Read Tzeltal San Lucas 22 Bible Online

San Lucas 22 - Tzeltal bible

San Lucas 22

¹Nopol sta yorahil te Q'uin yu'un Pan te ma ba yich'oj levadura, te ha Pascua sbihil.

²Te principal sacerdotehetic soc escribanohetic yac slehbelic bin ut'il ya smilic te Jesús, como ha xi'ojic te ants-winiquetique.

³Och Satanás ta yo'tan te Judas, te Iscariote yan sbihil, te ha jtuhl ta slahchaytuhlulic;

⁴ha baht sc'opon te principal sacerdotehetic soc jtsobawetic yu'un jcanan-templo, la schap soc bin ut'il ya yac' ta c'abal te Jesús.

⁵Tse'el yo'tanic yu'un, la schapic te ya ya'beyic taq'uin.

⁶Lec la ya'iy te Judas, hich hahch sle bin ya yut ya yac' ta c'abal c'alal mayuc mach'a ay a.

⁷La sta yorahil te Q'uin yu'un Pan ma ba yich'oj levadura, te ha yorahil ya sc'an ya yich' milel a te jcolel tuminchij scuenta Pascua.

⁸Te Jesús la sticon bahel te Pedro soc Juan, hich la yalbe: Bahan, chahpanahic te Pascua yu'un ya jwe'tic, xchi.

⁹La sjoc'obeyic: ¿Banti yac ac'an ya jchahpancotic? xchihic.

¹⁰Halbotic yu'un te Jesús: Te c'alal ya x'ochex ta pueblo, ya xtal stahex jtuhl winic sq'uechoj jun q'uib ha'; t'unahic bahel c'alal ta na ta banti ya x'och,

¹¹hich me ya xc'oht awalbeyic te yajwal na: La yal te Maestro: ¿Banti ay te jtsahl ana ta banti ya jwe' te Pascua soc te jnopojeletic cu'une? xchihanic.

¹²Hich ya ya'beyex awilic muc'ul stsahlul sna ta scha'cajal te chahpambilix yu'un; tey me xachahpanic a, xchi.

¹³Ha yu'un loq'uic bahel soc hich c'oht stahic te bin ut'il halbotique; tey la schahpanic a te Pascua.

¹⁴C'alal la sta yorahil, te Jesús och ta we'el ta mesa soc te jpuc-c'opetic yu'un.

¹⁵Hich halbotic yu'un: ¡Bayel hich la sc'an co'tan te ya joquinex ta swe'el te Pascua ini te bin ut'il ma to ba c'axem te jwocole!,

¹⁶yu'un ya calbeyex te ma ba ya jwe'ix ha to c'alal ts'acal ya xc'oht ta pasel tey ta banti ay te cuentahinel yu'un Dios, xchi.

¹⁷Te Jesús la stsac te copa, la yalbe wocol Dios yu'un, hich la yal: Ich'ahic ini soc melbeya abahic,

¹⁸yu'un ya calbeyex te ma ba ya cuch'ix ha'i ya'lel ts'usub ini ha to c'alal ya xtal te cuentahinel yu'un Dios, xchi.

¹⁹Ha nix hich la stsac te pan, la yalbe wocol Dios yu'un, la xet' soc la spucticlambe, hich la yal: Ha jbaq'uetal ini te ac'bil ta acuentahic; pasahic ta scuenta jna'ojibal, xchi.

²⁰Ha nix hich te c'alal laj yo'tanic ta we'el, la stsac te copa, hich la yal: Te copa ini ha te yach'il chapbil-c'op ta scuenta jch'ich'el te ya yich' malel ta acuentahic.

²¹Pero li' joc ta we'el ta mesa te mach'a ya yac'on ta c'abal.

²²Melel te Nich'anil ay ta scuenta winic hich ya xbaht te bin ut'il halbil sc'oblal, pero ¡ay me swocol te mach'a ya x'ac'awan ta c'abal! xchi.

²³Hich te jnopojeletic talel c'axel la sjoc'obe sbahic mach'a a te hich ya spase.

²⁴Soc hahch stij sbahic ta c'op yu'un mach'a a te muc' ya xc'oht.

²⁵Hich halbotic yu'un te Jesús: Te ajwaliletic yu'un te nacionetic ya spasic ta mandar te mach'atic ay ta scuentahic; soc te jcuentahinwanejetic yu'unic ya xhalot sc'oblalic te ha te mach'atic lec bin ya spasic ta stojol te yantique.

