Read Tzeltal San Mateo 25 Bible Online

San Mateo 25 - Tzeltal bible

San Mateo 25

¹Ta hich ora te cuentahinel yu'un te ch'ulchan ha pajal soc lajuntuhl ach'ixetic te la yich'ic bahel yawil sc'ahq'uic, baht stahic tal te mach'a ya xnuhpun.

²Ho'tuhl ay sp'ijilic soc ho'tuhl mayuc sp'ijilic.

³Te jaytuhl te mayuc sp'ijilic la yich'ic bahel te yawil sc'ahq'uic pero ma ba la yich'ic bahel yan aceite.

⁴Yan te mach'atic ay sp'ijilic, la yich'ic bahel yawil sc'ahq'uic soc yan aceite ta yawil.

⁵Te bin ut'il ma ba tal ta ora te mach'a ya xnuhpun, spisilic hahchic ta nicobal, och swayelic.

⁶Ta ohlil ahc'abal ay chicnaj aw: ¡Tal me ix te mach'a ya xnuhpun! ¡La' me, tahahic bahel! xchi ta aw la ya'iyic.

⁷Hich hahch spisil te ach'ixetic, och schahpan yawil sc'ahq'uic.

⁸Te mach'atic mayuc sp'ijilic la yalbeyic te mach'atic ay sp'ijilic: A'botcotic jtebuc aceite awu'unic, como tup'elix te jc'ahc'cotic, xchihic.

⁹Pero te mach'atic ay sp'ijilic hich la sjaq'uic: Scuenta yu'un ma ba ya spasotcotic falta soc ni ha'uquex ya spasex falta, bahan, manahic tal ta banti yac ta chonel, la yutic.

¹⁰Pero c'alal bahemic ta smanel tal a, tal te mach'a ya xnuhpun. Te ach'ixetic te chapajtic la sjoquinic ochel te banti ya xc'oht te nuhpunel, soc la yich' maquel te ti'nahile.

¹¹Patil talic te yantic ach'ixetic, hich la yalic: ¡Cajwal, cajwal, jambotcotic te ti'nahil! xchihic.

¹²Pero la sjac': Jamal ya calbeyex te ma jna'beyex abahic, xchi sc'oblalic.

¹³Ha yu'un cuxuluc me awo'tanic, como ma na'biluc awu'unic bin orahil soc bin c'ahc'alil ya xtal te Nich'anil ay ta scuenta winic.

¹⁴Te cuentahinel yu'un te ch'ulchan hich c'ohem te bin ut'il jtuhl winic te la stsob te a'batetic yu'un, la ya'be scuentahinic te sbiluc, yu'un ya xbaht ta namal stuquel.

¹⁵Te jtuhl la ya'be ho'eb talento, te yane la ya'be cheb talento, te yane la ya'be jun talento, ha chican bin ut'il ya xhu' yu'unic scuentahinel jujutuhl; patil baht ta namal.

¹⁶Te mach'a a'bot ho'eb talento, ora baht spas ganar soc; ho'eb xan talento jolon yu'un.

¹⁷Ha nix hich te mach'a a'bot cheb talento, cheb xan talento jolon yu'un.

¹⁸Yan te mach'a a'bot jun talento baht smuc ta lum te staq'uin te yajwale.

¹⁹Bayel c'ahc'al ta patil suht tal te yajwalic, hul schahpan te cuentahatic soc te a'batetic yu'une.

²⁰Tal te mach'a a'bot ho'eb talento, la yich' tal ho'eb xan talento, hich c'oht yal: Cajwal, ho'eb talento la awa'bon jcuentahin, li' ay ho'eb xan sjol la jpas ganar a, xchi.

²¹Halbot yu'un te yajwal: Lec ay, lequil a'batat te jun awo'tan ta jtojol; jun awo'tan la acuentahin te bin jteb nax, ya ca'bat acuentahin bayel. La', ochan, mulana te utsilal yu'un te awajwal, xchi sc'oblal.

²²Soc tal te mach'a a'bot cheb talento, hich hul yal: Cajwal, cheb talento la awa'bon jcuentahin, li' ay cheb xan sjol la jpas ganar a, xchi.

²³Halbot yu'un te yajwal: Lec ay, lequil a'batat te jun awo'tan ta jtojol; jun awo'tan la acuentahin te bin jteb nax, ya ca'bat acuentahin bayel. La', ochan, mulana te utsilal yu'un te awajwal, xchi sc'oblal.

²⁴Ha nix hich tal te mach'a a'bot jun talento, hich hul yal: Cajwal, la jna' te tulan awo'tan, yac ac'aj te banti ma ba ats'unoj soc yac atsob te banti ma ba alihlinej;

²⁵ha yu'un xiwon, hich baht jmuc ta lum te talento awu'un, li' ay te bin awu'une, xchi.

