheb buelta abiluquic.

¹³Como jt'imojix te Judá hich te bin ut'il t'ihmalte' cu'un soc la jcac' te ha ya'tejibalul c'oht te Efraín. Ya jtij hahchel awal-anich'nab, Sión, ta scontrahinel te awal-anich'nab Grecia, hich ya cac'at te bin ut'il espada yu'un soldado.

¹⁴Te Jehová ya yac' sba ta ilel ta stojolic, hich ya xt'im bahel te ya'tejibal st'ihmalte' te bin ut'il tsantsehwal; Te Jehová, te Ajwalil, ya yoq'uesin te corneta, ya xbehen bahel ta guerra ta yohlil sutu-ic' ta stojol sur.

¹⁵Te Jehová te scuentahinej spisil ya me scanantay te mach'atic yu'un, ya me slajinic soc ya me sts'o'ic ta teq'uel te tonetic yu'un jihmuch'il; ya me yuch'ic soc ay me xjuyetic hich te bin ut'il yuch'ojic vino, ya xnoj sch'uhtic hich te bin ut'il muc'ul taza, hich te bin ut'il te xulubiletic yu'un te scajtajib ta chiq'uel mahtanil.

¹⁶Ta hich ora, te Jehová te Dios yu'unic ya me scoltay hich te bin ut'il jtsohb tuminchijetic yu'un te pueblo yu'une, soc xlipet ya xc'ohtic ta sq'uinalic hich te bin ut'il t'ujbil tonetic ta corona.

¹⁷¡Cax lec soc buen t'ujbil! Te trigo ya ya'be yutsil q'uinal ya'iyic te queremetic soc te vino ya ya'be yutsil q'uinal ya'iyic te ach'ixetique.