Read Tzeltal San Lucas 19 Bible Online

San Lucas 19 - Tzeltal bible

San Lucas 19

¹Te Jesús och ta Jericó, soc yac ta c'axel bahel ta pueblo.

²Ay jtuhl winic, Zaqueo sbihil, scuentahinej jc'an-patanetic, soc jc'uhlej.

³Yo'tanuc ya yil te Jesús, pero ma ba la sta ta ilel ta scaj te ay tsobolic, yu'un comil winic.

⁴Ha yu'un nahilij bahel ta ahnimal, mo ta sicómoro-te' ta yilel te Jesús, yu'un tey stojol yac ta talel a.

⁵C'alal c'oht tey a te Jesús, la shach mohel sit, hich la yalbe: Zaqueo, cohan tal ta ora, yu'un ya xc'ohon ta ana yo'tic, xchi.

⁶Hich co tal ta ora, tse'el yo'tan la yic' ta sna.

⁷C'alal hich la yilic te ants-winiquetic, spisil hahchic wulajanel yu'un, hich la yalic: Och ta sna te mach'a jmulawil, xchihic.

⁸Tehc'aj te Zaqueo, la yalbe te Jesús: Ilawil, Cajwal, ya jq'uebembe pobrehetic ohliluc te jbiluque; soc teme ay mach'a jlo'loybeyej staq'uin, chaneb buelta sjol ya jsutbe, xchi.

⁹Hich halbot yu'un te Jesús: Yo'tic hulemix colel ta na ini, como ha nix sts'umbal Abraham;

¹⁰como te Nich'anil ay ta scuenta winic tal sle soc tal scoltay te mach'atic ch'ayemique, xchi.

¹¹Laj ya'iybelic a, c'oponotic xan ta sloc'ombahil c'op yu'un te Jesús, yu'un nopol ya xc'ohtic ta Jerusalén, soc scuyojic te ora ya xchicnaj te cuentahinel yu'un Dios.

¹²Hich la yal: Ay jtuhl winic ich'bil ta muc' te baht ta namal yu'un ya yich' ya'tel ta ajwalil, patil ya suht tal.

¹³La yic'ticlan tal lajuntuhl a'batetic yu'un, la yac'ticlambe jujun mina-taq'uin ta jujutuhl, hich la yalbe: A'tejanic soc, ha to c'alal ya suhton tal, xchi.

¹⁴Pero p'ajot yu'un te mach'atic cuentahimbilic yu'un, ta spat nax la sticonic bahel winiquetic te c'oht yalic: Ma jc'ancotic te ya x'och ta ajwalil cu'uncotic, xchihic c'ohel.

¹⁵C'alal suht tal ta yich'el ya'tel ta ajwalil, la sticonlan ta iq'uel tal te lajuntuhl a'batetic te la yac'ticlambe hilel taq'uin, yu'un ya sna' bin ut'il a'tejic ta tuhlultuhl.

¹⁶Te mach'a nahil tal, hich la yal: Cajwal, te mina awu'un, ha lajuneb mina jolon cu'un, xchi.

¹⁷Lec ay, lequil a'batat. Te bin ut'il jun awo'tan la acuentahin te bin jteb la jca'bat acuentahin, ya ca'batix acuentahin lajunpahm pueblo, xchi te yajwal.

¹⁸Tal te yane, hich hul yal: Cajwal, te mina awu'un, ha ho'eb mina jolon cu'un, xchi.

¹⁹Ya ca'bat acuentahin ho'pahm pueblo, xchi xan te yajwale.

²⁰Tal yan, hich hul yal: Cajwal, li' ay te mina awu'un; la jq'uejbat, la jpots ta chuhquilal,

²¹como la jxi'at yu'un tulan winicat, yu'un yac awich' te bin ma ha'ucat awac'oj soc yac atsob te bin ma ha'ucat ats'unoj, xchi.

²²Ha yu'un halbot yu'un te yajwal: Chopol a'batat, ta scuenta nix ac'op te ya quich'at ta c'op. Teme la ana' te tulan winicon te ya quich' te bin ma ho'ucon cac'oj soc ya jtsob te bin ma ho'ucon jts'unoj,

²³¿bin yu'un ma ba la awotsesbon ta banco te jtaq'uin scuenta yu'un te c'alal suhton tal ts'acal la jquich' soc sjol? xchi.

²⁴Hich la yalbe te mach'atic tey ayic a: Pojbeyahic te mina yich'oj, a'beyahic te mach'a yich'oj te lajuneb mina, xchi.

