Read Tzeltal San Lucas 11 Bible Online

San Lucas 11 - Tzeltal bible

San Lucas 11

¹Ay jun buelta yac ta sc'oponel Dios te Jesús ta jun lugar. C'alal laj yo'tan, hich halbot yu'un jtuhl jnopojel yu'un: Cajwal, ac'a jnopcotic sc'oponel Dios hich te bin ut'il te Juan la snohptes ta sc'oponel Dios te jnopojeletic yu'une, xchi.

²Hich halbotic yu'un te Jesús: Te c'alal yac ac'oponic te Diose, hich me xawalic: Jtatic te ayat ta ch'ulchan,[7] ac'a ich'ec ta muc' ach'ul bihil. Ac'a taluc te cuentahinel awu'un. Ac'a yich' pasel ta bahlumilal te bin ya sc'an awo'tan, hich te bin ut'il yac ta pasel ta ch'ulchan.[8]

³A'botcotic jwe'elcotic scuenta jujun c'ahc'al.

⁴Pasbotcotic perdón yu'un jmulcotic, como hich nix ya jpasbecotic perdón te mach'atic ay smul ta jtojolcotic. Soc ma me xawac'otcotic ta sujel ta mulil, ac'awotcotic ta libre yu'un te bin chopole, xchi te Jesús.

⁵Soc la yalbe xan: Teme ay jtuhlex te ay awamigo te hich ya xbaht awalbe ta ohlil ahc'abal: Amigo, a'bon jelbat oxpehchuc pan awu'un,

⁶yu'un ay jtuhl camigo te hul tal ta jna, mayuc bin ya ca'be swe', teme xchihate,

⁷pero ta yutil sna ya sjac'bat ac'op: Ma xawuts'inon; macalix te ti'nahil, wayalonix soc te alaletic cu'un. Ma xhu' ya xhahch ca'bat, teme xchihe.

⁸Ya calbeyex, aunque ma ba ya xhahch ya'be te bin ut'il ha yamigo, ha ya xhahch yu'un te ma xquehchaj ta c'op, hich ya ya'be spisil te bin ya xtuhun yu'une.

⁹Ha yu'un ya calbeyex: C'anahic, hich me ya x'a'botex; lehahic, hich me yac atahic ta lehel; c'opojanic, hich me ya xjambotex.

¹⁰Como spisil mach'a ay bin ya sc'an, ya me yich'; te mach'a ya sle, ya me sta; soc te mach'a ya stij puerta, ya me xjambot.

¹¹¿Ay bal tatil ta awohlilic, teme ya xc'ambot swe' pan yu'un te yal-snich'an, ton bal ya ya'be swe';[9] o teme ya xc'ambot swe' chay, chan bal ya ya'be swe'?

¹²¿O teme ya xc'ambot swe' tomut, tsec bal ya ya'be swe'?

¹³Te ha'ex te chopol awo'tanic, teme yac ana'ic ya'beyel lequil mahtanil te awal-anich'anic, ¿ha'uc to balix a te Atatic ay ta ch'ulchan ya ya'be te Ch'ul Espíritu te mach'atic ya xc'ambot yu'une? xchi.

¹⁴Te Jesús yac ta sloq'uesel pucuj, te yac'oj ta uma' jtuhl winic; loc' nax a te pucuje, c'opoj te uma'. Xcham yo'tanic yu'un te ants-winiquetique.

¹⁵Pero ay la yalic: Ha ta scuenta Beelzebú, te principal yu'un pucujetic, te ya sloq'ues pucujetic, ay xchihic.

¹⁶Ay yantic te la sc'ambeyic seña ta ch'ulchan, scuenta yu'un hich ya stsajic a.

¹⁷Pero na'bot yo'tanic yu'un te Jesús, hich la yalbe: Teme ya scontrahin sbahic te mach'atic jun slumalic, ha ya xjihn yu'un, soc teme ya scontrahin sbahic te mach'atic jun snahic, ha ya xch'ay yu'un.

¹⁸Ha nix hich teme scontrahinej sba te Satanás, ¿bin ut'il c'an halajuc te ban c'alal scuentahinej? Ha ya cal ini yu'un yac awalic te ta scuenta Beelzebú ya jloq'ues pucujetic.

