Read Tzeltal San Mateo 27 Bible Online

San Mateo 27 - Tzeltal bible

San Mateo 27

¹C'alal sacub q'uinal, spisil te principal sacerdotehetic soc te mamaletic yu'un te pueblo la schapbeyic sc'oblal te Jesús yu'un ya yaq'uic ta lajel.

²Chucul a la yiq'uic bahel, c'oht ya'beyic ta sc'ab te gobernador Poncio Pilato.

³Hich te Judas, te ac'awan ta c'abal, c'alal la yil te chapalix sc'oblal ta milel te Jesús, la sut sc'op, baht sutbe hilel te lajuneb scha'winic (30) ta sehp plata te a'bot yu'un te principal sacerdotehetic soc te mamaletic,

⁴hich c'oht yal: La jta jmul yu'un la jcac' ta c'abal te Mach'a mayuc smul, xchi. Pero la yalbeyic: ¿Bin cochelcotic a te ho'otcotique? ¡Ila aba atuquel! la yutic.

⁵Ha yu'un la sch'oj hilel ta Templo te lajuneb scha'winic (30) ta sehp plata, loc' bahel soc baht sjihpan sba ta te'.

⁶Te principal sacerdotehetic la stamic te lajuneb scha'winic (30) ta sehp plata, hich la yalic: Ma xpas te ya x'och ta yawil smahtan Dios ha'i taq'uin ini, como ha stojol ch'ich', xchihic.

⁷C'alal la syom sc'opic, la smambeyic sq'uinal a te jpac'ojom scuenta yawil smuquenal jyanlumetic.

⁸Ha scuentahil te Sq'uinal Ch'ich' sbihil te q'uinal c'alal ora.

⁹Hich c'oht ta pasel te bin la yal te jalwanej Jeremías, te hich la yal: La yich'ic te lajuneb scha'winic (30) ta sehp plata, ha te stojol chahpambil yu'un te snich'nab Israel,

¹⁰la stojic a te sq'uinal jpac'ojom, hich te bin ut'il la spason ta mandar te Cajwaltic, te xchihe.

¹¹Teq'uel ta stojol gobernador te Jesús, hich joc'obot yu'un: ¿Ha'at bal te Ajwalilat yu'un te judíohetique? xchi sc'oblal. Ha'at nix yac awal, xchi te Jesús.

¹²C'alal lehbot smul yu'un te principal sacerdotehetic soc te mamaletic, mayuc bin la sjac'.

¹³Ha yu'un hich halbot yu'un te Pilato: ¿Ma bal ba yac awa'iy te jayeb amul yac yalbelic ta acontra? xchi.

¹⁴Pero te Jesús ma ba la sjac' jp'ahluc. Xcham yo'tan yu'un te gobernador.

¹⁵Ta yorahil q'uin te gobernador c'ahyem ya scoltay bahel ta stojol te pueblo jtuhl jchuquel, ha chican mach'a ya sc'anic te ants-winiquetique.

¹⁶Ha yorahil a ay jtuhl jchuquel yu'unic te puhquem sc'oblal, Barrabás sbihil.

¹⁷Te c'alal stsobojix sbahic a te ants-winiquetic, hich joc'obotic yu'un te Pilato: ¿Mach'a yac ac'anic te ya jcoltaybeyex bahel, ha bal te Barrabás o ha bal te Jesús, te Cristo sbihil? xchi.

¹⁸Como sna'oj te ta scaj yil-o'tantaybelic te la yaq'uic ta c'abal.

¹⁹Te c'alal hucul ta chahpajibal te Pilato, ticombot ta halbeyel yu'un te yihnam: Ma me ayuc bin xapasbe te mach'a toj yo'tan, como te naxe c'ax bayel jwocol la jca'iy ta jwayich ta scuenta te winique, xchi.

²⁰Pero te principal sacerdotehetic soc mamaletic la ya'beyic te ya xc'oht ta yo'tanic te ants-winiquetic te ha'uc ya sc'ambeyic scoltayel te Barrabás soc ha'uc ya xlaj te Jesús.

²¹La sjac' te gobernador: Ta schebalic, ¿mach'a yac ac'anic te ya jcoltaybeyex bahel? xchi. Ha te Barrabás, xchihic.

