Read Tzeltal San Lucas 24 Bible Online

San Lucas 24 - Tzeltal bible

San Lucas 24

¹Ta buen sab ta sba c'ahc'alil semana te antsetic talic ta muquenal, yich'ojic tal te bin sumet yic' te chahpambil yu'unique.

²Balch'umbilix loq'uel a c'oht stahic te ton macbil a te muquenale.

³C'alal ochic bahel, ma ba la stahic tey a te sbaq'uetal te Cajwaltic Jesús.

⁴Yacalic na'etel a, xtehc'lujet c'ohel ta sts'ehlic cheb winiquetic te xlipet sacal sc'u' spaq'uic.

⁵Te bin ut'il tojic xiwel soc te la snijan sbahic ta lum yu'un, hich halbotic: ¿Bin yu'un yac alehic ta yohlil chamen winiquetic te mach'a cuxulixe?

⁶Ma ba li' ayix, cha'cuxajix. Na'ahic me te hich la yalbeyex te c'alal ay to ta Galilea a:

⁷Ya me x'ac'ot ta sc'ab jmulawiletic te Nich'anil ay ta scuenta winic soc ya xlaj ta milel ta cruz, pero ta yoxebal c'ahc'al ya me xcha'cuxaj tal, xchihic.

⁸Hich te antsetic la sna'ic te bin yaloj te Jesús,

⁹hich suhtic bahel, c'oht yalbeyic te buluchtuhl (11) soc spisil te yantic te bin c'ohem ta pasele.

¹⁰Ha te María Magdalena, Juana, te María te snan Jacobo, soc te yantic antsetic te c'oht yalbeyic te jpuc-c'opetic te bin c'ohem ta pasele.

¹¹Pero ma ba ch'uhumbot sc'opic, cuybot ta howilc'op te bin c'oht yalique.

¹²Pero hahch te Pedro, ahnimal baht ta muquenal, la snijan sba ta yilel, ha nax la yil te pac' potsbil sbaq'uetal a, suht bahel ta na, xcham yo'tan yu'un te bin c'ohemix ta pasele.

¹³Ha nix sc'ahc'alel a ay cha'tuhlic te yacalic ta bahel ta jun tut pueblo, Emaús sbihil, te jteb ma sta oxeb legua yiloj sba soc Jerusalén.

¹⁴Yac yalbelic bahel te bin c'ohemix ta pasele.

¹⁵Te c'alal yacalic ta yalel a bin ut'il ay, nohpoj tal te Jesús, la sjoquinic ta behel.

¹⁶Pero tapbot sitic, hich ma ba la sna'beyic sba.

¹⁷Hich joc'obotic yu'un te Jesús: ¿Bin yac awalbel abahic te c'alal yaquex ta behel, soc bin yu'un yaquex ta amel-o'tan? xchi.

¹⁸La sjac' te jtuhl, te Cleofas sbihil: ¿Yu'un bal ha'at nax atuquel te jbehyomat ta Jerusalén te ma ba ana'oj bintic c'oht ta pasel wojey cha'jey tey a? xchi.

¹⁹¿Binti a? xchi te Jesús. Ha te Jesús te talem ta Nazaret, te ha jalwanej, te ay bayel yip ya'tel soc yip sc'op ta stojol Dios soc ta stojol spisil ants-winiquetic,

²⁰soc te bin ut'il te principal sacerdotehetic soc te principaletic cu'untic la yaq'uic ta milel ta cruz.

²¹Pero te ho'otcotic smuc'ulinej co'tancotic te ha te mach'a ya yac' ta libre te Israel. Pero ma ha'uc nax ini, ha yoxebalix c'ahc'al a te hich c'oht ta pasel.

²²Soc ay cha'oxtuhl cantsilelcotic te la yac' xchamet co'tancotic, yu'un ta buen sab c'oht yilic te muquenal;

²³te bin ut'il ma ba la stahbeyic te sbaq'uetal, suhtic tal yalic te la yilic ch'ul a'batetic te halbotic yu'unic te ha cuxulix.

²⁴Soc ay jmohlolcotic te bahtic ta muquenal, hich nix c'oht stahic a te bin la yal te antsetic, pero ma ba la yilic stuquelic te Jesús, xchihic.

²⁵Hich halbotic yu'un te Jesús: ¡Wocol ya xc'oht ta awo'tanic, soc wocol yac ach'uhunic spisil te bintic yalojic te jalwanejetique!

²⁶¿Ma bal hichuc la sc'an te ya xc'ax swocol te Cristo, soc patil ya x'och ta utsilal yu'un?

²⁷Hich hahch scholbe ya'iyic c'alal Moisés soc spisil te jalwanejetic te bintic ts'ihbabil ta Shun Dios te ya yalbe sc'oblale.

