Read Tzeltal San Mateo 9 Bible Online

San Mateo 9 - Tzeltal bible

San Mateo 9

¹Ha yu'un och ta barco te Jesús, c'ax bahel ta jehch ha', tal ta slumal.

²Ay tal sq'uechbelic jtuhl winic te chamen schihal yoc sc'ab, metsel ta schahchamte'el. C'alal la yil te Jesús te ay sch'uhunel yo'tanic, hich la yalbe te mach'a chamen schihal yoc sc'ab: Ayuc me smuc'ul awo'tan, jnich'an. Ch'aybilix amul, xchi.

³Ay escribanohetic te hich la yal ta yo'tanic: Yac sbohlc'optaybel Dios ha'i winic ini, xchihic.

⁴Na'bot yo'tanic yu'un te Jesús, hich la yalbe: ¿Bin yu'un chopol bin yac awalbel ta awo'tanic?

⁵¿Banti ma ba wocol ta halel yac awa'iyic: Ha bal te ch'aybilix amul, o: Hahchan, behenan, teme xchihe?

⁶Scuenta yu'un hich yac ana'ic a te ha yich'oj ya'tel ta sch'ayel mulil ta bahlumilal te Nich'anil ay ta scuenta winic, hich la yalbe te mach'a chamen schihal yoc sc'ab: Hahchan, q'uecha bahel te achahchamte'el, bahan ta ana, xchi.

⁷Hich hahch te winic, baht ta sna.

⁸C'alal la yilic te ants-winiquetic te bin c'oht ta pasel, xcham yo'tanic yu'un soc la yalbeyic yutsil sc'oblal Dios yu'un te ya'beyej yich' yip ya'tel ta stojol te winiquetique.

⁹Sohl xan bahel te Jesús, la yil jtuhl winic, Mateo sbihil, hucul ta banti ya yich' tojel patanil, hich la yalbe: T'unawon, xchi. Hich hahch, la st'un bahel te Jesuse.

¹⁰Te c'alal c'oht shuhcan sba ta we'el ta na te Jesús, tsobol jc'an-patanetic soc yantic jmulawiletic te talemic, pajal c'oht shuhcan sbahic soc Jesús soc te jnopojeletic yu'une.

¹¹C'alal hich la yilic te fariseohetic, la sjoc'obeyic te jnopojeletic: ¿Bin yu'un te ya sjoquin ta we'el jc'an-patanetic soc yantic jmulawiletic te Maestro awu'unique? la yutic.

¹²C'alal hich la ya'iy te Jesús, hich la yalbe: Te mach'atic lec ayic, ma xtuhun yu'unic jpoxtaywanej, ha nax te mach'atic ayic ta chamel.

¹³Bahanic, nopahic bin scuentahil te hich halbil: Ha ya jc'an te yac awa'iyic c'uxultaywanej, ma ha'uc ya jc'an milbil mahtanil, te xchihe. Como ma ha'uc tal quic'ticlan te mach'atic toj yo'tanic, ha tal quic' te jmulawiletique, xchi.

¹⁴Te jnopojeletic yu'un te Juan talic ta stojol, hich la sjoc'obeyic: ¿Bin yu'un te ho'otcotic soc te fariseohetic nopic ya jcom jwe'elcotic, yan te jnopojeletic awu'un, mayuc ya scom swe'el stuquelic? xchihic.

¹⁵Halbotic yu'un te Jesús: ¿Ya bal smel yo'tanic te mach'atic yacalic ta pas-q'uin scuenta nuhpunel teme sjoquic to te jnuhpunele? Pero ya me sta yorahil te ya xloq'uesbot te jnuhpunel, ha to me ya xhahch scom swe'elic a.

¹⁶Mayuc mach'a ya ya'be yach'il spac'anil te poco' c'u'ul, como ya xmuc'ub sch'i'emal yu'un te spac'anile.

¹⁷Ha nix hich ma xhu' ta pulel toj hu'el vino ta poco' nuhcul, como ya xt'ohm yu'un, ya xmahl te vino soc ya xch'ay te nuhcule. Pero ya yich' pulel ta yach'il nuhcul te vino toj hu'el scuenta yu'un hich pajal lec ya xc'ohtic a, xchi.

