Read Tzeltal Malaquías 1 Bible Online

Malaquías 1 - Tzeltal bible

Malaquías 1

¹Ha sc'op-jalwanej ini. Ha te sc'op Jehová ta stojol Israel ta scuenta Malaquías.

²C'uxex ta co'tan, xchi te Jehová. Pero yac ajoc'oyic: ¿Bin ut'il c'uxotcotic ta awo'tan? xchihex. Te Esaú ¿ma bal ha'uc sbanquil Jacob? xchi te Jehová; pero c'ux ta co'tan te Jacob

³soc la jp'aj te Esaú; la jc'atp'un ta jochol q'uinal te witsiltic yu'un, soc la jquihquitay hilel te bintic a'bot yich' hilel ta stojol te ts'i'etic ta jochol taquin q'uinal.

⁴Teme hich ya yal te Esaú: Aunque pobre c'ohemotic, ya jcha'pastic xan te bintic jimbilic, teme xchihe, hich yaloj te Jehová te scuentahinej spisil: Ya spasic, pero ho'on ya jimbe. Ha chopol q'uinal ya xc'oht te sbihile, soc ha pueblo te stalel ilintayot yu'un Jehová, xchi sc'oblal.

⁵Ya me awilic ta asitic, soc hich yac awalic: Mero muc' te Jehová, ha nix hich muc' ta fuera yu'un Israel, xchihex.

⁶Te nich'anil ya yich' ta muc' te state, soc te a'bat ya yich' ta muc' te yajwale; teme ho'on tatilon, ¿bin yu'un ma ba yac awich'onic ta muc'? teme ho'on ajwalilon, ¿bin yu'un ma ba yac axi'onic, ha'ex sacerdotehex te yac ap'ajic te jbihile? xchi te Jehová te scuentahinej spisil. Pero yac awalic: ¿Bin ut'il jp'ajojcotic te abihile? xchihex.

⁷Ha te yac awaq'uic ta scajtajib jmahtan te we'elil te bohloben sc'oblale. Pero ya to awalic: ¿Bin a te ma ba quich'ojatcotic ta muc' yu'un? xchihex. Ha te yac awalic te p'ajbil te mesa cu'une.

⁸Te c'alal yac awaq'uic ts'o'sit chambahlametic scuenta chic'bil mahtanil, ¿ma bal chopoluc? Ha nix hich te c'alal yac awaq'uic coxo', o te ay ta chamel, ¿ma bal chopoluc? A'beya te príncipe awu'un, ¿lec bal yo'tan yu'un ta atojol, ya bal ya'bat bendición? xchi te Jehová te scuentahinej spisil.

⁹C'ambeyahic Dios te lecuc yo'tan ta atojolic, scuenta yu'un yacuc sna' yo'bolil jbahtic. Pero ¿bin ut'il lec yo'tan ya xc'oht ta atojolic teme hich yac apasique? xchi te Jehová te scuentahinej spisil.

¹⁰Te ayuc mach'a ta awohlilic te ya smacbe te ochibaletic yu'un te templo scuenta yu'un ma tojoluc yac atsunic c'ahc' ta scajtajib ta chiq'uel mahtanil cu'un, xchi te Jehová te scuentahinej spisil.

¹¹Como c'alal banti ya xloc' tal c'ahc'al c'alal banti ya xmahl c'ahc'al muc' te jbihil ta yohlil te nacionetique, ta bayuc ya yich' chiq'uel pom ta scuenta jbihil soc ya yich' aq'uel mahtaniletic te mayuc yabacul. Muc' te jbihil ta yohlil te nacionetic, xchi te Jehová te scuentahinej spisil.

¹²Pero ha'ex yac abohlobtesbe sc'oblal te c'alal hich yac awalic: Bohloben sc'oblal te mesa yu'un te Jehová, te xchihex, soc te c'alal yac awalic te p'ajbil te we'elil yu'une.

¹³Soc hich awalojic: C'axix co'tan yu'un ini, xchihex, soc yac ap'ajonic, xchi te Jehová te scuentahinej spisil. La awich'ic talel te bin elc'ambil, te coxo', o te ay ta chamel, ha yac awa'bonic jmahtanin. ¿Ya bal jtsacbeyex ta ac'abic? xchi te Jehová te scuentahinej spisil.

¹⁴Chopol sc'oblal te mach'a ya xlo'loywan, te ay stat tuminchijetic ta jtsohb yu'un te yaloj te ya yaq'ue, pero ha ya ya'be smahtanin Jehová te bin ma lecuque. Como ho'on Muc'ul Ajwalilon, xchi te Jehová te scuentahinej spisil, soc xi'bil te jbihil ta yohlil te nacionetique.