Read Tzeltal San Mateo 4 Bible Online

San Mateo 4 - Tzeltal bible

San Mateo 4

¹Te Jesús ic'ot bahel yu'un te Espíritu ta jochol taquin q'uinal scuenta yu'un tey ya xbaht ta tsajel yu'un a te pucuje.

²Ta patil te la scom swe'el cha'winic (40) c'ahc'al soc cha'winic ahc'abal, wi'naj.

³Tal ta stojol te jlo'loywanej, hich halbot yu'un: Teme ha'at Snich'anat Dios, hala te yacuc xc'atp'uj ta pan te tonetic ini, xchi.

⁴La sjac' te Jesús: Hich ts'ihbabil: Ma ha'uc nax ya xcuxaj ants-winic yu'un te pan, ha ya xcuxaj yu'un spisil te c'op ya xloc' ta ye te Diose, la yut.

⁵Patil te pucuj la yic' bahel ta ch'ul muc'ul pueblo te Jesús, c'oht stehc'an ta jol templo,

⁶hich la yalbe: Teme ha'at Snich'anat Dios, ch'oja cohel aba, como hich ts'ihbabil: Ya spas ta mandar te ch'ul a'batetic yu'un te ya me scanantayat, ya slat'at ta sc'abic, scuenta yu'un ma ba yac alajin awoc ta ton a, xchi.

⁷La sjac' te Jesús: Ha nix hich ts'ihbabil: Ma me xatsaj te Cajwaltic te Dios awu'une, la yut.

⁸Yan buelta cha'ic'ot xan bahel yu'un te pucuj ta toyol wits, la ya'be yil spisil ta chahp nacionetic ayic ta bahlumilal soc te yutsilalic,

⁹hich halbot yu'un: Spisil ya ca'bat ini teme yac aquejan aba ta jtojol soc teme yac ach'uhuntayone, xchi.

¹⁰La yal te Jesús: Loc'an, Satanás, como hich ts'ihbabil: Ha nax me xach'uhuntay soc ha nax me xawac' aba ta a'batinel yu'un te Cajwaltic te Dios awu'un, la yut.

¹¹Hich ihquitayot yu'un te pucuje, tal te ch'ul a'batetic, ha la yac' sbahic ta a'batinel yu'un.

¹²C'alal la ya'iy Jesús te ay ta cárcel te Juan, suht bahel ta Galilea.

¹³La yihquitay hilel te Nazaret, baht ta nahinel ta Capernaum ay ta ti'mar yu'un Galilea, te ay ta sq'uinal Zabulón soc Neftalí,

¹⁴scuenta yu'un ya xc'oht ta pasel a te bin la yal te jalwanej Isaías:

¹⁵¡Sq'uinal Zabulón soc sq'uinal Neftalí, ta sbehlal mar, ta jehch Jordán, Galilea yu'un te jyanlumetic!

¹⁶Te mach'atic ayic ta yihc'al q'uinal la yilic muc'ul sacal q'uinal, te mach'atic ayic ta yaxinal lajel, sacub q'uinal ta stojolic, te xchihe.

¹⁷Ta hich ora hahch ta yalel sc'op Dios te Jesús, hich la yal: Suhtesa awo'tanic, como nopolix yorahil te cuentahinel yu'un te ch'ulchane, xchi.

¹⁸Yac ta behel ta ti'mar yu'un Galilea a te Jesús, la yil cheb winiquetic te yermano sbahic, ha te Simón, te Pedro yan sbihil, soc Andrés te yihts'in, yac yotsesbelic ta mar te stsaco-chayic, como jtsac-chayetic.

¹⁹Hich la yalbe: La', t'unawonic, ya caq'uex ta jtsob-ants-winiquetic, xchi sc'oblalic.

²⁰Ora la yihquitayic hilel te stsaco-chayic, la st'unic bahel.

²¹Sohl xan bahel tey a, la yil cheb xan winiquetic te yermano sbahic, ha te Jacobo soc Juan te yihts'in, ha snich'nab Zebedeo. Ha sjoquic ta barco te Zebedeo te static, yac sts'acticlambel te stsaco-chayique; ic'otic yu'un te Jesús.

²²Ora la yihquitayic hilel te barco soc te statique, la st'unic bahel te Jesús.

²³La yocliy spisil sq'uinal Galilea te Jesús, yac ta nohpteswanej ta sinagogahetic yu'unic soc yac ta yalel te lec yach'il c'op yu'un te cuentahinel yu'un Dios, soc yac ta slecubtesel spisil chamel soc banti c'ux ya ya'iyic te ants-winiquetique.

²⁴Puhc sc'oblal ta spisil sq'uinal Siria; la yiq'uic tal ta stojol spisil mach'atic ay banti c'ux ya ya'iyic soc te yich'ojic bayel ta chahp chamel soc te bayel swocolic, soc te mach'atic ay pucuj ta yo'tanic, te mach'atic ya xtup' yiq'uic, soc mach'atic chamen schihalic; la slecubteslan te Jesús.

²⁵T'unot bahel yu'un tsobol ants-winiquetic ta Galilea, Decápolis, Jerusalén, Judea soc ta jehch Jordán.