Read Tzeltal San Mateo 20 Bible Online

San Mateo 20 - Tzeltal bible

San Mateo 20

¹Te cuentahinel yu'un te ch'ulchan hich c'ohem te bin ut'il jtuhl yajwal q'uinal te loc' bahel ta sab ta slehel j'a'teletic yu'un sts'usubil.

²La schap soc te j'a'teletic te jun denario ya stoj jun c'ahc'al, hich la sticonlan bahel ta sts'usubil.

³Ta yoxebal ora sacubel q'uinal a loc' xan bahel, ay yantic la yil ta plaza te mayuc ya'telic,

⁴hich la yalbe: Bahanic ta jts'usubil, ya ca'beyex te bin ut'il ay te tojele, xchi. Hich bahtic.

⁵Nopol sta ohlil c'ahc'al a soc nix ta oxeb ora suhtel c'ahc'al, hich nix la spas.

⁶Ta ho'eb ora suhtel c'ahc'al a loc' xan bahel, la yil yantic te mayuc ya'telic, hich la yalbe: ¿Bin yu'un sjunal c'ahc'al te li' ayex, te mayuc awa'telic? la yut.

⁷Yu'un mayuc mach'a la yic'otcotic ta a'tel, xchihic. Bahanic ta jts'usubil, ya me awich'ic te bin ut'il ay te tojele, xchi.

⁸C'alal mahlix c'ahc'al a, te yajwal te ts'usubil la yalbe te mayordomo yu'un: Ic'ticlana tal te j'a'teletic, tojbeya te ya'telic, ha nahil yac atoj te mach'atic patilix hahchic ta a'tel, ha patil te mach'atic nahil hahchic ta a'tel, xchi.

⁹C'alal talic te mach'atic bahtic ta ho'eb ora suhtel te c'ahc'ale, la yich'ic jujun denario jujutuhl.

¹⁰C'alal tal te mach'atic nahil hahchic ta a'tel, la scuyic te c'ax hich ya xtojotic a, pero ha nix hich jujun denario la yich'ic ta jujutuhl.

¹¹C'alal la yich'ic, hahchic wulajanel ta c'op ta scontrahinel te yajwal te q'uinal, hich la yalic:

¹²Te mach'atic patilix talic, junax ora a'tejic, pero pajal jtojolcotic soc ho'otcotic te cuhch cu'uncotic te a'tel soc te sc'uxul c'ahc'al, xchihic ta c'op.

¹³Te yajwal hich la yalbe te jtuhle: Amigo, mayuc bin ma stojiluc la jpasbat. ¿Ma bal lajuc jchaptic te ya jtojat jun denario?

¹⁴Ich'a te atojole, bahanix; ya jc'an te pajal ya ca'bat soc te mach'a patilix tale.

¹⁵¿Ma bal yacuc xhu' ya jpas te bin ya jc'an ya jpas soc te bintic ay cu'une? O ¿ay bal sbic'tal awo'tan yu'un te lec co'tan? la yut.

¹⁶Ha yu'un ha slajibal ya xc'ohtic te mach'atic nahil talic, soc ha nahil ya xc'ohtic te mach'atic patil talique. Como tsobol mach'atic ic'bilic, pero mayuc tsobol te tsahbilique,[14] xchi te Jesús.

¹⁷C'alal yac ta mohel bahel ta Jerusalén a te Jesús, parte la yic' bahel te lahchaytuhl jnopojeletic yu'un, hich la yalbe:

¹⁸Yacotic ta mohel ta Jerusalén, te Nich'anil ay ta scuenta winic ya x'ac'otix ta sc'ab te principal sacerdotehetic soc te escribanohetic, ya me yaq'uic ta milel.

¹⁹Ya ya'beyic ta sc'ab jyanlumetic yu'un ya slabanic, ya smajic soc ya smilic ta cruz; pero ta yoxebal c'ahc'al, ya me xcha'cuxaj, xchi.

²⁰Nohpoj tal te snan te snich'nab Zebedeo soc te yalatac, la squejan sba ta stojol Jesús, ay bin la sc'ambe.

²¹¿Bin yac ac'an? xchi te Jesús. Hala mandar te ta cuentahinel awu'un ya xhuhcaj te cheb calatac, jtuhl ta awa'el soc jtuhl ta aq'uexam, xchi te antse.

²²La sjac' te Jesús: Ma xana'ic bin yac ac'ambelic. ¿Ya bal xhu' awu'unic yuch'el te vaso te ho'on ya xbaht cuch', soc ya bal xcuhch awu'unic teme hich ya xc'oht ta acuentahic te bin ya xc'oht ta jcuenta te ho'one?[15] xchi sc'oblalic. Yac, ya xhu' cu'uncotic, xchihic.

²³Hich halbotic yu'un te Jesús: Melel nix a, ya me x'uch'ex ta vaso cu'un, soc ya me awich'ic te ha' te ya quich' te ho'one, pero ma ba ho'on ay ta jcuenta yaq'uel te mach'a ya shuhcan sba ta jwa'el soc ta jq'uexam, ha nax te mach'atic chapal yu'un te Jtate, xchi.

²⁴C'alal hich la ya'iyic te lajuntuhl xan, la yilintayic te cheb yermano sbahique.

²⁵Ha yu'un ic'otic tal yu'un te Jesús, hich halbotic yu'un: Ana'ojic te ajwaliletic yu'un te jyanlumetic ya yac' sbahic ta ich'el ta muc' stuquelic, soc te mach'atic tulan ya'telic ya yac' sbahic ta ch'uhumbeyel smandar yu'un te ay ya'telique.

²⁶Ma hichuc ay ta pasel ta awohlilic te ha'exe, te mach'a ya sc'an te muc' sc'oblal ya xc'oht ta awohlilic, ha me a'bat ya xc'oht ta atojolic,

²⁷soc te mach'a ya sc'an te primero ya xc'oht ta awohlilic, ha me a'bat ya xc'oht ta atojolic;

²⁸como te Nich'anil ay ta scuenta winic ma ba tal ta a'batinwanej, ha tal yac' sba ta a'batinel, soc tal yac' sba ta lajel scuenta yu'un ya xweht scolel bayelic, xchi.

²⁹C'alal loq'uic bahel ta Jericó, bayel mach'atic t'unot bahel yu'un.

³⁰Ay cheb ts'o'sitetic huculic ta ti'be, c'alal la ya'iyic te ha te Jesús te yac ta c'axel, hich la yawtayic: ¡Cajwal, Snich'anat David, c'uxultayawotcotic! xchihic ta aw.

³¹Comotic yu'un te mach'atic tey ayic a te yacuc sch'abic, pero tulan xan awonic: ¡Cajwal, Snich'anat David, c'uxultayawotcotic! xchihic.

³²La stehc'an sba te Jesús, la sticon ta iq'uel tal, hich la yalbeyic: ¿Bin yac ac'an ya jpasbeyex? xchi.

³³Cajwal, te yacuc xjahm te jsitcotique, xchihic.

³⁴Te Jesús la sna'be yo'bolil sbahic, la spicbe te sitic, hich la yilic q'uinal ta ora soc la st'unic bahel.