²⁸C'alal c'ohtic ta tut pueblo ta banti yacalic ta bahel, te Jesús c'an sohluc stuquel.

²⁹Pero la yalbeyic wocol te yacuc sjoquinic hilel, hich la yalic: Joquinawotcotic hilel, yu'un mahlix c'ahc'al, nopol ya x'ihc'ubix q'uinal, xchihic. Hich och bahel sjoquinic.

³⁰Te Jesús, c'alal ay ta mesa soc, la stsac te pan, la yalbe wocol Dios yu'un, la xet' soc la spucbe.

³¹Hich jambot sitic, la sna'beyic sba; pero ora ch'ay ta sitic.

³²Talel c'axel hahch yalbe sbahic: ¿Ma bal ayuc yutsil c'oht ta co'tantic te c'alal la sc'oponotic ta be soc te c'alal la sjam ca'iytic te Shun Dios? xchihic.

³³Hich hahchic ta behel ta ora, suhtic bahel ta Jerusalén. Stsoboj sbahic a c'oht stahic te buhluchtuhlic soc te yantic sjoquinejic,

³⁴te hich yac yalbelic: Melel nix a te cha'cuxajix te Cajwaltic, soc la yaq'uix sba ta ilel ta stojol Simón, xchihic.

³⁵Hich te cha'tuhlic hahch smelbe ya'iyic te bin c'oht ta pasel ta be, soc te tey la sna'beyic sba a te c'alal la xet' te pane.

³⁶Hich yac yalbelic a, te Jesús c'oht stehc'an sba ta yohlilic, hich la yalbe: Lamaluc me q'uinal yac awa'iyic, xchi.

³⁷Tojic xiwel soc nihc yo'tanic yu'un, como la scuyic ta yesomba te yac yilbelique.

³⁸Pero halbotic yu'un te Jesús: ¿Bin yu'un yaquex ta xiwel, soc bin yu'un te wocol ya sch'uhun awo'tanic?

³⁹Ilbon awilic jc'ab soc coc, te ho'on nix. Picawon awa'iyic, ilawonic; como te yesomba mayuc sbaq'uetal soc mayuc sbaquel, yan te ho'one ay cu'un hich te bin ut'il yac awilonic, xchi.

⁴⁰Te c'alal hich la yal, la ya'be yilic te sc'ab soc te yoque.

⁴¹Te bin ut'il ma to ba la sch'uhunic ta scaj tse'el yo'tanic soc ta scaj te xcham yo'tanic yu'un, hich halbotic yu'un Jesús: ¿Ay bal jtebuc we'elil awu'unic li'i? xchi.

⁴²Hich la ya'beyic jaht wohbil chay soc jxeht' chab.

⁴³La stsac te Jesús, la swe' ta scomonsitic.

⁴⁴Patil hich la yalbe: Hich ay te bin la jcalbeyex te c'alal joquex to a, te ya sc'an te ts'acal ya xc'oht ta pasel te bin ya yalbon jc'oblal te ts'ihbabil ta Ley yu'un Moisés, ta shun jalwanejetic soc ta salmohetic, xchi.

⁴⁵Hich la sjambe yo'tanic scuenta yu'un ya xc'oht ta yo'tanic te bin ya yal te Shun Diose.

⁴⁶Hich la yalbe ya'iyic: Hich ts'ihbabil hilel te la sc'an te ya xc'ax swocol te Cristo soc ta yoxebal c'ahc'al ya xcha'cuxaj tal ta yohlil te mach'atic chamenic;

⁴⁷soc ya me yich' puhquel ta halel ta scuenta sbihil ta spisil nacionetic sc'oblal te suhtesel-o'tanil soc te perdón yu'un mulil, ha ya xhahch bahel ta Jerusalén.

⁴⁸Ha'ex testigohex yu'un te bin c'ohtix ta pasel.

⁴⁹Soc ho'on ya me jticombeyex tal te bin yaloj te Jtat ya ya'beyex; pero hilanic ta Jerusalén ha to c'alal ya xhul ta acuentahic te yu'el Dios ya xtal ta toyol, xchi.

⁵⁰Te Jesús la yic' bahel te jnopojeletic c'alal ta Betania, la stoy sc'ab soc la yac'ticlambe hilel bendición.

⁵¹Te c'alal yac yac'bel bendición a, la yihquitay hilel, hich ic'ot mohel ta ch'ulchan.

⁵²C'alal laj yich'belic ta muc', bayel yutsil yo'tanic suhtic bahel ta Jerusalén.

⁵³Spisil ora ayic ta Templo ta yalbeyel yutsilal te Diose.