Read Tzeltal San Mateo 15 Bible Online

San Mateo 15 - Tzeltal bible

San Mateo 15

¹Ay talic ta stojol Jesús escribanohetic soc fariseohetic te talemic ta Jerusalén, hich hul yalbeyic:

²¿Bin yu'un te jnopojeletic awu'un yac xc'axuntaybelic te costumbre yu'un te mamaletique? ¿Bin yu'un ma ba nahil ya spoc sc'abic te c'alal ya xwe'ic? xchihic.

³Hich halbotic yu'un te Jesús: ¿Bin yu'un te ha'ex nix yac ac'axuntaybeyic te smandar Dios ta scuenta te costumbre awu'unique?

⁴Como hich la yal ta mandar te Dios: Ich'a ta muc' te ame'atat, xchi, soc: Te mach'a ya sbohlc'optay te stat o te snan ya me xlaj yu'un, xchi.

⁵Pero te ha'ex yac awalic: Mach'ayuc a te ya yalbe te stat o te snan: Ha smahtan Dios spisil te bintic sc'oblal ha'at ya ca'bat, teme xchihe,

⁶ma fuersahuc ya yich'ix ta muc' a te stat o te snane. Hich yac alajimbeyic sc'oblal te smandar Dios ta scuenta te costumbre awu'unique.

⁷¡Jchebal-o'tanex! Smelelil te bin la yalbeyex ac'oblalic te Isaías te c'alal hich la yal:

⁸Te pueblo ini ta ye nax ya yich'onic ta muc', pero te yo'tanic namal ayic ta jtojol,

⁹tojol ya sch'uhuntayonic, sc'op nax winiquetic te ya yaq'uic ta nopel, te xchihe, xchi.

¹⁰Te Jesús la yic'ticlan tal ta stojol te ants-winiquetic, hich la yalbe: A'iya awa'iyic soc na'beyahic scuentahil:

¹¹Ma ba ya xjihnot te winic yu'un te bin ya x'och ta ye, ha ya xjihnot yu'un te bintic ya xloc' tal ta ye, xchi.

¹²Ha yu'un nohpojic tal ta stojol te jnopojeletic, hich la sjoc'obeyic: ¿La bal ana' te ma lecuc la ya'iyic te fariseohetic c'alal hich la ya'iyic? xchihic.

¹³La sjac' te Jesús: Spisil ts'unubiletic te ma ha'uc sts'unoj te Jtat ay ta ch'ulchan, ya me yich'ticlan bulel.

¹⁴Ac'a yil sbahic; ha'ic ts'o'sitetic te yac stojobtesbelic ts'o'sitetic; teme ts'o'sit nix te ya stojobtes ts'o'sit, pajal me ya xch'ayic cohel ta ch'en soc, xchi.

¹⁵La sjac' te Pedro: Hala ca'iycotic sc'oblal te sloc'ombahil c'op ini, xchi.

¹⁶La yal te Jesús: ¿Ha ni bal hichex te ma xana'beyic scuentahil?

¹⁷¿Ma bal yacuc ana'ic te spisil bintic ya x'och ta ehal ya xc'oht ta ch'uhtul, patil ya xloc' ta tsa'tayel?

¹⁸Yan te bin ya xloc' ta ehal ya xhahch tal ta o'tanil, ha me ya xjihnot yu'un te winique.

¹⁹Como ta o'tanil ya xloc' talel te bin chopol ta nopel, te milaw, antsiwej, chijil-o'tanil, elec', lehaw ta c'op soc te sbohlc'optayel Dios.

²⁰Ha'ic ini te ya xjihnotic yu'un te winique; pero ma ha'uc ya xjihnot yu'un teme ma ba spocoj sc'ab a ya xwe'e, xchi.

²¹Loc' bahel tey a te Jesús, baht ta sq'uinal Tiro soc Sidón.

²²Ay jtuhl Cananea-ants te tey hahchem talel a, tal yawtay te Jesús: ¡Cajwal, Snich'anat David, c'uxultayawon! Bayel yac ta uts'inel yu'un pucuj te cantsil-al, xchi.

²³Pero ma ba jac'bot sc'op yu'un te Jesús. Ha yu'un nohpoj tal te jnopojeletic yu'un, hich la yalbeyic: Ticona suhtel, yu'un yac ta aw ta jpatic, xchihic.

²⁴La sjac' te Jesús: Ha nax ticombilon tal ta stojol te ch'ayem tuminchijetic yu'un Israel, xchi.

²⁵Pero te ants tal squejan sba ta stojol, hich la yal: ¡Cajwal, coltayawon! xchi.

²⁶La sjac' te Jesús: Ma lecuc te ya yich' pojbeyel te pan yu'un te al-nich'aniletic yu'un ha ya yich' a'beyel swe'ic te bic'tal ts'i'etique xchi.

²⁷Pero la yal te antse: Melel, Cajwal; pero te bic'tal ts'i'etic ya swe'ic te xeht'elul we'elil ya xch'ay cohel ta ye'tal smesa te yajwalique, xchi.

²⁸Ha yu'un hich jac'bot yu'un te Jesús: ¡Ants, bayel sch'uhunel awo'tan! Ac'a c'ohtuc ta pasel te bin yac ac'ambel, xchi sc'oblal. Ha nix ta yorahil a lecub te yantsil-ale.

²⁹Hahch bahel tey a te Jesús, c'oht ta Mar yu'un Galilea; mo bahel ta wits, tey c'oht shuhcan sba a.

³⁰Bayel mach'atic talic ta stojol, la yic'ticlanic tal coxo'etic, ts'o'sitetic, uma'etic, nolc'abetic soc bayel yantic jchameletic, la ya'beyic ta ye'tal yoc te Jesús, te ha la slecubteslan.

³¹Te ants-winiquetic xcham yo'tanic yu'un te c'alal la yilic te c'opoj te uma'etic, lecub te nolc'abetic, behen te coxo'etic soc la yilic q'uinal te ts'o'sitetique. La yalbeyic bayel yutsil sc'oblal te Dios yu'un Israel.

³²Te Jesús la yic'ticlan tal te jnopojeletic yu'un, hich la yal: Ya jna'be yo'bolil sba te ants-winiquetic, como yoxebalix c'ahc'al a te sjoquinejonic, mayuc bin ya swe'ic; ma jc'an ya jticonlan bahel como ma ba we'emic, ya wan xlaj yipic ta be, xchi.

³³Ha yu'un la sjaq'uic te jnopojeletic yu'un: ¿Banti ya xhu' ya jtahcotic hich yipal pan li' ta jochol q'uinal yu'un ya xnoj sch'uhtic a te bayel ants-winiquetic? xchihic.

³⁴Halbotic yu'un te Jesús: ¿Jaypehch pan ay awu'unic? xchi. Hucpehch soc cha'oxcoht bic'tal chayetic, xchihic.

³⁵Te Jesús la spas ta mandar te ants-winiquetic te yacuc shuhcan sbahic ta lum.

³⁶La stsac te hucpehch pan soc te chayetic, la yalbe wocol Dios yu'un, la xet'ticlan soc la yac'ticlambe te jnopojeletic yu'un; te jnopojeletic la spucticlambeyic te ants-winiquetique.

³⁷We'ic spisilic, noj sch'uhtic; soc la stsobic te sobra te hile, huqueb moch noj a.

³⁸Ay lajunbahc' (4,000) ta tuhl winiquetic te we'ic, ma ba la yich' ahtayel te antsetic soc te alaletique.

³⁹C'alal laj sticombel bahel te ants-winiquetic, och ta barco, baht ta sq'uinal Magdala.