Read Tzeltal San Marcos 13 Bible Online

San Marcos 13 - Tzeltal bible

San Marcos 13

¹Yac ta loq'uel ta Templo a te Jesús, halbot yu'un jtuhl jnopojel yu'un: Maestro, ¡ilawil, mero muc' te tonetic, soc c'ax muc' te nahetique! xchi.

²La yal te Jesús: ¿Chican bal yac awil te muc'ul nahetic ini? Mayuc junuc ton cajal ya xhil ta sba yan ton, spisil me ya yich' wuyel cohel, xchi.

³Te Jesús la shuhcan sba ta Wits yu'un Olivohetic ta banti snuhp'usitayej sba soc te Templo. Te Pedro, Jacobo, Juan soc Andrés stuquelic la sjoc'obeyic:

⁴Hala ca'iycotic, ¿bin ora te hich ya xc'oht ta pasele? Soc ¿bin señahil ya xchicnaj te c'alal nopol ya xc'ohtix ta pasel spisil ini? xchihic.

⁵Te Jesús hich hahch yalbe: Tsahtaya me abahic, ma me ayuc mach'a ya slo'loyex;

⁶como ay tsobol ya xtalic ta scuenta jbihil, te hich ya yalic: Ho'on Cristohon, xchihic, hich ya slo'loyic tsobolic.

⁷Pero te c'alal yac awa'iyic te ay guerrahetic soc te ya xchicnaj ta halel te ya xhahch guerrahetic, ma me xnihc awo'tanic yu'un; como hich me ya xc'oht ta pasel, pero ma to ha'uc te slajibal c'ahc'ale.

⁸Como talel c'axel me ya xhahch scontrahin sbahic te nacionetic, soc ya me scontrahin sbahic te jujuchahp banti scuentahinejic; ya xtal nihquel ta bayuc soc wi'nal; ha shahchibal to nax sc'uxul.

⁹Tsahtaya me abahic; ya me x'ac'otex ta stojol jchahpawanejetic soc yac awich'ic majel ta sinagogahetic; ya xtehc'anotex ta stojol gobernadoretic soc ta stojol ajwaliletic ta ho'on jcuenta, yu'un testigohetic ya xc'ohex cu'un ta stojolic.

¹⁰Ya sc'an te nahil ya yich' halel te lec yach'il c'op ta spisil nacionetic.

¹¹Pero te c'alal ya yiq'uex bahel yu'un ya yaq'uex ta c'abal, ma me xc'opoj awo'tanic yu'un te bin ya xc'oht awalic, ha me xawalic te bin ya x'ac'otex ta yalel ta hich ora, como ma ha'uquex te ya xc'opojex, ha ya xc'opoj te Ch'ul Espíritu.

¹²Te banquilal ya me yac' ta milel yihts'in, te tatil ya yac' ta milel te snich'ane; soc ay al-nich'anetic te ya xhahch scontrahinic sme'static soc ya me smilic.

¹³Ya me yil-o'tantayex spisil ants-winiquetic ta jcuenta; pero te mach'a ya xcuhch yu'un c'alal ta slajibal, ya me xcol.

¹⁴Te c'alal yac awilic te bin ihlobtic sba te ya xjinawan te ay ta banti ma xhu' ya x'och sc'oblale, (te mach'a ya yil te hune, ac'a sna'be scuentahil), te mach'atic ayic ta sq'uinal Judea ac'a ahnuquic bahel ta witsiltic.

¹⁵Te mach'a ay ta ba na ma me xco bahel, ma me x'och bahel ta sloq'uesel sbiluc.

¹⁶Te mach'a ay ta sq'uinal, ma me suht xan bahel ta stamel smuc'ul-c'u'.

¹⁷¡Ay me swocolic te antsetic te swoloj yalic soc te ay jchu'alaletic yu'unic ta hich ora!

¹⁸C'oponahic Dios te manchuc yorahil sic a te ya x'ahnex bahel,

¹⁹como mayuc hich wocol c'ohem ta pasel yalel c'alal pastay yu'un Dios te bahlumilal c'alal ora, soc mayuc hich ya xc'oht xan ta pasel.

²⁰Te manchuc ya xpehc'ambot sc'ahc'alel yu'un te Cajwaltic, mayuc mach'a ya xcol te hichuque. Pero ha ta scuenta te mach'atic tsahbilic yu'un te ya spehc'ambe sc'ahc'alele.

²¹Ha yu'un teme ay mach'a ya yalbeyex: Ilawil, li' ayix te Cristo, o: Ilawil, lum aye, teme xchihe, ma me xach'uhunic.

²²Como ya me xchicnaj lotil cristohetic soc lotil jalwanejetic te ya yaq'uic ta ilel señahiletic soc jchahp a'teliletic yu'un ha ya slo'loyic a te mach'atic tsahbilic, te yacuc xhu' yu'unique.

²³Tsahtaya me abahic hiche, nahil me la jcalbeyex spisil.

²⁴Pero ta hich ora, te c'alal c'axemix a te wocole, ya me x'ihc'ub te c'ahc'al, ma xyac' sts'anabul te u,

²⁵ya me xlaj ch'ay cohel tal ta ch'ulchan te eq'uetic soc ya me syuc' sbahic te bintic ay ta sjamalil ch'ulchan.

²⁶Ta hich ora ya me yilic te Nich'anil ay ta scuenta winic te yac ta talel ta tocal soc bayel yu'el soc yutsilal.

²⁷Ya me sticon bahel te ch'ul a'batetic yu'un ta stsobel tal te mach'atic tsahbilic yu'un ta schanebal ic', c'alal ta sjehchelul bahlumilal c'alal ta sjehchelul ch'ulchan.

²⁸Nopahic bin ut'il ay te sloc'ombahil c'op yu'un te higuera: C'alal ya x'uhnenub te sc'ab soc ya xloc' tal te ya'binal, yac ana'ic te nopolix yorahil ha'alel q'uinal.

²⁹Ha nix hich, te c'alal yac awilic te yaquix ta c'ohel ta pasel ini, na'ahic me te nopolix yorahil, ayix ta ti'nahil.

³⁰Jamal ya calbeyex te ma to xchamic a te jcaj ts'umbalil ini te ya xc'oht ta pasel spisil ini.

³¹Ya xlaj ch'ulchan soc bahlumilal, yan te jc'ope ma xlaj stuquel.

³²Pero mayuc mach'a ya sna' bin c'ahc'alil soc bin ora ya xc'oht ta pasel, ni ha'uc te ch'ul a'batetic ta ch'ulchan, o te Nich'anil, ha nax stuquel te Tatile.

³³Ila me abahic, wic'sitaya me abahic soc c'oponahic Dios, como ma na'biluc awu'unic bin ora hich ya xc'oht ta pasel.

³⁴Hich c'ohem te bin ut'il jtuhl winic te baht ta namal, la yihquitay hilel sna, la ya'be hilel ya'tel te a'batetic yu'un, jujutuhl te bin ya spasic, soc la yalbe te jcanan-ti'nahil te ya me swic'sitay sba.

³⁵Ha yu'un te ha'exe, wic'sitaya abahic, como ma na'biluc awu'unic bin ora ya xhul te yajwal na, teme ta yihc'ubel q'uinal, ta ohlil ahc'abal, ta sba-oq'uelan mut, o ta sacubel q'uinal,

³⁶scuenta yu'un teme repente nax ya xtal, ma ba wayalex a ya xhul stahex.

³⁷Te bintic ya calbeyex, ha nix hich ya calbe spisilic: Wic'sitaya me abahic, xchi.