Read Tzeltal San Mateo 17 Bible Online

San Mateo 17 - Tzeltal bible

San Mateo 17

¹Waqueb c'ahc'al ta patil te Jesús la yic' bahel sjoquin te Pedro, Jacobo soc Juan te yihts'ine, la yic' bahel ta stuquelic ta jun toyol wits.

²Tey c'atp'uj ta stojolic, hich c'oht sit yelaw te bin ut'il sts'anabul c'ahc'al, soc xlipet sacal baht te sc'u' spaq'ue.

³Tey chicnaj la yilic a te Moisés soc Elías, yacalic ta c'op soc te Jesús.

⁴Ha yu'un te Pedro la yalbe te Jesús: Cajwal, lec te li' ayotique. Teme yac ac'an, ya jpascotic oxeb yaxna, jun awu'un, jun yu'un Moisés soc jun yu'un Elías, xchi.

⁵Yac to ta c'op a, hulic ta axintesel yu'un tocal te ay sts'anabul, soc chicnaj c'op ta tocal te hich la yal: Ha Jnich'an ini te c'ux ta co'tan, te bayel yutsil co'tan yu'un. A'iybeya awa'iyic sc'op, xchi la ya'iyic.

⁶C'alal hich la ya'iyic te jnopojeletic, la spahcan sbahic ta lum, bayel xiwic yu'un.

⁷Nohpoj tal te Jesús, la stijticlan, hich la yal: Hahchanic, ma xiwex, xchi sc'oblalic.

⁸C'alal la shach sitic, mayuc mach'a la yiliquix, ha xanix te Jesús.

⁹C'alal cohic talel ta wits, hich halbotic yu'un te Jesús: Ma me ayuc mach'a xawalbeyic te bin chicnaj la awilic, ha to te c'alal ya xcha'cuxaj tal te Nich'anil ay ta scuenta winic, xchi.

¹⁰Te jnopojeletic la sjoc'obeyic: ¿Bin yu'unix a hiche te ya yal te escribanohetic te ha nahil ya xtal te Elías? xchihic.

¹¹La sjac' te Jesús: Melel nix a te ha nahil ya xtal te Elías, ya xtal schahpan spisil stuquel.

¹²Pero ya calbeyex, xtaluquix te Elías, pero ma la sna'beyic sba, la spasbeyic spisil bintic la sc'an yo'tanic. Ha nix hich te Nich'anil ay ta scuenta winic ya me xc'ax swocol yu'unic, xchi.

¹³Hich la sna'ic te jnopojeletic te yac ta halbeyel sc'oblal te Juan te J'ac'-ich'-ha'.

¹⁴C'alal c'ohtic ta banti ay te bayel ants-winiquetic, tal jtuhl winic, la squejan sba ta stojol te Jesús, hich la yal:

¹⁵Cajwal, c'uxultaybon te jnich'an, ya xtup' yic' soc ay bayel swocol yu'un. Bayel buelta ya xch'ay ochel ta c'ahc' soc ta ha'.

¹⁶La jquiq'uix tal ta stojol te jnopojeletic awu'un, pero ma ba hu' yu'unic slecubtesel, xchi.

¹⁷La sjac' te Jesús: ¡Jcaj ts'umbalilex te mayuc sch'uhunel awo'tanic soc chopolex! ¿Jayeb xan c'ahc'al ya sc'an ya joquinex? ¿Jayeb xan c'ahc'al ya sc'an ya xcuhch cu'un ta atojolic? Ic'bonic tal te quereme, xchi.

¹⁸Ha yu'un te Jesús tulan la sc'opon te pucuj, hich loc' ta yo'tan te querem, ta hich ora lecub.

¹⁹C'alal stuquel xanix ay a te Jesús, joc'obot yu'un te jnopojeletic: ¿Bin yu'un te ma ba hu' cu'uncotic sloq'uesel te pucuje? xchihic.

²⁰Halbotic yu'un te Jesús: Ta scaj te mayuc lec sch'uhunel awo'tanic. Jamal ya calbeyex te hichuc smuc'ul sch'uhunel awo'tanic te bin ut'il jp'ij sbac' mostaza, ya xhu' yac awalbeyic ha'i wits ini: Jeltaya awawil, lum xbahate, teme yac awute, ya sjeltay yawil. Mayuc bin ma xhu' awu'unic spasel te hichuque, xchi.

²¹Pero te pucujetic te hich stalelic bin ut'il ini, ma xhu' ta loq'uesel ha to teme ya yich' c'oponel Dios soc scomel we'elil.[8]

²²C'alal c'ohtic ta Galilea, hich halbotic yu'un te Jesús: Te Nich'anil ay ta scuenta winic ya me x'ac'ot ta sc'ab winiquetic

²³soc ya me smilic, pero ta yoxebal c'ahc'al ya me xcha'cuxaj xan tal, xchi. Bayel la smel yo'tanic yu'un.

²⁴C'alal c'ohtic ta Capernaum talic ta stojol Pedro te mach'atic yac sc'ambelic te cheb dracma patanil, hich halbot yu'unic: ¿Ma bal yacuc yac' te cheb dracma patanil te maestro awu'unique? xchihic.

²⁵Yac, ya yac', xchi. C'alal och bahel ta na te Pedro, ha nahil halbot yu'un te Jesús: ¿Bin xchihat yu'un, Simón? Te ajwaliletic ta bahlumilal, ¿mach'atic a te ya sc'ambe spatanic, ha bal te yal-snich'nabic o ha bal te yantique? xchi.

²⁶Ha te yantique, xchi te Pedro. Hich halbot yu'un te Jesús: Ha yu'un mayuc ta c'ambeyel spatanic te yal-snich'anique.

²⁷Pero, scuenta yu'un ma ba ya xbohlob yo'tanic ta jtojoltic a, bahan ta mar, ch'oja ochel te alucbal-taq'uin, te jcoht chay yac atsac loq'uel, hawbeya ye, tey yac ata a jun estatero-taq'uin.[9] Ich'a bahel, a'beya, cheb cu'un, cheb awu'un, xchi.