Read Tzeltal San Lucas 16 Bible Online

San Lucas 16 - Tzeltal bible

San Lucas 16

¹Te Jesús hich la yalbe xan te jnopojeletic yu'un: Ay jtuhl jc'uhlej winic te ay jcanan-biluc yu'un te c'oht ta halbeyel te yac ta lajimbeyel sbiluc yu'un.

²Ha yu'un la yic' tal, hich la sjoc'obe: ¿Melel bal te hich ay ta halel ac'oblal ya ca'iy? Ac'ahix cuenta te bintic ay ta acuenta scanantayel, como ma xhu' ya xhilatix ta jcanan-biluc cu'un, la yut.

³Hich te jcanan-biluc hahch snop ta yo'tan: ¿Bin ya jpas, como ya sloq'uesonix ta ca'tel te cajwal? Ma xhu' cu'un te ya x'ochon ta joc'-lum, soc ya xq'uexawon teme ya x'ochon ta c'ambajel.

⁴La jna'ix bin ya jpas scuenta yu'un ay mach'atic ya yic'on ta snahic a te c'alal ya sloq'ueson ta ca'tel te cajwal, xchi ta yo'tan.

⁵Hich la yic' tal ta tuhlutuhl te mach'atic ay sbetic yu'un te yajwal, hich la yalbe te mach'a nahil tal: ¿Jayeb abet yu'un te cajwal? xchi.

⁶Ho'winic (100) lata aceite, xchi. La yal te jcanan-biluc: Ila te shunal abet, huhcana aba ta ora, lajuneb yoxwinic (50) xawotses ta hun, xchi.

⁷Patil la yalbe te yane: ¿Haxanat, jayeb abet? xchi. Ho'winic (100) ta p'is trigo, xchi. Ila te shunal abet, chanwinic (80) xawotses ta hun, xchi.

⁸Te yajwal la yalbe lec sc'oblal te chopol jcanan-biluc te bin ut'il la sna' bin la yut. Como te mach'atic scuenta bahlumilal c'ax hich ya sna'ic a bin ya yut soc te smohloltac te bin ut'il te mach'atic ayic ta scuenta sacal q'uinal.

⁹Ho'on ya calbeyex, lehahic mach'atic yac ac'uxultay abahic soc ta scuenta te c'uhlejalil yu'un te bahlumilale, scuenta yu'un te c'alal ya xlaj, ya me x'ic'otat ochel te banti ya x'ayinat sbahtel q'uinal.

¹⁰Te mach'a lec ya scuentahin te bin jteb ya x'a'bot, ha nix hich lec ya scuentahin te bin tsobol ya x'a'bote. Yan te mach'a ma sna' scuentahinel te bin jteb ya x'a'bot, yu'un nix ma sna' scuentahinel teme tsobol bin ya x'a'bote.

¹¹Teme ma ba la ana'ic scuentahinel te c'uhlejalil scuenta bahlumilal, ¿mach'a c'an ya'beyex acuentahinic te smelelil c'uhlejalil?

¹²Soc teme ma lecuc la acuentahimbeyic sbiluc te yane, ¿mach'a c'an ya'beyex te bin awu'unique?

¹³Mayuc a'bat te ya xhu' te cheb yajwal ya yac' sba ta a'batinel yu'un, como ya sp'aj te jtuhle soc c'ux ta yo'tan te yane; o ay sc'oblal ta yo'tan te jtuhle soc mayuc sc'oblal ta yo'tan te yane. Ma xhu' yac awac' abahic ta a'batinel yu'un Dios soc yu'un te c'uhlejalil, xchi.

¹⁴Te fariseohetic te smulanejic c'uhlejalil, la ya'iyic spisil soc la slabanic yu'un.

¹⁵Ha yu'un hich halbotic yu'un te Jesús: Yac awal abahic ta stojol ants-winiquetic te mayuc amulic te ha'exe, pero Dios ya sna'beyex awo'tanic stuquel; como te bin bayel sc'oblal yu'un winiquetic, ihlaybil yu'un te Diose.

¹⁶Te Ley soc te Jalwanejetic la yich'ic halbeyel sc'oblal ha to c'alal ta Juan. Ta hich ora hahch ta yalel te lec yach'il c'op yu'un te cuentahinel yu'un Dios, soc spisilic yac yac'belic fuersa ta ochel tey a.

¹⁷Ma ba wocol ya xlaj te ch'ulchan soc te bahlumilal, ha wocol ya xlaj junuc tilde[12] yu'un te Ley.

¹⁸Te mach'a ya sch'ay hilel yihnam soc ya yic' yan ants, yac me ta antsiwej; soc te mach'a ya yic' yihnamin te ants ch'ayot hilel yu'un smamalal, yac me ta antsiwej.

¹⁹Ay jtuhl jc'uhlej winic te ya slap chi'in yaxal pac' soc fino-pac', soc jujun c'ahc'al ya spas q'uin.

²⁰Soc ay jtuhl jc'ambajel, Lázaro sbihil, metsel ta sti'il sna te jc'uhlej, scohtol sbaq'uetal ay ta c'a'el chin.

²¹Yo'tanuc ya swe' te xeht'elul swe'el ya xluhbaj cohel ta ye'tal smesa te jc'uhleje. Ya xtal ta lec'ticlambeyel ta ts'i'etic te sc'a'ele.

²²C'oht yorahil te cham te jc'ambajel, soc ic'ot bahel ta sts'ehl Abraham yu'un te ch'ul a'batetique; soc ha nix hich cham te jc'uhlej winic soc la yich' muquel.

²³Ta stsobojibal mach'atic chamenic, te banti ay ta wocol, la shach sit, la yil namal ay te Abraham soc te ay ta sts'el te Lázaro.

²⁴Ha yu'un hich la yawtay: Jtat Abraham, c'uxultayawon, ticombon tal te Lázaro, ac'a yahts'es tal sni'il yal sc'ab ta ha' yu'un ya sicubtesbon cac' a, yu'un bayel yacon ta wocol ta c'ahc' li'i, xchi ta aw.

²⁵Pero halbot yu'un te Abraham: Jnich'an, na'a me te bayel bin lec la awich' te c'alal cuxulat a, yan te Lázaro ay bayel swocol; pero yo'tic a'botix smuc'ul yo'tan li'i, yan te ha'ate, ayat ta wocol.

²⁶Soc ay muc'ul xahab ac'bil ta ohlil cu'untic, ha yu'un te mach'atic ya sc'an ya xc'axic bahel ta banti ayex ma xhu' yu'unic, soc te mach'atic ayic ta banti ayex, ma xhu' ya xc'axic tal li'i, xchi.

²⁷Ha yu'un la yal te winique: Awocoluc, jtat Abraham, ticombon bahel ta sna jtat te Lázaro,

²⁸yu'un ay to ho'tuhl quermanotac, ac'a yalbe ya'iyic scuenta yu'un ma ba ya xtalic li' ta banti ay tulan wocol, xchi.

²⁹Yich'ojic te shun Moisés soc te jalwanejetic, ha ac'a ya'iybeyic sc'op, xchi te Abraham.

³⁰La yal te winique: Ma'uc, jtat Abraham, pero te ayuc mach'a cha'cuxajem tal te ya xhalbot ya'iyic yu'un, hich to ya suhtes yo'tanic a, xchi.

³¹La yal te Abraham: Teme ma sc'an ya ya'iybeyic bin la yal te Moisés soc te jalwanejetic, ma ba ya xc'oht ta yo'tanic aunque ay mach'a ya xcha'cuxaj tal ta yohlil te mach'atic chamenique, xchi.