Read Tzeltal San Mateo 14 Bible Online

San Mateo 14 - Tzeltal bible

San Mateo 14

¹Ta hich ora te Herodes te tetrarca[6] la ya'iybe sc'oblal te Jesús te bayuc puhquem ta halel.

²Hich la yalbe te winiquetic yu'un: Ha me te Juan te J'ac'-ich'-ha'; cha'cuxajemix tal ta yohlil te mach'atic chamenic; ha scuentahil te yac ta a'tel ta scuenta te yu'el ini, xchi.

³Como te Herodes stsacojix te Juan, la schuc ta cadena soc la yotses ta cárcel, ta scaj te Herodías te yihnam Felipe te yihts'in te Herodes,

⁴como bayel buelta hich halbot yu'un te Juan: Ma lecuc te awic'oj te antse, xchi.

⁵Te Herodes ya c'an yac' ta milel te Juan, pero ha xi'oj te pueblo, como sch'uhunejic te ha jalwanej te Juan.

⁶Pero te c'alal la spasbeyic sq'uin yu'un loc' ya'bilal te Herodes, te yantsil-al te Herodías la ya'iy ahc'ot ta stojolic, bayel la smulan te Herodes.

⁷Ha yu'un la yal ta jamal te ya ya'be spisil te bin ya xc'ambote.

⁸Te ach'ix, te bin ut'il nahil a'bot sna' yu'un te snan, hich la yal: Ich'bon tal ta plato te sjol te Juan te J'ac'-ich'-ha', xchi.

⁹Te ajwalil la smel yo'tan yu'un, pero ta scaj te yalojix ta jamal soc ta scaj te mach'atic sjoquinejic ta mesa, la spas mandar te ya x'a'bot te bin yac sc'ambele.

¹⁰Hich la sticon ta xot'beyel loq'uel tal sjol ta cárcel te Juan.

¹¹Xetbil tal ta plato te sjol te Juan, c'oht ta a'beyel te ach'ix te ha baht ya'be te snane.

¹²Hich te jnopojeletic yu'un te Juan la yic'beyic bahel te sbaq'uetal soc la smuquic, patil baht yalbeyic te Jesús te bin c'ohtix ta pasel.

¹³C'alal hich la ya'iy te Jesús, stuquel loc' bahel ta barco tey a, q'uejel baht ta jochol q'uinal. C'alal hich la ya'iyic te ants-winiquetic, loq'uic tal ta pueblohetic, la st'unic bahel ta yoquic.

¹⁴C'alal loc' ta barco te Jesús, la yil bayel ants-winiquetic, sts'ujet ta yo'tan la ya'iy, hich la slecubteslan te jayeb jchameletic tey ayic a.

¹⁵Ta stibiltayel q'uinal tal ta c'oponel yu'un te jnopojeletic yu'un, hich la yalic: Jochol te q'uinal soc tibilix ta bahel. Ticonlanahix bahel yu'un ya xbahtic ta tut pueblohetic ta smanel swe'elic, xchihic.

¹⁶Halbotic yu'un te Jesús: Ma fuersahuc ya xbahtic. A'beya swe'elic ha'ex, xchi.

¹⁷Mayuc bin quich'ojcotic, hip ho'pehch pan soc cha'coht chay, xchihic.

¹⁸Ich'bonic tal li'i, xchi te Jesús.

¹⁹Hich la spas ta mandar te ants-winiquetic te yacuc shuhcan sbahic ta aquiltic; la stsac te ho'pehch pan soc te cha'coht chay, la yil mohel ta ch'ulchan soc la sc'opon Dios yu'un, la xet'ticlan, la yac'ticlambe te jnopojeletic yu'un, hich te jnopojeletic la spucticlambe te mach'atic tey ayic a.

²⁰We'ic spisilic, noj sch'uhtic yu'un; soc la stsobic te xeht'elul pan te hil yu'unic, lahchayeb (12) moch noj a.

²¹Te mach'atic we'ic, ay wan lajunwinic yoxlajunbahc' (5,000) ta tuhl winiquetic, ma ba la yich' ahtayel te antsetic soc te alaletique.

²²Te Jesús ora la sticon ochel ta barco te jnopojeletic yu'un ya xnahilijic bahel ta jehch ha', stuquel hil yu'un ya sticon bahel te tsobol ants-winiquetique.

²³C'alal laj sticombel a te ants-winiquetic, te Jesús mo bahel ta wits ta sc'oponel Dios ta stuquel. C'alal ihc'ub q'uinal, tey ay stuquel a,

²⁴pero ayix ta yohlil mar a te barco, yac yich'bel majel ta tulan stselajan mar, como walac' ya xtenot ta ic'.

²⁵Cheb oxeb xanix ora ma sacub q'uinal a, baht Jesús ta banti ayic, yac ta behel ta ba ha'.

²⁶C'alal ilot yu'un te jnopojeletic te yac ta behel ta ba ha', tojic xiwel yu'un, hich la yalic: ¡Yesomba! xchihic. Hahchic ta aw yu'un xiwel.

²⁷Pero ora c'oponotic yu'un te Jesús: ¡Muc'ubenuc me q'uinal xawa'iyic! Ho'on me, ma me xiwex, xchi sc'oblalic.

²⁸Ha yu'un la sjac' te Pedro: Cajwal, teme ha'ate, hala mandar yu'un ya xtalon ta ba ha' ta banti ayat, xchi.

²⁹La', xchi sc'oblal. Hich loc' ta barco te Pedro, hahch ta behel ta ba ha', toj bahel ta banti ay te Jesús.

³⁰Pero c'alal la yil te tulan ic', xiw yu'un, hich hahch ta mulel cohel ta ha', hahch ta aw: ¡Cajwal, coltayawon! xchi.

³¹Ora la shach sc'ab te Jesús, la stsac te Pedro, hich la yalbe: ¡Winic te mayuc lec sch'uhunel awo'tan! ¿Bin yu'un te xchebet awo'tan? xchi sc'oblal.

³²C'alal ochic bahel ta barco, xch'abluj bahel te iq'ue.

³³Ha yu'un te mach'atic ayic ta barco tal sch'uhuntayic, hich la yalic: Melel nix a te ha'at Snich'anat Dios, xchihic ta stojol.

³⁴C'alal la stahic c'ohel te ti'ha', c'ohtic ta sq'uinal Genesaret.

³⁵C'alal la sna'beyic sba te Jesús te winiquetic tey a, la spuquic ta halel ta spisil te q'uinale; hich la yic'ticlambeyic tal ta stojol Jesús spisil te jchameletic;

³⁶la yalbeyic wocol te yacuc x'a'bot spicbeyic te sti'il smuc'ul-c'u'. Spisil te mach'atic la spicbeyic, lecubic yu'un.