Read Tzeltal San Mateo 6 Bible Online

San Mateo 6 - Tzeltal bible

San Mateo 6

¹Tsahtaya me abahic bin ut'il yac apasic bintic stojil ta pasel ta stojol ants-winiquetic scuenta yu'un ya yilat. Teme hich yac apasic, mayuc amahtanic ya x'a'botex yu'un te Atatic ay ta ch'ulchan.

²C'alal yac aq'ueben ataq'uin, ma me nahiluc xawac' ta oq'uesinel corneta ta atojol, hich te bin ut'il ya spasic ta sinagogahetic soc ta callehetic te jchebal-o'tanetic scuenta yu'un ya xhalbot lec sc'oblalic yu'un ants-winiquetic. Jamal ya calbeyex, yich'ojiquix te smahtanique.

³Yan te ha'ate, c'alal yac aq'ueben ataq'uin ma me xawa'be sna' te aq'uexam-c'ab te bin ya spas te awa'el-c'ab,

⁴scuenta yu'un muquen ay te bin yac aq'uebene. Te Atat te ya yil te bin muquen yac apas, ya ya'bat amahtan ta comonsitil.

⁵Te c'alal yac ac'oponic Dios, ma me hichuc xapasic te bin ut'il ya spasic te jchebal-o'tanetic, como ha ya smulanic te ya stehc'an sbahic ta sc'oponel Dios ta sinagogahetic soc ta jujun xuhc calle scuenta yu'un ya x'ilotic yu'un ants-winiquetic. Jamal ya calbeyex te yich'ojiquix te smahtanique.

⁶Yan te ha'ate, c'alal yac ac'opon Dios, ochan ta yutil ana, maca te ti'nahil soc c'opona te Atat te ma chicanuc ta ilele. Te Atat te ya yil te bin muquen yac apas, ya ya'bat amahtan ta comonsitil.

⁷Te c'alal yac ac'oponic Dios, ma me xawalulan c'opetic te mayuc sc'oblal, hich te bin ut'il ya spasic te jyanlumetic, te scuyojic te ya x'a'iybot sc'opic ta scuenta bayel ya xc'opojic.

⁸Ma me hichuc xapasic te bin ut'il ya spasique, como te Atatic sna'ojix te bin ya xtuhun awu'unic te c'alal ma to ba ac'ambeyejic a.

⁹Te ha'exe, hich me xac'oponic te Diose: Jtatic te ayat ta ch'ulchan, ac'a ich'otuc ta muc' ach'ul bihil.

¹⁰Ac'a taluc te cuentahinel awu'un; ac'a yich' pasel ta bahlumilal te bin ya sc'an awo'tan, hich te bin ut'il yac ta pasel ta ch'ulchan.

¹¹A'botcotic jwe'elcotic yo'tic scuenta jujun c'ahc'al.

¹²Pasbotcotic perdón yu'un jmulcotic, hich te bin ut'il ya jpasbecotic perdón te mach'atic ay smulic ta jtojolcotic.

¹³Ma me xawac'otcotic ta sujel ta mulil, ac'awotcotic ta libre yu'un te bin chopol, como ha'at awu'un te cuentahinwanej, te ay awu'el soc awutsilal sbahtel q'uinal. Hichuc.[4]

¹⁴Como teme yac apasbeyic perdón te mach'atic ay smulic ta atojolic, ha nix hich ya spasbeyex perdón te Atatic ay ta ch'ulchan.

¹⁵Pero teme ma ba yac apasbeyic perdón te mach'atic ay smulic ta atojolic, ha nix hich ma ba ya spasbeyex perdón yu'un amulic te Atatique.

¹⁶Te c'alal yac acom awe'elic, ma me xawac' ta ilel mel-o'tan ta asit awelaw, hich te bin ut'il te jchebal-o'tanetique. Como ya syanijtes sit yelawic scuenta yu'un ya ya'be yilic ants-winiquetic te scomoj swe'elique. Jamal ya calbeyex, yich'ojiquix te smahtanique.