¹⁹Teme ta scuenta Beelzebú ya jloq'ues pucujetic, ¿mach'a ta scuenta te ya sloq'ueslan pucujetic te awal-anich'anic? Ha yu'un ha'ic me ya yich'ex ta c'op.

²⁰Pero teme ta scuenta yal-sc'ab Dios te ya jloq'ues pucujetic, yu'un nix hulemix ta atojolic a te cuentahinel yu'un Dios.

²¹Te jtuhl winic te ay yip soc chapal ta ya'tejib, c'alal ya scanantay sna ma xbaht ta elc'anel te sbiluque.

²²Pero c'alal ya xtal yan te c'ax hich yip a soc te ha ya stsal, ya yich'be spisil ya'tejib te smuc'ulinej yo'tan, soc ya spucbe te sbiluque.

²³Te mach'a ma ba jun yo'tan ta jtojol, ha scontrahinejon abi; soc te mach'a ma ba ya sjoquinon ta stsobel, ha yac ta spuquel.

²⁴Teme ya xloc' ta yo'tan jtuhl winic te bohl espíritu, ya xbaht ta taquin q'uinal ta slehel banti ya scux yo'tan; pero teme ma ba ya sta, hich ya yal: Ya suhton xan bahel ta jna te banti loq'uemon tale, xchi.

²⁵C'alal ya xc'oht tey a, buen mesbil soc chahpambil ya xc'oht sta.

²⁶Ha yu'un ya yic' talel huqueb xan pucujetic te c'ax hich schopolilic a; ya x'ochic ta nahinel tey a, soc c'ax hich ya xbohlob a te winic te bin ut'il ay ta nahil to, xchi.

²⁷Te c'alal hich yac yalbel a te Jesús, ay jtuhl ants ta yohlil te ants-winiquetic te hahch ta c'op, hich la yal: Bayel yutsil te ants la yalatayat soc te la schu'untesat, xchi.

²⁸La sjac' te Jesús: Ha bayel yutsil te mach'atic ya ya'iyic te sc'op Dios soc te ya spasique, xchi.

²⁹Yac ta stsobel sbahic tsobol ants-winiquetic, hich hahch yal te Jesús: Chopol te jcaj ts'umbalil ini; ya sc'an ya yilic seña, pero mayuc seña ya x'a'bot yilic, ha nax seña te Jonás.

³⁰Como hich te bin ut'il ha seña c'oht te Jonás ta stojol te mach'atic yu'un Nínive, ha nix hich te Nich'anil ay ta scuenta winic ha seña ya xc'oht ta stojol te jcaj ts'umbalil ini.

³¹Te ajwalil-ants yu'un Sur ya me xhahch ta yorahil ich'el ta c'op soc ya me yalbe smul te jcaj ts'umbalil ini; como hahch tal ta sti'il bahlumilal ta ya'iybeyel sp'ijil-c'op Salomón, pero ay mach'a li' ay te c'ax hich sc'oblal a te bin ut'il Salomón.

³²Te mach'atic yu'un Nínive ya me xhahchic ta yorahil ich'el ta c'op soc ya me yalbe smul te jcaj ts'umbalil ini; como la suhtes yo'tanic c'alal la ya'iyic te sc'op Dios la yal te Jonás, pero ay mach'a li' ay te c'ax hich sc'oblal a te bin ut'il Jonás.

³³Mayuc mach'a ya snac' te stsumbil c'ahc', o ya snuj ta moch; ya scajan ta scajtajib scuenta yu'un ya yilic q'uinal a te mach'atic ya x'ochic tal.

³⁴Te asit ha tsumbil c'ahc' yu'un te abaq'uetal. Teme lec te asite, spisil abaq'uetal nojel ta sacal q'uinal; yan teme ma lecuc te asite, spisil abaq'uetal ay ta yihc'al q'uinal.

³⁵Tsahtaya me abahic hiche, ma me sutp'ij ta yihc'al q'uinal te sacal q'uinale.

³⁶Ha yu'un teme spisil abaq'uetal nojel ta sacal q'uinal, teme mayuc banti ay yihc'al q'uinal, ha sacal q'uinal ya xc'oht ta spisil, hich te bin ut'il c'alal ya xtihl tsumbil c'ahc' ta atojol, xchi.