²²Joc'obotic yu'un te Pilato: ¿Bin ya jpasbe te Jesús, te Cristo sbihil? xchi. Spisilic la sjaq'uic: ¡Ac'a yich' milel ta cruz! xchihic.

²³La yal te gobernador: ¿Bin smul stahoj? xchi. Pero tulan xan hahchic ta aw: ¡Ac'a yich' milel ta cruz! xchihic.

²⁴C'alal la yil te Pilato te mayuc bin ya xchapaj, te yac ta behbe tohyel sc'opic, la yich' tal ha', la spoc sc'ab ta stojol te ants-winiquetic, hich la yal: Te ho'one ma ba ya jmulimbe sch'ich'el te winic ini. Ila me abahic atuquelic, xchi.

²⁵Hich la sjac' spisil te pueblo: Ac'a c'ohtuc ta jtojolcotic soc ta stojol te cal-jnich'ancotic te sch'ich'ele, xchihic.

²⁶Hich te Pilato la scoltay bahel te Barrabás, soc la yac' ta majel te Jesús, patil la yac' te ya xlaj ta milel ta cruz.

²⁷Hich te soldadohetic yu'un te gobernador la yiq'uic bahel ta palacio te Jesús, schahpal te soldadohetic la stsob sbahic tal ta sjoyobal.

²⁸La swahtanic, la ya'beyic slap tsajal muc'ul-c'u'ul;

²⁹la ya'beyic scoronahin jalbil ch'ix ta sjol soc la ya'beyic stsac jalal ta swa'el-c'ab; la squejan sbahic ta stojol, la slabanic, hich la yalic: ¡Ha'at, Ajwalilat yu'un judíohetic! xchihic.

³⁰La stuhbataybeyic sit yelaw te Jesús, la spojbeyic te jalal, la smajulambeyic ta sjol.

³¹C'alal laj yo'tanic ta slabanel, la sloq'uesbeyic te muc'ul-c'u'ul, la ya'beyic slap te sc'u' spac', la yiq'uic bahel smilic ta cruz.

³²Yacalic ta loq'uel bahel a, la stahic jtuhl winic, Simón sbihil, talem ta Cirene; la sujic ta sq'uechbeyel bahel te cruz yu'un te Jesuse.

³³C'alal c'ohtic ta Gólgota sbihil te lugar, (yawil Baqueljolal, xchi te c'asesbile),

³⁴la ya'beyic yuch' vinagre capal ta bin ch'a, pero la nax sts'ub ya'iy, ma ba la sc'an la yuch'.

³⁵Te c'alal jipilix ta cruz yu'unic a, la spuc sbahic te sc'u' spac', la spasbeyic seña ta na'el te mach'a ya xc'oht ta scuenta, scuenta yu'un hich ya xc'oht ta pasel a te bin yaloj te jalwanej: La spuc sbahic a te jc'u' jpac', la spasic seña ta na'el ta scuenta te jc'u', te xchihe.

³⁶Tey la shuhcan sbahic ta scanantayel a.

³⁷La ya'beyic ta yahc'olal sjol te ts'ihbabil te bin smulinej: HA JESÚS INI, TE AJWALIL YU'UN JUDÍOHETIC, xchi.

³⁸Ay cheb j'eleq'uetic la ya'beyic sjoquin ta milel ta cruz, jtuhl ta swa'el, jtuhl ta sq'uexam.

³⁹Te mach'atic c'axic tey a la slabanic, la sjimulan sjolic ta slabanel,

⁴⁰hich la yalic: Ha'at te yac ajin te Templo, te ta oxeb c'ahc'al yac acha'pas xan, coltaya aba quiltic. Teme ha'at Snich'anat Dios, cohan tal ta cruz, xchihic.

⁴¹Ha nix hich te principal sacerdotehetic, escribanohetic, fariseohetic soc te mamaletic la slabanic, hich la yalic:

⁴²La scoltaylan yantic, laj'a ma xhu' ya scoltay sba stuquel. Teme ha te Ajwalil yu'un Israel, ac'a cohuc tal ta cruz, hich ya jch'uhuntic a.

⁴³La smuc'ulin yo'tan te Diose, ac'a coltayec yu'un teme ya sc'ane, como yaloj te ho'on Snich'anon Dios, xchihic.

⁴⁴Ha nix hich te j'eleq'uetic te pajal jipilic ta cruz soc, la slabanic.

