Read Tzeltal San Lucas 6 Bible Online

San Lucas 6 - Tzeltal bible

San Lucas 6

¹Ta sc'ahc'alel cux-o'tan c'ax Jesús ta banti ay trigohiltic; te jnopojeletic yu'un la sjixticlanic trigo, la sc'uticlan ta sc'abic soc la sc'uxic.

²Ay cha'oxtuhl fariseohetic hich la yalbeyic: ¿Bin yu'un te yac apasbelic te bin ma lecuc ta pasel ta sc'ahc'alel cux-o'tan? xchihic.

³La sjac' te Jesús: ¿Yu'un bal ma ba awilojic ta Shun Dios te bin la spas te David te c'alal ay ta wi'nal soc te smohloltaque?

⁴Och bahel ta sna Dios, la stsac swe' te pan ac'bil ta stojol Dios te ha nax ya xhu' ya swe'ic te sacerdotehetic, soc la ya'be te mach'atic sjoquinej, xchi.

⁵Soc la yalbe xan: Te Nich'anil ay ta scuenta winic ha Ajwalil yu'un te sc'ahc'alel cux-o'tan, xchi.

⁶Yan buelta ta sc'ahc'alel cux-o'tan och ta sinagoga te Jesús soc hahch ta p'ijubteswanej. Ay jtuhl winic tey a te chamen schihal swa'el-c'ab.

⁷Te escribanohetic soc te fariseohetic yac stsahtaybel yilic teme ya slecubtes, yu'un hich ya stahbeyic smul a.

⁸Pero na'bot yo'tanic yu'un te Jesús, hich la yalbe te winic te chamen schihal sc'ab: Hahchan, tehc'an aba ta ohlil, xchi. Hich la stehc'an sba te winique.

⁹Hich halbotic yu'un te Jesús: Ay bin ya joc'obeyex: ¿Bin ya xhu' ta pasel ta sc'ahc'alel cux-o'tan, ha bal te bin lec o te bin ma lecuc? ¿Ha bal lec te scoltayel o te slajinel te cuxlejale? xchi.

¹⁰La yilticlan spisilic ta sjoyobal, hich la yalbe te winique: Xach'a ac'ab, xchi. Hich la spas, hich lecub te sc'abe.

¹¹Bayel ilinic yu'un, talel c'axel la yalbe sbahic bin ya yutic te Jesús.

¹²Ta hich ora baht ta wits ta sc'oponel Dios te Jesús, sjunal ahc'abal la sc'opon Dios tey a.

¹³C'alal sacub q'uinal la yic'ticlan talel te jnopojeletic yu'une, la stsa lahchaytuhl (12), ha jpuc-c'opetic sbihil c'oht yu'un:

¹⁴Ha te Simón, te Pedro yan sbihil a'bot yu'un, Andrés te yihts'in, Jacobo, Juan, Felipe, Bartolomé,

¹⁵Mateo, Tomás, Jacobo te snich'an Alfeo, Simón te a'bot sbihil Zelote,

¹⁶Judas te yihts'in Jacobo, soc Judas Iscariote, ha te la yac' ta c'abal te Jesuse.

¹⁷Te Jesús cohic tal soc, c'oht ta jun spamlej, joquimbil yu'un te jnopojeletic yu'un soc bayel winiquetic te talemic ta spahmal sq'uinal Judea, ta Jerusalén, ta ti'ti'mar yu'un Tiro soc Sidón, te talemic ta ya'iybeyel sc'op soc ta yac'bel sbahic ta lecubtesel yu'un schamelic;

¹⁸soc lecub spisil mach'atic uts'imbilic yu'un bohl espírituhetic.

¹⁹Spisil te ants-winiquetic c'an spiquic te Jesús, como yac ta loq'uel yu'el ta slecubtesel spisilic.

²⁰Jesús la shach sit, la yil bahel te jnopojeletic yu'un, hich la yal: Bayel me awutsilic ha'ex te pobrehex, como ha awu'unic te cuentahinel yu'un Dios.

²¹Bayel me awutsilic ha'ex te ayex ta wi'nal ta ora ini, como ya me xnoj ach'uhtic. Bayel me awutsilic ha'ex te yacalex ta oq'uel ta ora ini, como ya me stse'ejinex.

²²Bayel me awutsilic c'alal ya sp'ajex te ants-winiquetic, ya stenex loq'uel, ya yixta'c'optayex, soc ya yihlaybeyex abihilic ta scaj te Nich'anil ay ta scuenta winic.

²³Bayeluc me yutsil awo'tanic yu'un ta hich ora soc tse'eluc me awo'tanic yu'un, como muc' te mahtanil awu'unic ta ch'ulchan; como hich la spasbeyic te jalwanejetic te sme'statique.

²⁴¡Pero ay me awocolic, ha'ex te jc'uhlejex! como ayix smuc'ul awo'tanic.

²⁵¡Ay me awocolic ha'ex te nojel ach'uhtic ta ora ini! como ya me xwi'najex. ¡Ay me awocolic ha'ex te yacalex ta tse'ej ta ora ini! como ya me amel-awo'tanic soc ya me x'oq'uex.

²⁶¡Ay me awocolic ha'ex te lec ac'oblalic yu'un spisil yantic! como hich la spasbeyic te lotil jalwanejetic te sme'statique.