³⁷C'alal laj yo'tan ta c'op te Jesús, ay jtuhl fariseo la yalbe wocol te yacuc xjoquinot ta we'el yu'un. Hich te Jesús och bahel ta sna, och ta we'el ta mesa.

³⁸C'alal la yil te fariseo te ma ba la spoc sc'ab te c'alal och ta we'el, jchahp la ya'iy yu'un.

³⁹Pero hich halbot yu'un te Cajwaltique: Ha'ex te fariseohex yac apocbeyic spat te vaso soc te plato, pero ta yutil nojel ta bic'tal-o'tanil soc ta bin chopol.

⁴⁰¡Ma xana'ic q'uinal! te mach'a la spasbe te spat, ¿ma bal ha'uc nix la spasbe te yutile?

⁴¹Q'uebembeya te pobrehetic te bin ay awu'un,[10] hich pocbil ya xc'oht awu'unic spisil a.

⁴²¡Ay me awocolic, fariseohetic! como yac awac' jun ta slajunebal te menta, ruda soc spisil ta chahp ts'unubil itajetic, pero mayuc sc'oblal awu'unic te bin stojil ta pasel soc te sc'uxul yo'tan Dios. Ha ya sc'an yac apasic ini, soc ma ba yac awihquitayic spasel te yane.

⁴³¡Ay me awocolic, fariseohetic! como yac amulanic te shahchibal huctajibaletic ta sinagogahetic soc te ya xpatotex awo'tanic ta plaza.

⁴⁴¡Ay me awocolic, escribanohetic soc fariseohetic, chebal-o'tanex! hich c'ohemex te bin ut'il muquenaletic te ma chicanuc ta ilel, te ma ba ya sna'ic te ha muquenal te mach'atic ya xbehenic ta sba, xchi sc'oblalic.

⁴⁵Hich la sjac' jtuhl maestro yu'un te Ley: Maestro, te bin ut'il hich yac awale, ha nix hich yac alabanotcotic ya ca'iycotic, xchi.

⁴⁶La yal te Jesús: ¡Ay me awocolic ha'ex maestrohetic yu'un te Ley! como te ihcatsil yac awa'beyic scuch te ants-winiquetic, ma xhu' yu'unic scuchel, soc te ha'exe, ni jch'ixuc yal ac'ab yac acoltayic a.

⁴⁷¡Ay me awocolic ha'ex te yac apasbeyic smuquenal te jalwanejetic te la smilic te ame'atatique!

⁴⁸Hich yac awaq'uic ta ilel te bin ut'il lec awo'tanic yu'un te bin la spasic te ame'atatique; como ha'ic la smilic, te ha'exe yac apasbeyic te smuquenalique.

⁴⁹Ha scuentahil te hich halbil ta scuenta sp'ijil yo'tan te Diose: Ya jticombe jalwanejetic soc jpuc-c'opetic; ay me ya smilic soc ay me ya yuts'inic, te xchihe.

⁵⁰Ha yu'un te jcaj ts'umbalil ini ya me x'a'bot scuch smalbeyel sch'ich'el spisil te jalwanejetic te lajic ta milel yalel c'alal shahchel to tal bahlumilal,

⁵¹c'alal ta sch'ich'el Abel ha to c'alal ta sch'ich'el te Zacarías te la yich' milel ta ohlil yu'un te scajtajib smahtan Dios soc te Templo. Ya calbeyex te ha me ya x'a'bot scuch te jcaj ts'umbalil ini.

⁵²¡Ay me awocolic, maestrohex yu'un te Ley! como la aloq'uesbeyic te llave yu'un te bin ay ta na'ele; ma ba ya x'ochex te ha'exe, soc yac amaquic te mach'atic ya x'ochic bahele, xchi.

⁵³C'alal hich halbotic yu'un Jesús, te escribanohetic soc te fariseohetic bayel hahch stenic ta c'op soc bayel bintic la sjoc'obeyic,

⁵⁴yu'un ya stsahtay yilic teme ay bin ya yal te hich ya slehbeyic smul a.