²⁶Hich halbot yu'un te yajwal: Ma lequil a'batucat, ch'ajil a'batat; teme ana'oj te ya jc'aj te banti ma ba jts'unoj soc te ya jtsob te banti ma ba jlihlinej,

²⁷te lajuc awa'be te jtaq'uin te mach'atic ya x'a'tejic ta banco, scuenta yu'un te c'alal talon, ts'acal la jquich' soc sjol te jtaq'uin te hichuque.

²⁸Ha yu'un pojbeyahic te talento, a'beyahic te mach'a yich'oj te lajuneb talento;

²⁹como te mach'a ay bin ay yu'un ya me x'a'bot xan yan, hich bayel bintic ay yu'un; yan te mach'a mayuc bin ay yu'un, ya me xpojbot te bin ay to nix yu'une.

³⁰Ch'ojahic loq'uel ta yihc'al q'uinal te a'bat te ma xtuhune; tey ya xc'oht yoq'uetay sba soc tey ya xc'oht sc'uxuxan ye a, xchi te yajwale.

³¹C'alal ya xtal soc yutsilal te Nich'anil ay ta scuenta winic soc spisil te ch'ul a'batetic, ya shuhcan sba ta smuc'ul-huctajib ta utsilal,

³²soc ya me yich' tsobel tal ta stojol spisil te nacionetic, cha'chahp ya xloc' yu'un a, hich te bin ut'il ya spas te jcanan-tuminchij te parte ya yac' te tuminchijetic soc parte ya yac' te tentsunetique.

³³Ya me yac' ta swa'el te tuminchijetic soc ya me yac' ta sq'uexam te tentsunetique.

³⁴Te ajwalil hich me ya yalbe te mach'atic ayic ta swa'el: La'ic, ha'ex te a'botex bendición yu'un te Jtat, ich'ahic hilel te cuentahinel yu'un Dios te chahpambotex ta shachel to tal bahlumilal,

³⁵como te c'alal ayon ta wi'nal, la awa'bonic jwe'el; te c'alal ayon ta taquinti'il, la awa'bonic bin ya cuch'; te c'alal jbehyomalon, la awic'onic ochel ta anahic;

³⁶te c'alal mayuc jc'u' jpac' a, ay bin la awa'bonic jlap; te c'alal ayon ta chamel, c'oht awilonic; te c'alal ayon ta cárcel, c'oht awula'tayonic, xchi me sc'oblalic.

³⁷Ha yu'un hich me ya sjaq'uic te mach'atic toj yo'tanic: Cajwal, ¿bin ora la jquilatcotic te ayat ta wi'nal te la jca'batcotic awe'el, o te ayat ta taquinti'il te la jca'batcotic bin la awuch'?

³⁸¿Bin ora la jquilatcotic te jbehyomat te la jquic'atcotic ochel o te mayuc ac'u' apac' te la jca'batcotic?

³⁹¿Bin ora la jquilatcotic te ayat ta chamel o te ayat ta cárcel te c'oht quilatcotic? xchihic.

⁴⁰Ya me xjac'botic yu'un te Ajwalil: Jamal ya calbeyex, te bin ut'il hich la apasbeyic te jtuhl quermano te peq'uel ay, ho'on me la apasbonic abi, xchi me sc'oblalic.

⁴¹Soc hich me ya yalbe te mach'atic ayic ta q'uexam: Loc'anic ta jtojol, ha'ex te ma lecuc ac'oblalic, bahanic ta c'ahc' te sbahtel q'uinal ay, te chahpambil yu'un te pucuj soc te a'batetic yu'une,

⁴²como te c'alal ayon ta wi'nal, ma ba la awa'bonic jwe'el; c'alal ayon ta taquinti'il, ma ba la awa'bonic bin la jcuch';

⁴³c'alal jbehyomalon, ma ba la awotseson ta anahic; c'alal mayuc jc'u' jpac', mayuc bin la awa'bonic jlap; c'alal ayon ta chamel soc ayon ta cárcel, ma ba c'oht awilonic, xchi me sc'oblalic.

⁴⁴Pero hich me ya sjaq'uic: Cajwal ¿bin ora la jquilatcotic te ayat ta awi'nal, ta taquinti'il, te jbehyomat, te mayuc ac'u' apac', te ayat ta chamel o te ayat ta cárcel, te ma ba la jcoltayatcotic? xchihic.

⁴⁵Hich me ya xhalbotic: Jamal ya calbeyex, te bin ut'il ma ba la apasbe te mach'a mero peq'uel ay, ho'on ma ba la apasbonic abi, xchi me sc'oblalic.

⁴⁶Ha'ic ya xbahtic ta castigo sbahtel q'uinal, yan te mach'a toj yo'tanic ya xbahtic ta cuxlejal sbahtel q'uinal, xchi te Jesús.