Read Tzeltal San Marcos 2 Bible Online

San Marcos 2 - Tzeltal bible

San Marcos 2

¹Cheb oxeb c'ahc'al ta patil, cha'och xan bahel ta Capernaum te Jesús. C'alal la ya'iyic te hulemix ta na,

²ora la stsob tal sbahic, ma x'ochic a, ni ta ti'nahil; hich la yalbe ya'iyic te sc'op Dios.

³Ay chantuhl sq'uechojic tal jtuhl winic te chamen schihal yoc sc'ab.

⁴Pero ta scaj te bayel ants-winiquetic ma ba hu' yochelic ta banti ay te Jesús, ha yu'un mohic ta sjamel te ba na ta banti ay te Jesús. C'alal jahm yu'unic, la sjihpanic cohel soc schahchamte'el te mach'a chamen schihal yoc sc'abe.

⁵C'alal la yil te Jesús te ay sch'uhunel yo'tanic, hich la yalbe te mach'a chamen schihal yoc sc'ab: Jnich'an, pasbilatix perdón yu'un amul, xchi.

⁶Ay escribanohetic huhcajtic tey a, hich la snop ta yo'tanic:

⁷¿Bin yu'un te hich la yal? Yac me ta sbohlc'optayel Dios. ¿Mach'a c'an hu'uc yu'un ya spas perdón yu'un mulil, ha nax stuquel te Diose? xchihic.

⁸Te Jesús ora la sna' ta yo'tan te hich yac snopbelic ta yo'tanic, ha yu'un hich la sjoc'obeyic: ¿Bin yu'un te hich yac anopbel ta awo'tanic?

⁹¿Ban ay te ma wocoluc ta halel, teme ya calbe te mach'a chamen schihal yoc sc'ab: Pasbilatix perdón yu'un amul, teme ya cute, o teme ya calbe: Hahchan, q'uecha bahel achahchamte'el, behenan, teme ya cute?

¹⁰Pero scuenta yu'un hich yac ana'ic a te ha yich'oj ya'tel ta bahlumilal te Nich'anil ay ta scuenta winic yu'un spasel perdón yu'un mulil (la yalbe te mach'a chamen schihal yoc sc'ab):

¹¹Ya calbat, hahchan, q'uecha bahel achahchamte'el, bahan ta ana, xchi.

¹²Ora hahch, la sq'uech bahel te schahchamte'el ta stojol spisilic. Xcham yo'tan spisilic yu'un soc la yalbeyic yutsil sc'oblal te Diose, hich la yalic: Mayuc hich quilojtic a ini, xchihic.

¹³Cha'loc' xan bahel ta ti'mar te Jesús; spisil ants-winiquetic talic ta stojol, soc la sp'ijubteslan.

¹⁴C'alal yac ta c'axel a, la yil te Leví snich'an Alfeo hucul ta banti ya yich' tojel patanil, hich la yalbe: La', t'unawon, xchi. Hich hahch te Leví, la st'un bahel.

¹⁵Te c'alal ay ta sna Leví te Jesús, ay tsobol jc'an-patanetic soc jmulawiletic te pajal ayic ta we'el soc Jesús soc te jnopojeletic yu'un, como bayel mach'atic t'umbil yu'un.

¹⁶C'alal la yilic te escribanohetic soc te fariseohetic te ha sjoquinej ta we'el te jc'an-patanetic soc jmulawiletic te Jesús, hich la sjoc'obeyic te jnopojeletique: ¿Bin ut'il ay a te ya sjoquin ta we'el ta uch'el jc'an-patanetic soc jmulawiletic? la yutic.

¹⁷C'alal hich la ya'iy te Jesús, hich la yalbe: Te mach'atic lec ayic ma xtuhun yu'unic jpoxtaywanej, ha nax te mach'atic ayic ta chamel. Ma ha'uc tal quic' te mach'atic toj yo'tanic, ha tal quic' te mach'atic jmulawiletique, xchi.

¹⁸Te jnopojeletic yu'un te Juan soc te jnopojeletic yu'un te fariseohetic ya scom swe'elic. Ay mach'atic tal sjoc'obeyic te Jesús: ¿Bin yu'un ya scom swe'elic te jnopojeletic yu'un te Juan soc te jnopojeletic yu'un te fariseohetic, yan te jnopojeletic awu'une, ma ba ya scom swe'elic stuquel? xchihic.

¹⁹Hich halbotic yu'un te Jesús: ¿Ya bal scom swe'elic te mach'atic yacalic ta pas-q'uin scuenta nuhpunel teme sjoquic to te jnuhpunele? Te c'alal sjoquinejic to te jnuhpunel, ma xhu' ya scom swe'elic.

²⁰Pero ya me sta yorahil te ya xloq'uesbot te jnuhpunel ta stojolic, ha to me ya xhahch scom swe'elic a.

²¹Mayuc mach'a ya ya'be yach'il spac'anil te ban ay poco'ix te c'u'ule, como ya xmuc'ub sch'i'emal yu'un te spac'anile, c'ax hich ya xlohm yu'un a.

²²Ha nix hich ma xhu' ta pulel toj hu'el vino ta poco' nuhcul, como ya xt'ohm yu'un, ya xmahl te vino soc ya xch'ay te nuhcule; ha ya yich' pulel ta yach'il nuhcul te vino toj hu'ele, xchi te Jesuse.

²³Ta sc'ahc'alel cux-o'tan te Jesús c'ax ta banti ts'umbil trigohiltic; c'alal yacalic ta behel a te jnopojeletic yu'un hahch sjixic te sit trigo.

²⁴Ha yu'un hich halbot yu'un te fariseohetic: Ilawil, ¿bin yu'un ya spasic ta sc'ahc'alel cux-o'tan te bin ma hichuc pasel ya sc'ane? xchihic.

²⁵La sjac' te Jesús: ¿Yu'un bal ma ba awilojic ta hun te bin la spas te David te c'alal ay swi'nal soc te mach'atic sjoquinej;

²⁶ha te bin ut'il och ta sna Dios te c'alal ay ta muc'ul sacerdote a te Abiatar, la swe' te pan ac'bil ta stojol Dios, te ma ha'uc ya sc'an ya swe', te ha nax ya xhu' ya swe'ic te sacerdotehetic, soc la ya'be swe' te mach'atic sjoque? xchi.

²⁷Soc hich la yalbeyic xan: Te sc'ahc'alel cux-o'tan la yich' aq'uel ta scaj ants-winiquetic, ma ha'uc te ants-winiquetic la yich'ic aq'uel ta scaj te sc'ahc'alel cux-o'tan.

²⁸Ha yu'un te Nich'anil ay ta scuenta winic ha nix Ajwalil yu'un te sc'ahc'alel cux-o'tan, xchi te Jesuse.