¹⁷Yan te ha'ate, te c'alal yac acom awe'el, poca asit soc tesa ajol,

¹⁸scuenta yu'un ma ba yac awa'be yilic te ants-winiquetic te acomoj awe'ele, ha nax ya yil te Atat te ma ba chican ta ilele. Te Atat te ya yil te bin muquen yac apas, ya ya'bat amahtan ta comonsitil.

¹⁹Ma me xatsob ac'uhlejalic ta bahlumilal te banti ya xjoch'ob soc ya xchuxub, soc ta banti ya x'och j'eleq'uetic.

²⁰Ha me xatsob ac'uhlejalic ta ch'ulchan te banti ma xjoch'ob soc ma xchuxub, soc te banti ma x'och j'eleq'uetic.

²¹Como te banti ay ac'uhlejalic, tey ay a te awo'tanique.

²²Te asit ha ya yac' sacubuc q'uinal ta abaq'uetal. Ha yu'un teme lec te asite, ay ta sacal q'uinal scohtol abaq'uetal.

²³Yan teme ma lecuc te asite, scohtol abaq'uetal ay ta yihc'al q'uinal. Ha yu'un teme ha yihc'al q'uinal te sacal q'uinal awu'une, c'ax ihc' ya xc'oht te yihc'al q'uinal abi.

²⁴Mayuc mach'a ya xhu' ya yac' sba ta a'batinel yu'un cheb ajwaliletic; como ya me yihlay te jtuhle soc c'ux ta yo'tan te yane, o jun yo'tan ta stojol te jtuhle, soc ya sp'aj te yane. Ha nix hich, ma xhu' yac awac' abahic ta a'batinel yu'un Dios soc yu'un te c'uhlejalile.

²⁵Ha yu'un ya calbeyex, ma me ha'uc xbaht ta awo'tanic sna'el bin ut'il ya xcuxajex, bin yac awe'ic soc bin yac awuch'ic; o bin ut'il ay abaq'uetalic, ha te bin yac alapique. ¿Ma bal c'axuc hich sc'oblal acuxlejalic a te bin ut'il te we'elil, soc ma bal c'axuc hich sc'oblal abaq'uetal a te bin ut'il te ac'u' apaq'uique?

²⁶Ilawil te mutetic ya xwihlic ta toyol, ma ba ya ya'iyic awal, ma ba ya ya'iyic c'ajoj soc ma ba ya stsobic ta yawil; pero ha mac'limbilic yu'un te Atatic ay ta ch'ulchan. ¿Ma bal c'axuc to xan hich ac'oblalic a te bin ut'il te mutetique?

²⁷¿Mach'ahex a te ya xhu' awu'unic te yac anahtubtes aba junuc jxuhc'ubil ta scuenta bayel bintic ya xbaht ta awo'tanic sna'ulanel?

²⁸Soc ¿bin yu'un ha ya xbaht ta awo'tanic sna'ulanel ac'u' apaq'uic? Ilawil bin ut'il ya xcol te nichimetic ta ha'mal, ma ba ya x'a'tejic soc ma ba ya ya'iyic jalab;

²⁹pero ya calbeyex, spisil te yutsilal te Salomón ma ba la sta hich yutsil sc'u' spac' a te bin ut'il junuc te nichime.

³⁰Teme hich a'bot sc'u'in yu'un Dios te ha'mal te junax c'ahc'al cuxul soc ta yan c'ahc'al ya yich'ix chiq'uel a, ¿ma bal c'axuc to xan hich ya spasbeyex a, ha'ex te mayuc lec sch'uhunel awo'tanique?

³¹Ma me xbaht ta awo'tanic sna'el, te hich yac awalic: ¿Bin ya jwe'tic, bin ya cuch'tic, o bin ya jlaptiquix a? ma me xchihuquex,

³²como ha ya slehic spisil ini te jyanlumetique, pero te Atatic te ay ta ch'ulchan sna'oj te ya xtuhun awu'unic spisil ini.

³³Ha nahil xalehic te cuentahinel yu'un Dios soc te bin stojil ta pasel yu'un, hich me ya x'a'botex spisil a ini.

³⁴Ha yu'un ma me ha'uc ya xbaht ta awo'tanic sna'el te pajele, como te pajel, ha ya yil sba stuquel. Tic'uc a te wocol ta jujun c'ahc'al.