Read Tzeltal San Marcos 3 Bible Online

San Marcos 3 - Tzeltal bible

San Marcos 3

¹Yan buelta och ta sinagoga te Jesús; ay jtuhl winic tey a te taquijem jun sc'ab.

²Yac stsahtaybel yilic teme ya slecubtes ta sc'ahc'alel cux-o'tan, yu'un tey ya slehbeyic smul a.

³Te Jesús hich la yalbe te winic te taquijem sc'ab: Hahchan, tehc'ana aba ta ohlil, xchi.

⁴Soc hich la sjoc'obe te yantique: ¿Lec bal te ta sc'ahc'alel cux-o'tan ya yich' pasel te bin lec o te bin ma lecuc; lec bal scoltayel cuxlejalil o slajinel cuxlejalil? la yut. Mayuc bin la sjaq'uic.

⁵Ilinem a te Jesús la yilticlan ta sjoyobal, la smel yo'tan ta scaj te tulan yo'tanic, hich la yalbe te winique: Xach'a ac'ab, la yut. Hich la xach' sc'ab, lecub te sc'abe.

⁶Ha yu'un loq'uic bahel te fariseohetic, baht schap sc'opic soc te winiquetic yu'un Herodes te bin ya yut ya smilic te Jesús.

⁷Loc' tey a te Jesús, baht ta ti'mar soc te jnopojeletic yu'un, soc t'unot bahel yu'un tsobol ants-winiquetic te talemic ta Galilea, soc nix ta Judea,

⁸Jerusalén, Idumea, ta jehch ha' Jordán soc ta sjoyobal Tiro soc Sidón. Tsobol talic ta t'unaw c'alal la ya'iyic te bin muc' yac spasticlambel te Jesús.

⁹Ha yu'un la yalbe te jnopojeletic yu'un te yacuc schahpanic jun barco scuenta yu'un hich ma ba ya xtenot yu'un a te bayel ants-winiquetic,

¹⁰como tsobol mach'atic la slecubteslan ta chamel, ha yu'un spisil mach'a ayic ta chamel stenten sbahic ta spicbeyel sc'u'.

¹¹Te bohl espírituhetic, c'alal la yilic te Jesús, la squejan sbahic ta stojol soc la yalic: Ha'at Snich'anat te Diose, xchihic ta aw.

¹²Pero tulan comotic yu'un Jesús te manchuc ya x'ac'ot ta na'el yu'unic.

¹³Patil mo bahel ta wits te Jesús, la yic' sjoquin te mach'atic la sc'an la yic'; hich talic ta stojol.

¹⁴La stsa lahchaytuhl (12) scuenta yu'un ya xjoquinot yu'unic, soc yu'un ya sticonlan bahel ta yalel sc'op Dios

¹⁵soc yu'un ay ya'telic ta slecubtesel jchameletic soc ta sloq'uesel pucujetic.

¹⁶Te lahchaytuhl te la stsa: ha te Simón, te Pedro yan sbihil a'bot yu'une,

¹⁷Jacobo snich'an Zebedeo, soc Juan te yihts'in Jacobo, te la ya'be sbihilinic Boanerges, ha Snich'nab Chahwuc, xchi c'ohem;

¹⁸soc Andrés, Felipe, Bartolomé, Mateo, Tomás, Jacobo snich'an Alfeo, Tadeo, soc Simón te cananeo-winic,[1]

¹⁹soc Judas Iscariote, ha te la yac' ta c'abal te Jesús.

²⁰Patil och bahel ta na te Jesús, la scha'tsob xan tal sbahic bayel ants-winiquetic, ma ba hu' we'ic yu'un.

²¹C'alal la ya'iyic te mach'atic ay yu'un te Jesús, ya c'an tal stsaquic bahel, como la yalic: Sohquem sjol, xchihic.

²²Pero te escribanohetic te talemic ta Jerusalén la yalic: U'untayot yu'un Beelzebú, soc ta scuenta yajaw pucujetic te ya sloq'ueslan te pucujetique, xchihic.

²³Ha yu'un te Jesús la yic'ticlan tal sc'opon ta scuenta sloc'ombahil c'op, hich la yal: Te Satanás, ¿bin ut'il ya xhu' ya sloq'ues sba stuquel?

²⁴Teme ay ya scontrahin sbahic te ban cuentahimbil yu'un, ma xhu' ya xhalaj.

²⁵Soc te mach'atic jun snahic te ya scontrahin sbahic, ya me xjihn snahic yu'un.

²⁶Soc teme Satanás ya xhahch scontrahin sba soc teme ya sjat sba, ma xhu' ya xhalaj, ha c'ohtix ta slajibal abi.

²⁷Mayuc mach'a ya xhu' ya yochintaybe sna te winic te ay yip yu'un ya spojbe sbiluc, teme ma ba nahil ya schuc; ha to ya xhu' ya spojbe a te sbiluque.

²⁸Ya calbeyex te spisil muliletic soc spisil sbohlc'optayel Dios ay perdón yu'un,

²⁹yan te mach'a ya sbohlc'optay te Ch'ul Espíritu mayuc perdón yu'un stuquel; sbahtel q'uinal smulinej, xchi te Jesús.

³⁰Como hich yalojic: Yich'oj bohl espíritu, te xchihique.

³¹Tal te yihts'inab soc te snan te Jesús; hilic ta fuera, la sticonic ta iq'uel tal te Jesús.

³²Te mach'atic huculic ta sjoyobal la yalbeyic: Talem slehbelat te anan soc awihts'inab, ayic ta fuera, xchihic.

³³La sjac' te Jesús: ¿Mach'a a te jnan soc te quihts'inab? xchi.

³⁴La yilticlan te mach'atic huculic ta sjoyobal, hich la yal: Ha jnan soc ha quihts'inab ini.

³⁵Como spisil mach'a ya spas te bin ya sc'an yo'tan te Diose, ha jnan soc ha quihts'in c'ohem, xchi te Jesuse.