²⁵Cajwal, ayix lajuneb mina yu'un, xchihic.

²⁶La yal te ajwalil: Ya calbeyex, spisil mach'a ayix bin ay yu'un, ya me x'a'bot xan yan; pero te mach'a mayuc bin ay yu'un, ya xpojbot te bin jteb yich'oje.

²⁷Soc te jcontratac te ma sc'anic te ya x'ochon ta ajwalil yu'unic, ic'ahic tal li'i, ac'a yich' xot'ticlambeyel sjolic ta jtojol, xchi.

²⁸C'alal laj yo'tan ta yalel ini, mo bahel ta Jerusalén, ha nahil bahel yu'unic.

²⁹C'alal nopol ya xc'oht ta Betfagé soc Betania, ta wits Olivohetic sbihil, la sticon bahel cheb jnopojeletic yu'un,

³⁰hich la yalbe bahel: Bahanic ta tut pueblo chican ini; ta yochibal chucul ya xc'oht atahic tut burro te mayuc mach'a mohem a; tilahic soc ic'ahic tal.

³¹Teme ay mach'a ya sjoc'obeyex: ¿Bistuc awu'unic yac atilbelic? teme xchihe, hich yac awalbeyic: Ha ya xtuhun yu'un te Cajwaltic, xchi.

³²Hich bahtic te mach'atic ticonotic bahel, hich nix c'oht stahic a te bin ut'il halbotique.

³³Te c'alal yac stilbelic a te tut burro, hich halbotic yu'un te yajwal: ¿Bistuc awu'unic te yac atilbelic te tut burro? xchi.

³⁴Ha ya xtuhun yu'un te Cajwaltique, xchihic.

³⁵Hich la yic'beyic tal ta stojol Jesús, la ya'beyic sempatin smuc'ul-c'u'ic te tut burro, tey la smohtesic a te Jesús.

³⁶Soc ay la slimticlanic smuc'ul-c'u'ic ta be ta banti yac ta behel.

³⁷C'alal nopol ya xc'ohtix ta banti cohel bahel ta Wits yu'un Olivohetic, spisil te ipal jnopojeletic tse'el yo'tanic hahch yalbeyic yutsilal Dios ta tulan aw yu'un spisil te bintic jelawen yutsil pasbot yilique.

³⁸Hich la yalic: ¡Bayel me yutsil te ajwalil te yac ta talel ta scuenta sbihil te Cajwaltique! ¡Lamaluc me q'uinal ta ch'ulchan soc ayuc yutsilal ta toyol! xchihic ta aw.

³⁹Ay fariseohetic ta yohlil te ants-winiquetic te la yalic: Maestro, coma te jnopojeletic awu'un, la yutic.

⁴⁰Ya calbeyex, teme ya sch'abic ta spisilic, ha ya xhahchic ta aw te tonetique, xchi te Jesús.

⁴¹Te c'alal c'oht ta nopol Jerusalén soc te c'alal la yil, la yoq'uetay,

⁴²hich la yal: ¡Te ayuc bin ut'il la ana' ta c'ahc'alel ini bin ut'il ya xlahmaj q'uinal awu'un! Pero yo'tic macbil ta asit, ma ba yac awil.

⁴³Ya me sta yorahil te ya xtalat ta joytayel yu'un acontrahic, buen macbil ta bayuc ya xc'ohat yu'unic;

⁴⁴ya me sjinat cohel c'alal ta lum soc te awal-anich'nab te tey ayic a, soc ni junuc ton cajal ya xhil ta sba yan ton, como ma ba la ana' te bin ora talat ta ilel, xchi.

⁴⁵Och bahel ta templo te Jesús, hahch stenticlan loq'uel spisil te mach'atic yacalic ta chombajel soc ta mambajel tey a,

⁴⁶hich la yalbe: Hich ts'ihbabil: Te Jnahe, ha snahul sc'oponel Dios, xchi, pero te ha'exe la ac'atp'uniquix ta sch'en j'eleq'uetic, la yut.

⁴⁷Jujun c'ahc'al la ya'iy p'ijubteswanej ta Templo; pero te principal sacerdotehetic, escribanohetic soc principaletic yu'un te pueblo yac schapbelic bin ut'il ya smilic.

⁴⁸Pero ma ba weht yu'unic bin ya yutic, como spisil te pueblo jun yo'tanic yac ya'iybelic te sc'ope.