²⁶Pero ma me hichuquex te ha'exe; te mach'a muc' ta awohlilic, hichuc me te bin ut'il ihts'inal, soc te mach'a jpasaw ta mandar, hichuc me te bin ut'il mach'a ay ta a'batinel.

²⁷¿Mach'a yac awa'iyic a te muc' sc'oblal, ha bal te mach'a ya shuhcan sba ta we'el ta mesa o ha bal te mach'a ay ta a'batinel? ¿Ma bal ha'uc te mach'a ya shuhcan sba ta we'el ta mesa? Pero ho'on hich ayon ta awohlilic te bin ut'il mach'a ay ta a'batinel.

²⁸Ha'ex te mach'a jun awo'tanic ta jtojol te c'alal ayon ta contrahinel a.

²⁹Ha yu'un ya ca'beyex awa'telic ta jcuentahinwanej, hich te bin ut'il a'bibilon ca'tel ta jcuentahinwanej yu'un te Jtate,

³⁰scuenta yu'un ya xwe' x'uch'ex ta mesa cu'un ta banti ayon ta cuentahinwanej soc ya xhuhcajex ta muc'ul huctajibaletic ta schahpanel te lahchaychahp yu'un Israel, xchi.

³¹Soc la yal xan te Cajwaltic: Simón, Simón, la sc'anexix te Satanás yu'un ya yic'ayex hich te bin ut'il trigo;

³²pero la jc'ambeyix Dios te manchuc ya xch'ay sch'uhunel awo'tan; soc c'alal suhtematix tal a, a'beya yich' yip yo'tan te awermanotaque, xchi.

³³La yal te Pedro: Cajwal, ma ha'uc nax chapalon te ya joquinat bahel ta cárcel, ha nix hich chapalon ya joquinat ta milel, xchi.

³⁴Halbot yu'un te Jesús: Pedro, ya calbat te ma to x'oc' mut yo'tic a te yac awal oxeb buelta te ma ba yac ana'bon jba, xchi sc'oblal.

³⁵Soc la yalbe te jnopojeletic: Te c'alal la jticonex ta behel te ma ba la jca'beyex awich'ic bahel achu'uyic, achojaq'uic soc atepic, ¿ay bal bin la spasex falta? xchi. Mayuc, xchihic.

³⁶Pero yo'tic te mach'a ay sbolsa, ac'a yich' bahel, soc nix schojac'; soc te mach'a mayuc espada yu'un, ac'a schon smuc'ul-c'u', ac'a sman espada a.

³⁷Como ya calbeyex te ya sc'an ya xc'oht ta pasel ta jtojol te bin ts'ihbabil: La yich' ahtayel soc jc'axun-mandaretic, te xchihe, como ya me xc'oht ta pasel te bin ts'ihbabil hilel jc'oblal, xchi te Jesús.

³⁸La yalic te jnopojeletique: Cajwal, li' ay cheb espada, xchihic. Tic' abi, xchi te Jesús.

³⁹Loc' bahel te Jesús, baht ta Wits yu'un Olivohetic, hich bin ut'il c'ahyem ta spasel; soc t'unot bahel yu'un te jnopojeletic yu'un.

⁴⁰C'alal c'oht tey a, hich la yalbe te jnopojeletique: C'oponahic Dios scuenta yu'un ma ba yac atahic sujel ta mulil a, xchi.

⁴¹Hich spimil jahc bahel te bin ut'il ay ta ch'ojel ton, tey c'oht squejan sba ta sc'oponel Dios a,

⁴²hich la yal: Jtat, teme hich ya sc'an awo'tan, ma me xc'oht ta jcuenta te copa ini; pero ma me ha'uc ya xc'oht ta pasel te bin ya sc'an co'tan ho'on, ha ac'a c'ohtuc ta pasel te bin ya sc'an awo'tan te ha'ate, xchi.

⁴³Chicnaj tal ta ch'ulchan ch'ul a'bat yu'un ya ya'be yip yo'tan.

⁴⁴Te bin ut'il bayel yac ta wocol, la yac' xan fuersa ta sc'oponel Dios, sjel ta ch'ich' xt'uhlajan cohel schic' ta lum.

⁴⁵C'alal laj yo'tan ta sc'oponel Dios, suht tal ta banti ay te jnopojeletic yu'un, wayalic a c'oht sta, yu'un luhbenic yu'un mel-o'tan.

⁴⁶Hich la yalbe: ¿Bin yu'un wayex? Hahchanic, c'oponahic Dios scuenta yu'un ma ba yac atahic sujel ta mulil a, xchi.

