Read Tzeltal San Mateo 21 Bible Online

San Mateo 21 - Tzeltal bible

San Mateo 21

¹C'alal nopol ya xc'ohtiquix ta Jerusalén, te hulic ta Betfagé ta wits yu'un Olivohetic, te Jesús la sticon bahel cheb jnopojeletic yu'un,

²hich la yalbe bahel: Bahanic ta tut pueblo te chican ta ilel yac awilic, tey chucul ya xc'oht atahic jcoht burra a soc yal. Tilahic, ic'bonic tal.

³Teme ay mach'a ay bin ya yalbeyex, hich me xawalbeyic: Ha ya xtuhun yu'un te Cajwaltic, patil ya suht talel, xchihex me.

⁴Hich c'oht ta pasel scuenta yu'un ya xc'oht ta pasel te bin yaloj te jalwanej, te hich la yal:

⁵Halbeyahic te yantsil-nich'an Sión: Yac ta talel ta atojolic te Ajwalil awu'unic, ha manso soc cajal ta burra, cajal ta yal burra, ha yal j'ihcatsijel chambahlam, te xchihe.

⁶Hich bahtic te jnopojeletic, la spasic hich te bin ut'il halbotic yu'un te Jesús.

⁷La yiq'uic tal te burra soc te tut burro, la spacbeyic sempatin smuc'ul-c'u'uletic, tey cajaj a te Jesús.

⁸Te bayel ants-winiquetic la slimticlan smuc'ul-c'u'ic ta be; ay yantic te la sbojticlanic tal ya'binal te', la sji'ic bahel ta be.

⁹Te mach'atic nahil ayic soc te mach'atic patil ayic, hich yacalic ta yalel ta aw: ¡Hosana ta stojol te snich'an David! ¡Bayel yutsil te mach'a ya xtal ta scuenta sbihil te Cajwaltique! ¡Hosana ta toyol! xchihic ta aw.

¹⁰C'alal och bahel ta Jerusalén te Jesús, xjuyetic hahchel ta c'op yu'un spisil te pueblo, hich la yalic: ¿Mach'a a ini? xchihic yu'un.

¹¹Hich la yalic te ants-winiquetic: Ha te Jesús, te jalwanej te talem ta Nazaret ta sq'uinal Galilea, xchihic.

¹²Och bahel ta templo yu'un Dios te Jesús, la stenticlan loq'uel spisil te mach'atic yacalic ta chombajel soc ta mambajel ta Templo; la sbuchticlambe smesahic te jel-taq'uinetic soc la sbuchticlambe shuctajibic te mach'atic yacalic ta chon stsuhmut,

¹³hich la yal: Hich ts'ihbabil: Te Jna, ha snahul sc'oponel Dios ya xc'oht te sbihile, xchi, pero te ha'ex, la ac'atp'uniquix ta sch'en j'eleq'uetic, la yut.

¹⁴Tey ta Templo tal ts'o'sitetic soc coxo'etic ta stojol Jesús, la slecubteslan.

¹⁵Pero te principal sacerdotehetic soc te escribanohetic ilinic yu'un te c'alal la yilic te jchahp a'teliletic yac spasbel soc te hich yacalic ta aw ta Templo te alaletic: ¡Hosana ta stojol te Snich'an David! te xchihique.

¹⁶Hich la yalbeyic te Jesús: ¿Ya bal awa'iy te bin yac yalbelic te alaletic ini? xchihic. La jca'iy. ¿Ma bal ayuc awilojic ta hun: Ta ye alaletic soc chu'alaletic la awa'be yalic te bayel yutsil ac'oblal? xchi te Jesús.

¹⁷Tey la yihquitaylan hilel a, loc' bahel ta pueblo, baht ta Betania, tey c'oht ta wayel a.

¹⁸Ta sab, c'alal yac ta suhtel tal ta Jerusalén, ay swi'nal a.

¹⁹C'alal la yil jtehc' higuera ta ti'be, baht yil, pero mayuc sit la stahbe, ha nax ya'binal; hich la yalbe te te'e: Ma me jaymehl ya sitinat, la yut. Ora taquij te higuera.

²⁰C'alal la yilic te jnopojeletic, xcham yo'tanic yu'un, hich la yalic: ¿Bin ut'il ay a te ora taquij te higuera? xchihic.

²¹Halbotic yu'un te Jesús: Jamal ya calbeyex, te ayuc sch'uhunel awo'tanic, teme ma xchebetuc awo'tanic, ma ha'uc nax te hich yac apasbe te higuera-te', teme yac awalbeyic ha'i wits ini: Loc'an teye, ch'oja ochel aba ta mar, teme yac awutique, hich ni me ya xc'oht ta pasel a.

²²Spisil te bin yac ac'anic ta sc'oponel Dios, teme ya xch'uhun awo'tanic, ya me x'a'botex, xchi.

²³C'alal och bahel ta Templo te Jesús, yac ta p'ijubteswanej a, nohpojic tal te principal sacerdotehetic soc te mamaletic yu'un te pueblo, hich la sjoc'obeyic: ¿Bin awa'tel ta spasel ini? Soc ¿mach'a la ya'bat awa'tel? xchihic.