²⁷Pero ha'ex te yac awa'iybonic te jc'ope, ya calbeyex: C'ux me xawa'iy ta awo'tan te acontrahic, lec me bin yac apasbeyic te mach'atic ya sp'ajex;

²⁸lec me sc'oblal awu'unic te mach'atic chopol ac'oblalic yu'un, soc c'opombeyahic Dios te mach'atic ya yixta'c'optayex.

²⁹Te mach'a ya smajbat acho, ac'a smajbat schebal; soc te mach'a ya spojbat amuc'ul-c'u', a'beya ec te anahtil-c'u'e.

³⁰Mach'ayuc a te ay bin ya sc'ambat, a'beya; soc te mach'a ya yich'bat te bin ay awu'un, ma me xac'ambe suhtel.

³¹Te bintic ya sc'an awo'tanic te ya spasbeyex yantic, ha ni me hich xapasbeyic.

³²Teme hip c'ux yac awa'iy ta awo'tanic te mach'atic c'ux ya ya'iyex, ¿bin awutsilal yac atahic a? Hich nix ya spasic te jmulawiletique, c'ux ya ya'iy ta yo'tanic te mach'a c'uxic ta o'tanil yu'un.

³³Teme lec bin yac apasbeyic te mach'atic lec bin ya spasbeyex, ¿bin awutsilal yac atahic a? Hich nix ya spasic te jmulawiletique.

³⁴Soc teme ay bin yac awa'be smajan te mach'atic ya sutbeyex, ¿bin awutsilal yac atahic a? Hich nix ya smajambe sbahic te jmulawiletic, scuenta yu'un hich nix pajal ya sutbe sbahic a.

³⁵Ha yu'un c'ux me xawa'iy ta awo'tan te acontratac, pasbeyahic te bin lec, a'beyahic ta majanel, ma me xamahliyic te ay bin ya ya'beyex a. Hich muc' mahtanil yac awich'ic, soc hich yal-snich'anex te Mach'a toyol ay ya xc'ohex, como ay yutsil yo'tan ta stojol mach'atic ma sna'ic yalel wocol soc mach'atic chopol yo'tanic.

³⁶Ha yu'un te ha'exe a'iyahic me c'uxultaywanej, hich te bin ut'il jc'uxultaywanej te Atatique.

³⁷Ma me xawich'o-c'optayic yan, hich ma ba yac awich'ic ich'o-c'optayel. Ma me xawalbeyic smul yan, hich ma ba ya xhalot amulic a. Pasahic perdón, hich me ya xpasbotex perdón a.

³⁸A'beyahic, hich me ya x'a'botex: lec sp'isojbil, tembil, yuq'uilambil soc buen t'ocol yac awich'ic. Como te hich smuc'ul yac ap'is, hich nix yac awich' p'isbeyel, xchi.

³⁹Te Jesús la yalbe xan ya'iyic sloc'ombahil c'op: ¿Ya bal xhu' ya stojobtes ta be te mach'a pajal ts'o'sit soque? ¿Ma bal pajaluc ya xch'ayic ta ch'en soc?

⁴⁰Te jnopojel ma ha'uc toyol xan yu'un te maestro yu'une; pero spisil te mach'atic ts'acal la snopic, pajal ya xc'ohtic soc te maestro yu'unique.

⁴¹¿Bistuc yac awil te jwihts' c'a'pal ay ta sit te awermano, pero ma ba yac awil te ts'amte' ay ta asit te ha'ate?

⁴²¿Bin yu'unix a te hich yac awalbe te awermano: Hermano, a'bon jloq'uesbat te jwihts' c'a'pal ay ta asit, te xchihate, teme ma ba yac awil te ts'amte' ay ta asite? ¡Jchebal-o'tanat! Ha nahil xaloq'ues te ts'amte' ay ta asit, hich yac awil ta lec a te yac aloq'uesbe te jwihts' c'a'pal ay ta sit te awermanohe.

⁴³Mayuc lequil te' te ma lecuc sit ya yac'; soc mayuc te' te ma lecuc, te lec sit ya yaq'ue.

⁴⁴Como te jujutehc' te' ya xna'bot sba ta scuenta sit. Ma ba ya yich' tulel higo ta jpeht ch'ix, soc ma ba ya yich' tulel ts'usub ta ch'ixetic.

⁴⁵Te winic te lec yo'tan, ya sloq'ues tal te bin lec ay ta yo'tan. Yan te winic te ma lecuc yo'tan, ya sloq'ues tal te bin ma lecuc ay ta yo'tan, como ya xloc' tal ta ye te bin nojel ta yo'tane.

⁴⁶¿Bin yu'un te: Cajwal, Cajwal, xchihex teme ma ba yac apasic te bin ya calbeyexe?

⁴⁷Spisil te mach'atic ya xtalic ta jtojol, te ya ya'iybonic jc'op soc ya spas, ya calbeyex awa'iyic mach'a pajal soc.

⁴⁸Ha pajal soc te winic te la spas sna, c'ubul la shotbe sch'enal, la ya'be yich'o-ip ta sba ton. C'alal tal snojel ha', tulan hul ta tahel te nahe, pero ma ba hu' syuc'bel, como ipajem ta ton.

⁴⁹Yan te mach'a la ya'iybon jc'op pero teme ma ba la spas, ha pajal soc te winic te la scajan hahchel ta ba lum te snahe, mayuc yich'o-ip. Tulan hul ta tahel yu'un snojel ha', ora buch yu'un, jc'axel jihn te nahe, xchi.