Read Tzeltal San Mateo 19 Bible Online

San Mateo 19 - Tzeltal bible

San Mateo 19

¹C'alal laj yo'tan ta c'op te Jesús, loc' bahel ta Galilea, baht ta sq'uinal Judea ta jehch Jordán.

²T'unot bahel yu'un bayel ants-winiquetic, hich la slecubteslan tey a.

³Talic te fariseohetic ta stojol yu'un ya stsajic, hich la sjoc'obeyic: ¿Lec bal teme biluc nax scuentahil ya yihquitay yihnam te winique? xchihic.

⁴La sjac' te Jesús: ¿Yu'un bal mayuc awilojic ta Shun Dios te ta shahchibal Dios la spas jtuhl winic soc jtuhl ants,

⁵soc te hich la yal: Ha yu'un ya yihquitay sme'stat te winic, ya yic' sba soc te yihnam, junax sbaq'uetal ya xc'oht schebalic, te xchihe?

⁶Ha yu'un ma chebuquix, jun xanix baq'uet ya xc'oht. Ha yu'un te bin junax la yac' te Diose, ma me ayuc mach'a ya sjat, xchi.

⁷La sjoc'obeyic: ¿Bin yu'unix a hiche te la yal mandar te Moisés te ya spasbe shunal, hich ya sticon bahel? xchihic.

⁸Te Jesús la yalbe: Ta scaj te tulan awo'tanic te Moisés la ya'beyex permiso te yac awihquitayic te awihnamique; pero ma hichuc ay ta shahchibal.

⁹Ho'on ya calbeyex, spisil mach'a ya yihquitay hilel yihnam, teme ma ta scuentahuc yajmul, soc teme ya xnuhpun soc yan ants, yac me ta antsiwej a abi; soc te mach'a ya yic' yihnamin te ihquitaybil ants, ha nix hich yac ta antsiwej,[13] xchi.

¹⁰Hich halbot yu'un te jnopojeletic yu'une: Teme hich ay sc'oblal te yihnam soc te winique, ha lec te ma ba ya xnuhpunic, xchihic.

¹¹Halbotic yu'un te Jesús: Ma spisiluc ya xhu' ya yich'ic ha'i c'op ini, ha nax te mach'atic a'bibilic.

¹²Ay mach'atic te eunuco a te ya x'ayin, ay eunucohetic te hich pasbilic yu'un winiquetic, soc ay eunucohetic te hich la spas sbahic ta scaj te cuentahinel yu'un te ch'ulchan. Te mach'a ya xhu' yu'un te ya yich' ha'i c'op ini, ac'a yich', xchi.

¹³Ay ic'ot tal alaletic ta stojol Jesús yu'un yacuc scajanlambe sc'ab ta sjolic soc yu'un yacuc sc'opombe Dios; pero te jnopojeletic la scomic.

¹⁴Ha yu'un hich halbotic yu'un te Jesús: Ac'a taluc ta jtojol te alaletic, ma me xacomic, como ha yu'unic te cuentahinel yu'un te ch'ulchane, xchi.

¹⁵Hich la scajanlambe sc'ab ta sjolic, patil baht te Jesús.

¹⁶Ay mach'a tal sjoc'obe: Lequil maestrohat, ¿bin lec ya jpas scuenta yu'un ya jta jcuxlejal scuenta sbahtel q'uinal? xchi.

¹⁷Halbot yu'un te Jesús: ¿Bin yu'un te la awal te lecon ta winiquil? Mayuc mach'a lec, ha nax jtuhl, ha te Diose. Pero teme yac ac'an yac ata acuxlejal, pasa te bin ya yal te mandariletique, xchi.

¹⁸¿Bin mandariletiquil? xchi. La sjac' te Jesús: Ma me xawa'iy milaw; ma me xawa'iy antsiwej; ma me xawa'iy elec'; ma me xlehawanat ta c'op;

¹⁹ich'a ta muc' te atat soc anan; soc hich me c'ux yac awa'iy te apat-axuhc te bin ut'il c'ux yac awa'iy aba te ha'ate, xchi.

²⁰La sjac' te quereme: Ta jtutil to jcanantayej spisil ini. ¿Bin xan yan ya sc'an pasel cu'un a? xchi.

²¹Halbot yu'un te Jesús: Teme yac ac'an te mayuc bin ya spasat falta, bahan, chona hilel te bintic ay awu'un, q'uebembeya hilel te pobrehetic, hich me ay ac'uhlejal ta ch'ulchan; soc la', t'unawon, xchi.

²²Te querem, c'alal la ya'iy te c'op ini, ay ta mel-o'tan a loc' bahel, como bayel sc'uhlejal.

²³Ha yu'un te Jesús hich la yalbe te jnopojeletic yu'une: Jamal ya calbeyex, mero wocol ya x'och tey ta banti ay te cuentahinel yu'un te ch'ulchan te mach'a jc'uhlej.

²⁴Soc ya calbeyex xan, ha ma wocoluc ya sohl ta yoc aguja te camello, ha wocol ya x'och tey ta banti ay te cuentahinel yu'un Dios te jc'uhleje, xchi.

²⁵C'alal hich la ya'iyic te jnopojeletic, xcham yo'tanic yu'un, hich la yalic: ¿Mach'a ya xhu' ya xcol hiche? xchihic yu'un.

²⁶Ilticlambot sitic yu'un te Jesús, hich la yalbe: Te ants-winiquetic ma xhu' yu'unic spasel ini, pero te Dios spisil ya xhu' yu'un stuquel, xchi.

²⁷La sjac' te Pedro: Te ho'otcotic quihquitayejcotic hilel spisil soc jt'unojatcotic; ¿bin ya jtahcotic a? xchi.

²⁸Halbotic yu'un te Jesús: Jamal ya calbeyex, te c'alal ya yich' ach'ubtesel spisil, te c'alal ya xhuhcaj te Nich'anil ay ta scuenta winic ta smuc'ul-huctajib yu'un te yutsilal, ha'ex te at'unojonic ya me xhuhcajex ta lahchayeb (12) huctajibaletic yu'un yac achahpanic te lahchaychahp (12) sts'umbal Israel.

²⁹Mach'ayuc a te yihquitayej hilel sna, sbanquiltac, swixitac, yihts'inab, stat, snan, yihnam, yal-snich'nab o sq'uinal ta scuenta te jbihile, ho'winic (100) xan buelta ya x'a'bot, soc ya me yich' scuxlejalic sbahtel q'uinal.

³⁰Ay tsobol mach'atic te nahil ayic te slajibal ya xc'ohtic, soc te mach'atic patil ayic te nahil ya xc'ohtic.