²⁴Halbotic yu'un te Jesús: Ha nix hich ay bin ya joc'obeyex, teme yac asutbonic, ha nix hichon ya calbeyex awa'iyic te bin ca'tel ta spasel ini.

²⁵Te ich'-ha' yu'un te Juan, ¿banti tal? ¿Talem bal ta ch'ulchan o ta stojol ants-winic? xchi. Hich talel c'axel la yalbe sbahic: Teme ya caltic: Talem ta ch'ulchan, teme xchihotic, ya me yalbotic: ¿Bin yu'unix ma ba la ach'uhunic hiche? ya me yutotic.

²⁶Teme ya caltic: Talem ta stojol ants-winic, teme xchihotic, ya jxi'tic te jlumaltic, como spisil sch'uhunejic te ha jalwanej te Juan, xchihic.

²⁷Ha yu'un hich la yalbeyic te Jesús: Ma jna'cotic, xchihic. Ha yu'un hich halbotic yu'un te Jesús: Ha nix hichon, ma ba ya calbeyex te bin ca'tel quich'oj ta spasel ini.

²⁸¿Bin xchihex yu'un ini? Ay jtuhl winic te ay cheb snich'nab, nohpoj tal, hich la yalbe te jtuhle: Jnich'an, bahan ta a'tel ta ts'unubil cu'un, xchi.

²⁹La sjac' te snich'an: Ma jc'an, xchi. Pero patil la suhtes yo'tan, baht ta a'tel.

³⁰Nohpoj tal ta stojol te yane, ha nix hich la yalbe; la sjac' te snich'an: Yacuc, jtat, ya xbohon, xchi, pero ma ba baht.

³¹Ta schebalic, ¿mach'a la spas te bin la sc'an yo'tan te state? xchi. La yalic: Ha te mach'a nahil la yalbe, xchihic. Halbotic yu'un te Jesús: Jamal ya calbeyex, te jc'an-patanetic soc te j'antsineletic ha nahil yacalic ta ochel awu'unic ta banti ay te cuentahinel yu'un te Diose;

³²como te Juan tal ta atojolic yu'un ya ya'beyex awilic te be yu'un te bin stojil ay ta pasel, pero ma ba la ach'uhunic, yan te jc'an-patanetic soc te j'antsineletic la sch'uhunic stuquelic. Pero te ha'exe, aunque la awilic, ma ba la asuhtes awo'tanic yu'un yac ach'uhunic.

³³A'iya me awa'iyic yan sloc'ombahil c'op: Ay jtuhl yajwal q'uinal te la sts'un sts'usubil, la sjoy ta corral, la shotbe spits'ojbil soc la spas toyol ilo-q'uinal yu'un, soc la yac' ta majanel yu'un j'a'teletic, baht ta namal stuquel.

³⁴C'alal nopol ya stahix yorahil ya xc'anub sit a, la sticon tal a'batetic yu'un ta stojol te j'a'teletic yu'un ya yich'be te site.

³⁵Pero te j'a'teletic la stsaquic te a'batetic, la smajic te jtuhle, ay yan la smilic, soc la sch'ojic ta ton te yane.

³⁶La scha'ticon xan yan a'batetic yu'un, c'ax hich a te bin ut'il ta nahil to; pero ha nix hich la spasbeyic.

³⁷Ta slajibal la sticon tal te snich'an, hich la yal: Ya yich'bonic ta cuenta stuquel te jnich'ane, xchi.

³⁸Pero te j'a'teletic c'alal la yilbeyic te snich'an, hich la yalbe sbahic: Ha ini te ya xbaht yich' te q'uinale. La'ic, jmiltic, hich ya quich'betic te sq'uinale, xchihic.

³⁹Hich la stsaquic, la sloq'uesic bahel ta spat scorralil te ts'usubil, tey c'oht smilic a.

⁴⁰Te c'alal ya suht tal te yajwal te ts'usubil, ¿bin ya spasbe te j'a'teletic? xchi te Jesús.

⁴¹La sjaq'uic: Mayuc sc'uxul yo'tan ya me slajin te mach'atic chopolic, ya me yac' ta majanel yu'un yantic j'a'teletic te ya ya'beyic stuquel te sit sts'usubil te c'alal ya sta yorahil, xchihic.

⁴²Hich joc'obotic yu'un te Jesús: ¿Ma bal awilojic ta Shun Dios: Te ton ch'ayot hilel yu'un te jpas-nahetic, ha sjol yich'o-ip[16] c'oht. Ha te Cajwaltic te hich la spas, bayel yutsil ya quiltic, te xchihe?

⁴³Ha yu'un ya calbeyex, ya me awich'ic pojbeyel ta atojolic te cuentahinel yu'un Dios, ha ya x'a'botic te mach'atic ya ya'beyic te site.

⁴⁴Te mach'a ya xyahl ta sba te ton ini, ya me xwuy, soc te mach'a ya xtenot yu'une, jc'axel juch'bil ya xhil yu'un, xchi te Jesús.

⁴⁵Te principal sacerdotehetic soc te fariseohetic, c'alal la ya'iyic te sloc'ombahil c'op, la sna'ic te ha sc'oblalic te bin la yale.

⁴⁶La snopic bin ya yut ya stsaquic, pero la xi'ic te slumalic, como sch'uhunejic te ha jalwanej te Jesús.