Read Tzeltal San Marcos 1 Bible Online

San Marcos 1 - Tzeltal bible

San Marcos 1

¹Ha shahchibal te lec yach'il c'op yu'un te Jesucristo, te Snich'an Dios.

²Hich ts'ihbabil hilel yu'un te jalwanej Isaías: Ilawil, ya jticon bahel te jal-c'op cu'un te nahil ya xbaht awu'un, te ya schahpambat te be awu'une.

³Ha sc'op te mach'a hich ya x'awon ta jochol taquin q'uinal: Chahpambeyahic sbe te Cajwaltique, tojobtesahic te behetic yu'un, te xchihe.

⁴Te Juan yac ta yaq'uel ich'-ha' ta jochol taquin q'uinal soc yac ta yalbeyel sc'oblal ich'-ha' scuenta suhtesel-o'tanil yu'un stahel perdón yu'un muliletic.

⁵Spisil mach'atic ayic ta sq'uinal Judea soc spisil mach'atic ayic ta Jerusalén loq'uic tal ta stojol Juan, la yalic ta jamal te smulic soc a'bot yich'ic ha' yu'un ta muc'ul-ha' Jordán.

⁶Te Juan sc'u'inej stsotsel camello, nuhcul schucoj sch'uht a, soc la swe' c'ulub soc chab.

⁷Hich yac ta yalel: Te mach'a patil ya xtal cu'un ha toyol xan yu'el a te bin ut'il ho'on, ni ha'uc ya xtuhunon yu'un stilbeyel sc'ab step stuquel.

⁸Te ho'one ha nax ya ca'beyex awich'ic ha', yan stuquel, ha ya ya'beyex awich'ic te Ch'ul Espíritu, xchi.

⁹Ta hich ora loc' tal Jesús ta Nazaret ta sq'uinal Galilea, c'oht yac' sba ta a'beyel yich' ha' yu'un Juan ta muc'ul ha Jordán.

¹⁰C'alal loc' tal ta ha' te Jesús, la yil jahm te ch'ulchan soc yac ta cohel tal ta stojol te Espíritu hich te bin ut'il stsuhmut.

¹¹Soc tal c'op ta ch'ulchan, hich la yal: Ha'at Jnich'anat te bayel c'uxat ta co'tan; buen lec co'tan awu'un, xchi sc'oblal.

¹²Ora ic'ot bahel ta jochol taquin q'uinal yu'un te Espíritu.

¹³Cha'winic (40) c'ahc'al halaj ta jochol taquin q'uinal. C'oht ta tsajel yu'un Satanás, soc ha la sjoquin te ha'mal chambahlametic, soc te ch'ul a'batetic la yac' sbahic ta a'batinel yu'un.

¹⁴Ochemix ta chuquel a te Juan, c'oht ta Galilea te Jesús, yac ta yalel te lec yach'il c'op sc'oblal te cuentahinel yu'un Dios.

¹⁵Hich la yal: La stahix yorahil, nopol ya xhahchix te cuentahinel yu'un Dios. Suhtesa awo'tanic, ch'uhunahic te lec yach'il c'op, xchi.

¹⁶C'alal yac ta behel Jesús ta ti'ti'mar yu'un Galilea, la yil te Simón soc Andrés te yihts'ine, yac yotsesbelic ta ha' te stsaco-chayic, como jtsac-chayetic.

¹⁷Hich halbotic yu'un te Jesús: La', t'unawonic, ya caq'uex ta jtsob-ants-winiquetic, xchi sc'oblalic.

¹⁸Ora la yihquitayic hilel te stsaco-chayic, la st'unic bahel.

¹⁹Sohl xan bahel te Jesús, la yil te Jacobo snich'an Zebedeo, soc te Juan te yihts'ine, ayic ta barco, yac sts'acticlambel te stsaco-chayique;

²⁰la yic'ticlan ta ora. Hich la yihquitayic hilel ta barco te Zebedeo te static, soc te stojbil winiquetic, la st'unic bahel.