⁴⁷Yac to ta c'op a te Jesús, hulic ta tahel yu'un bayel winiquetic. Ha j'ic'aw yu'unic te Judas sbihil, te jtuhl ta slahchaytuhlul te jnopojeletic; nohpoj tal ta stojol Jesús yu'un ya yuhts'uy.

⁴⁸Hich halbot yu'un te Jesús: Judas, ¿ta scuenta bal uts'uyel yac awac' ta c'abal te Nich'anil ay ta scuenta winic? xchi.

⁴⁹C'alal la yilic te mach'atic sjoquinejic Jesús te bin ya x'och ta pasel, hich la yalbeyic: Cajwal, ¿ya bal ca'betic espada? xchihic.

⁵⁰Ay jtuhl te la yehchentesbe ya'bat te muc'ul sacerdote, la sbojbe loq'uel te swa'el-chiquin.

⁵¹Pero hich la sjac' te Jesús: Teyuc a, ma xawa'beyix, la yut. La spicbe schiquin, hich lecub.

⁵²Te Jesús la yalbe te principal sacerdotehetic, te jtsobawetic yu'un te jcanan-templo, soc te mamaletic te talemic ta tsacaw: ¿Yu'un bal j'elec'on te chapalex ta espada soc ta te' te tal atsaconique?

⁵³Jujun c'ahc'al la joquinex ta Templo, ma ba la atsaconic tey a; pero la stahix yorahil te ya xhu' awu'unic soc ha yorahil te ay yip te yihc'al q'uinale, la yut.

⁵⁴La stsaquic te Jesús, la yiq'uic bahel ta sna te muc'ul sacerdote. Namts'ac t'unot bahel yu'un te Pedro.

⁵⁵La snup'ic c'ahc' ta yohlil amac', la shuhcan sbahic ta c'atimal; ha nix hich te Pedro la shuhcan sba ta yohlilic.

⁵⁶Ay jtuhl criada, c'alal la yil te hucul ta ti'c'ahc' te Pedro, chamen la yil, hich la yal: Ha nix smohlol ini, xchi.

⁵⁷Pero te Pedro la smuc ta yo'tan, hich la yal: Ants, ma jna'be sba, xchi.

⁵⁸Jts'ihn a, ilot yu'un yan: Ha'at nix amohlol, xchi. La sjac' te Pedro: Winic, ma ho'ucon, xchi.

⁵⁹Jun wan ora ta patil halbot yu'un yan: Mero melel ha nix smohlol ini, como ha galileo-winic, xchi.

⁶⁰La yal te Pedro: Mero ma jna' bin yac awal, la yut. Yac to ta c'op a, oc' mut.

⁶¹La sut sba te Jesús, la yil te Pedro; hich hul ta yo'tan te Pedro te hich halbot yu'un te Cajwaltic: Ma to x'oc' mut a te oxeb buelta yac amucon ta awo'tan, te xchihe.

⁶²Loc' bahel te Pedro, bayel la yoq'uetay sba yu'un.

⁶³Te winiquetic te yac scanantaybelic te Jesús, la slabanic soc la smajic.

⁶⁴La smacbeyic sit soc la sjoc'obeyic: Hala ca'iycotic, ¿mach'a a te la smajate? xchihic.

⁶⁵Soc bayel to xan bintic la yalbeyic ta labanel.

⁶⁶Ta sacubel q'uinal la stsob sbahic te mamaletic yu'un te pueblo, te principal sacerdotehetic soc te escribanohetic, la yiq'uic bahel ta stojol te jtsohb jchahpanwanejetic.

⁶⁷La sjoc'obeyic: ¿Ha'at bal Cristohat? Hala ca'iycotic, la yutic. La sjac' te Jesús: Teme ya calbeyex, ma ba yac ach'uhunic;

⁶⁸soc teme ay bin ya joc'obeyex, ma ba yac ajac'bonic.

⁶⁹Pero yo'tic te Nich'anil ay ta scuenta winic ya xbaht shuhcan sba ta swa'el-c'ab te Dios te spisil ya xhu' yu'un, xchi.

⁷⁰Hich la yalic spisilic: ¿Ha'at bal Snich'anat te Diose? xchihic. Ha'ex nix yac awalic te ho'one, xchi.

⁷¹Ha yu'un la yalic: ¿Bin xan stuc cu'untic yan testigo? Como ho'otic nix la jca'iytiquix te bin la yalixe, xchihic.