¹⁸Hich yac ta yalel a te Jesús, tal jtuhl principal winic, hul squejan sba ta stojol, hich la yal: Chamel to te cantsil-nich'an; conic, cajambon ac'ab ta sba, hich me ya xcuxaj a, xchi.

¹⁹Hich hahch te Jesús, la st'un bahel soc te jnopojeletique.

²⁰Ay tal jtuhl ants te ayix lahchayeb (12) ha'bil te ay swocol te ma xquehchaj yilbel schamel, nohpoj tal ta spat te Jesús, la yahnupicbe sti'il smuc'ul-c'u',

²¹yu'un hich la yal ta yo'tan: Teme ha nax ya jpicbe smuc'ul-c'u', hich ya xlecubon a, xchi ta yo'tan.

²²Pero la sut sba te Jesús, la yil te ants, hich la yal: Ayuc me smuc'ul awo'tan, cantsil-nich'an, lecubatix ta scuenta sch'uhunel awo'tan, xchi. Lecub ta ora te antse.

²³C'alal och bahel Jesús ta sna te principal winic soc la yil te mach'atic yac yoq'uesimbelic amay soc sts'otetic te mach'atic tey ayic a,

²⁴hich la yal: Loc'anic bahel, ma ba chamen te ach'ixe, wayal nax, xchi. Pero la slabanic.

²⁵C'alal loq'uic bahel ta fuera te mach'atic tey ayic a, och bahel te Jesús, la stsac hahchel ta sc'ab, hich hahch te ach'ixe.

²⁶Puhc ta halel ta spisil q'uinal tey a te bin c'oht ta pasele.

²⁷Sohl xan bahel tey a te Jesús, tal ta t'unel yu'un cheb ts'o'sitetic, yac yawtaybelic: ¡C'uxultayawotcotic, sts'umbalat David! xchihic ta aw.

²⁸C'alal och ta na, talic ta stojol Jesús te ts'o'sitetic, hich joc'obotic yu'un te Jesús: ¿Ach'uhunejic bal te ya xhu' cu'un spasel ini? xchi. Jch'uhunejcotic, Cajwal, xchihic.

²⁹Hich la spicbe sitic soc hich la yal: Hich ac'a c'ohtuc ta pasel te bin ut'il ach'uhunejic, xchi.

³⁰Hich jahm te sitique. Tulan pasotic ta mandar yu'un te Jesús: Ilawilic te manchuc ay mach'a ya sna', xchi.

³¹Pero c'alal loq'uic bahel, hahch spucbeyic ta halel sc'oblal ta spisil q'uinal.

³²Loq'uelic to bahel a, hul ta iq'uel jtuhl uma' te ay pucuj ta yo'tan.

³³C'alal loq'uesbot te pucuje, c'opoj te uma'. Xcham yo'tanic yu'un te mach'atic tey ayic a, hich la yalic: Mayuc hich quilojtic ta Israel, xchihic.

³⁴Yan te fariseohetic hich la yalic stuquel: Ta scuenta te yajaw pucujetic te ya xhu' yu'un sloq'uesel te pucujetique, xchihic.

³⁵Te Jesús la sbehentay spisil te pueblohetic soc tut pueblohetic, yac ta p'ijubteswanej ta sinagogahetic yu'unic, yac ta yalel te lec yach'il c'op yu'un te cuentahinel yu'un Dios, soc yac slecubteslambel spisil chameletic soc spisil te banti c'ux ya ya'iyic.

³⁶C'alal la yil te bayel ants-winiquetic, sts'ujet ta yo'tan la ya'iy, como ay swocolic soc ihquitaybilic hich bin ut'il tuminchijetic te mayuc jcanan yu'unique.

³⁷Ha yu'un la yalbe te jnopojeletic yu'un: Melel bayel te sit awal-ts'unubil, pero mayuc tsobol te j'a'teletique.

³⁸Ha yu'un c'ambeyahic te Yajwal awal-ts'unubil te yacuc sticonlan j'a'teletic ta stsobel, xchi.