²¹C'ohtic ta Capernaum, soc ta sc'ahc'alel cux-o'tan och ta sinagoga te Jesús soc hahch ya'iy p'ijubteswanej.

²²Xcham yo'tanic yu'un te nohptesel yu'un, como hich la ya'iy p'ijubteswanej te bin ut'il te mach'a tulan ya'tel, ma pajaluc soc te escribanohetique.

²³Ay jtuhl winic ta sinagoga yu'unic te ay bohl espíritu ta yo'tan te hich awon:

²⁴¿Bin awochelotcotic a, Jesús te talemat ta Nazaret? ¿Yu'un bal tal alajinotcotic? Ya jna'bat aba, ha'at Sch'ul-nich'anat Dios, xchi ta aw.

²⁵Pero comot yu'un te Jesús, hich la yal: ¡Ch'aban, loc'an ta yo'tan! xchi.

²⁶Te bohl espíritu tulan la syuq'uilan te winic, yac ta aw a loc' ta yo'tan.

²⁷Spisilic xcham yo'tanic yu'un, hich hahch yalbe sbahic: ¿Bin a ini? ¿Ha bal yach'il nohptesel, te ta yip ya'tel ya spas ta mandar te bohl espíritu, soc ya sch'uhumbeyic sc'op? xchihic.

²⁸Ora puhc sc'oblal ta spisil sq'uinal Galilea.

²⁹C'alal loq'uic ta sinagoga, ochic ta sna te Simón soc Andrés, joquinot yu'un te Jacobo soc te Juan.

³⁰Te snihal-me'el te Simón metsel ta swayib yu'un ay sc'ahc'al; la yalbeyic sc'oblal.

³¹Hich te Jesús nopoj tal ta stojol, la snit hahchel ta sc'ab, ora quehchaj te c'ahq'ue, och yac' sba ta a'batinel yu'unic.

³²Mahlix c'ahc'al a, la yic'ticlanic tal spisil te mach'atic ayic ta chamel soc te mach'atic ay pucuj ta yo'tanic.

³³Spisil te pueblo la stsob tal sbahic ta ti'nahil.

³⁴La slecubteslan tsobol te ay bayel ta chahp chameletic, soc la sloq'ueslan bayel pucujetic; ma ba la yac' c'opojuc te pucujetic, como la sna'beyic sba.

³⁵Hahch ta buen sab, ihc' to a te q'uinal, loc' bahel te Jesús ta banti jochol te q'uinale, tey baht sc'opon Dios a.

³⁶Lehot yu'un Simón soc te smohloltac,

³⁷c'alal la stahic, hich la yalbeyic: Spisilic yaquic ta lehaw, la yutic.

³⁸La yal te Jesús: Ya xbohotic ta yantic lugaretic te nopajtic ayic, yu'un ha nix hich ya cal sc'op Dios tey a, como ha talemon yu'un, xchi.

³⁹Hich behen ta yalel sc'op Dios ta jujun sinagoga ta spisil sq'uinal Galilea, soc la sloq'ueslan pucujetic.

⁴⁰Tal ta stojol jtuhl jc'a'elchamel, la squejan sba soc hich la yalbe bayel wocol te Jesús: Teme yac ac'ane, ya xhu' awu'un te yac alecubteson, xchi.

⁴¹Te Jesús la sna'be yo'bolil sba, la shach sc'ab, la spic soc hich la yalbe: Ya jc'an, ac'a lecubucat, xchi.

⁴²Ora nax ch'ay te sc'a'elchamel, lecub hilel.

⁴³Te Jesús la sticon bahel soc tulan la spas bahel ta mandar:

⁴⁴Ilawil, ma me ayuc mach'a xawalbe ya'iy. Bahan, ac'a aba ta ilel ta stojol te sacerdote, soc ac'a te mahtanil te yaloj Moisés, scuenta testigo ta stojolic, xchi.

⁴⁵Pero c'alal baht, hahch spuc ta halel ta bayuc te bin pasbote. Hich ma hu'ix och ta pueblo te Jesús, hil ta bantic jochol te q'uinaletic; soc bayuc talic ta stojol.