Read Tzeltal San Mateo 11 Bible Online

San Mateo 11 - Tzeltal bible

San Mateo 11

¹C'alal laj yo'tan te Jesús ta snohptesel te lahchaytuhl (12) jnopojeletic yu'une, hahch bahel tey a, baht ya'iy p'ijubteswanej soc yalel sc'op Dios ta yantic pueblohetic yu'unic.

²Te Juan te ay ta cárcel, c'alal la ya'iy te bin yac spasbel te Cristo, hich la sticon bahel cheb jnopojeletic yu'un ta sjoc'obeyel:

³¿Ha'at laj bal te mach'a sc'oblal ya xtal o ya bal jmahliycotic yan? xchihic c'ohel.

⁴Hich la sjac' te Jesús: Bahanic, a'beyahic sna' te Juan te bintic yac awa'iybelic soc te bintic yac awilbelique:

⁵Ya yiliquix q'uinal te ts'o'sitetic, ya xbeheniquix te coxo'etic, lecubtesbiliquix te jc'a'el-chameletic, ya ya'iyiquix q'uinal te cohquetic, la yich'iquix cha'cuxajtesel mach'atic chamenic, soc yaquix ta halbeyel ya'iy te lec yach'il c'op te pobrehetique.

⁶Bayel me yutsil te mach'a ma ba ya sc'ohchin sba ta jcuenta, xchi.

⁷C'alal suhtic bahel a, te Jesús hahch yalbe sc'oblal te Juan ta stojol te mach'atic tey ayic a: ¿Bin a te loc' tal awilic ta jochol taquin q'uinal, ha bal jalal yac ta yuq'uilanel ta ic'?

⁸¿Bin tal awilic, ha bal jtuhl winic te slapoj buen fino pac'? Te mach'atic slapojic buen fino pac', ayic ta sna ajwaliletic stuquelic.

⁹Pero ¿bin loc' tal awilic hiche, ha bal jtuhl jalwanej? Melel nix a, soc ya calbeyex te ha c'ax hich a te bin ut'il jalwanej,

¹⁰como ha nix sc'oblal ini te bin ts'ihbabil hilel: Ya jticon te jal-c'op cu'un te nahil ya xbaht awu'un, te ha ya schahpambat abe ta atojol, te xchihe.

¹¹Jamal ya calbeyex, spisil mach'atic alataybilic yu'un ants, mayuc chicnajem te c'ax hich sc'oblal a te bin ut'il Juan te J'ac'-ich'-ha'. Pero te mach'a c'ax peq'uel ay ta banti ay te cuentahinel yu'un te ch'ulchan ha toyol c'ohem yu'un te Juan.

¹²C'alal ta yorahil te Juan te J'ac'-ich'-ha' yalel c'alal ora, bayel ya yich' uts'inel te cuentahinel yu'un te ch'ulchan, soc te j'uts'inwanejetic ya sc'an ya stsaquic ta fuersa.

¹³Spisil te jalwanejetic soc te Ley la yalic sc'op Dios ha to ta yorahil te Juan.

¹⁴Te yacuc ac'an yac ach'uhunic, te Juan ha nix te Elías te sc'oblal ya xtale.

¹⁵Te mach'a ay schiquin, ac'a ya'iy.

¹⁶¿Bin ya jpaj soc a te mach'atic cuxajtic ta ora ini? Ha pajal ayic soc te queremetic te huhcajtic ta plaza te hich ya yawtayic te smohloltac:

¹⁷La jcoq'uesimbeyexcotic amay, pero ma ba ahc'otajex; la jc'ayojtaybeyexcotic c'ayoj yu'un mel-o'tan, pero ma ba oq'uex, xchihic;

¹⁸yu'un tal te Juan te ma ba we' uch', hich ya yalic: Ay pucuj ta yo'tan, xchihic.

¹⁹Tal te Nich'anil ay ta scuenta winic te ya xwe' x'uch' stuquel, hich ya yalic: Bayel ya xwe' soc ya yuch' vino, ha jun yo'tan sba soc te jc'an-patanetic soc yantic jmulawiletic, xchihic. Pero te p'ijil-o'tanil ya xchicnaj ta scuenta te yal-snich'nabe, xchi te Jesús.

²⁰Te Jesús hahch stahticlan ta halel te pueblohetic banti la spasticlan ta ilel bayel ta chahp a'teliletic, como ma ba la sc'an la suhtes yo'tanic, hich la yal:

²¹¡Ay me awocol, Corazín! ¡Ay me awocol, Betsaida! Te ha'uc la yich' pasel ta Tiro soc ta Sidón te jchahp a'teliletic te la yich' pasel ta atojolic, namey la suhtes yo'tanic, la slapiquix pac' yu'un mel-o'tan soc la shuhcanix sbahic ta tan te hichuque.

²²Ha yu'un ya calbeyex te ta yorahil ich'el ta c'op ha peq'uel castigo ya yich' te Tiro soc te Sidón te bin ut'il ya yich' te Corazín soc te Betsaida.

²³Soc ha'at, Capernaum, te awich'oj tohytesel c'alal ta ch'ulchan, ya me awich' ch'ojel bahel c'alal ta stsobojibal mach'atic chamenic. Te teyuc la yich' pasel ta Sodoma te jchahp a'teliletic te la yich' pasel ta atojol, cuxul c'alal ora te hichuque.

²⁴Ha yu'un ya calbeyex te c'alal ya sta yorahil ich'el ta c'op ha peq'uel xan castigo ya yich' te Sodoma te yac awich' te ha'ate, xchi te Jesús.

²⁵Ta hich ora la yal te Jesús: Ya calbat yutsil ac'oblal, Jtat, Yajwalat ch'ulchan soc bahlumilal, yu'un ma ba la awa'be sna'ic ha'i c'op ini te mach'atic p'ij yo'tanic soc te mach'atic ay bintic ya sna'ic, ha la awa'be sna'ic te bic'tal alaletique.

²⁶Hichuc, Jtat, yu'un hich la sc'an awo'tan.

²⁷Spisil te bintic ay, a'bibilon ta jc'ab yu'un te Jtate; soc mayuc mach'a ya sna'be sba te Nich'anil, ha nax te Tatil te ya sna'be sba, soc mayuc mach'a ya sna'be sba te Tatil, ha nax te Nich'anil te ya sna'be sba soc te mach'atic ya sc'an ya x'a'botic sna'beyic sba yu'un te Nich'anil.

²⁸La'ic ta jtojol apisilic te luhbunex soc te ay awihcatsic, ho'on ya ca'beyex acux awo'tanic.

²⁹Ich'bonic te yugo cu'un soc nopbonic co'tan, como manso soc peq'uel co'tan, hich yac atahic cux-o'tanil yu'un ach'uhlelic a,

³⁰como ma ba wocol ta ich'el te yugo cu'un soc ma ba al te ihcatsil cu'une, xchi.