⁴⁵Ohlil c'ahc'al a, ihc'ub q'uinal ta spisil te q'uinal, ha to c'alal ta oxeb ora suhtel c'ahc'al.

⁴⁶Nopol sta oxeb ora suhtel c'ahc'al a, tulan awon te Jesús: Elí, Elí, ¿lama sabactani? xchi. (Dios cu'un, Dios cu'un, ¿bin yu'un apihtesejon? xchi te c'asesbile.)

⁴⁷Ay mach'atic tec'ajtic tey a, c'alal hich la ya'iyic, la yalic: Ha yac yic'bel te Elías, xchihic.

⁴⁸Ay jtuhl tey a te ahnimal baht yich' tal jun esponja, la smul ta vinagre, la scahts'an ta ni'jalal, la ya'be sts'u'ts'uy te Jesús.

⁴⁹Pero la yal te yantique: Teyuc a, ya jmahliy quiltic teme ya xtal ta coltayel yu'un te Elías, xchihic.

⁵⁰Pero c'alal tulan awon yan buelta te Jesús, la yac' loc'uc sch'uhlel.

⁵¹Ta hich ora jats ta ohlil te pac' tsalbil a te Templo, hahch tal ta jatsel ta toyol, loc' ta yoc; nihc te q'uinal, top' te muc'ul tonetic;

⁵²jahm te muquenaletic soc cuxaj sbaq'uetal tsobol mach'atic ch'uhltesbilic te wayem sbaq'uetalic;

⁵³soc te c'alal cha'cuxaj te Jesús, loq'uic tal ta muquenaletic, ochic bahel ta ch'ul pueblo, la yac' sbahic ta ilel ta stojol tsobolic.

⁵⁴Te capitán-soldado soc te mach'atic sjoquinejic ta scanantayel te Jesús, c'alal la yilic te nihquel soc te bin c'oht ta pasel, bayel xiw yo'tanic yu'un, hich la yalic: ¡Ta mero melel ha Snich'an Dios ini! xchihic.

⁵⁵Ay tsobol antsetic tey a te yac yilbelic ta namal, ha te mach'atic la st'unic tal te Jesús c'alal Galilea soc te la yac' sbahic ta a'batinel yu'une.

⁵⁶Tey ayic a te María Magdalena, María te snan Jacobo soc José, soc te snan te snich'nab Zebedeo.

⁵⁷Ma to xmahl c'ahc'al a, tal jtuhl c'uhlej winic te talem ta Arimatea, José sbihil, te ha nix jnopojel yu'un Jesús;

⁵⁸baht ta stojol te Pilato, la sc'ambe te sbaq'uetal te Jesús. Hich te Pilato la yal mandar te yacuc x'a'bot yich'be bahel te sbaq'uetal.

⁵⁹Hich te José la yich'be bahel te sbaq'uetal Jesús, la spotsbe ta lequil sábana,

⁶⁰la xahch'an ta ach' muquenal yu'un, te yac'oj ta hotel ton; la sbalch'umbe hilel muc'ul ton yu'un ya smacbe sti'il a te muquenal, hich baht.

⁶¹Tey huhcajtic a te María Magdalena soc te yan María ta stojol te muquenale.

⁶²Ta schebal c'ahc'al, ha te c'axemix yorahil a te ya schahpanic te q'uine, la stsob sbahic te principal sacerdotehetic soc te fariseohetic ta stojol Pilato,

⁶³hich la yalic: Cajwal, ya jna'cotic te hich la yal te jlo'loywanej te c'alal cuxul to a: Ta yoxebal c'ahc'al ya xcha'cuxajon, xchi.

⁶⁴Ha yu'un pasa ta mandar te yacuc yich' canantayel te muquenal ha to c'alal ta oxeb c'ahc'al, teme repente ya xtal ta ahc'abal te jnopojeletic yu'un, ya yelc'ambeyic bahel te sbaq'uetal soc ya yalbeyic te pueblo te cha'cuxajix tal. C'ax hich chopol ya xc'oht a te lo'loyel te bin ut'il ta nahil to, xchihic.

⁶⁵Halbotic yu'un te Pilato: Li' ay jcananetic, bahan, macahic ta lec te muquenal, la yut.

⁶⁶Hich bahtic, la smaquic ta lec te muquenal, la ya'beyic sello te ton soc la yaq'uic hilel jcananetic tey a.