Read Tzeltal Deuteronomio 1 Bible Online

Deuteronomio 1 - Tzeltal bible

Deuteronomio 1

¹Ha te c'opetic te la yal Moisés ta stojol spisil Israel ta jochol taquin q'uinal ta jehch muc'ul-ha' Jordán, ta Arabá, te snuhp'usitayej sba soc Suf, te j'ohlil ay yu'un Parán soc Tofel, Labán, Hazerot soc Dizahab.

²Ta be te ya xc'ax ta wits Seir ay bulucheb (11) c'ahc'al ta behentayel c'alal Horeb c'alal ta Cades-barnea.

³Ta cha'winic (40) ha'bil, ta sba c'ahc'alil yu'un te sbuluchebal (11) u, te Moisés la yalbe ya'iyic te snich'nab Israel spisil te bintic halbot yu'un Jehová;

⁴ha te c'alal tsalbilix a te Sehón ajwalil yu'un te amorreohetic, te nahinem ta Hesbón, soc te Og ajwalil yu'un Basán, te nahinem ta Astarot ta Edrei.

⁵Ta stojol banti ya xloc' tal c'ahc'al yu'un te Jordán, ta sq'uinal Moab, te Moisés hahch ta yalbeyel sc'oblal te mandariletic ini:

⁶Te Jehová te Dios cu'untic, hich la yalbotic ta Horeb: Bayelix tiempo te li' ayex ta wits ini.

⁷Bahanic ta witsiltic yu'un te amorreohetic soc spisil te q'uinaletic ta sjoyobal, ta Arabá, ta witsiltic, ta spamlejetic, ta Neguev, ta sti'il mar, ta sq'uinal te cananeohetic soc ta Líbano, c'alal ta muc'ul-ha' Éufrates.

⁸Ilawil, la jca'beyex te q'uinale; ochanic, u'untayahic te q'uinal te jc'axel la yal ta jamal te Jehová te ya ya'be te ame'atatic, ha te Abraham, Isaac soc Jacob, soc te patil al-nich'anetic yu'unique, xchi.

⁹Ta hich ora hich la jcalbeyex: Ma xhu' te jtuquel ya jcuentahinex.

¹⁰Te Jehová te Dios awu'unic la sp'oltesexix hich yipal te bin ut'il eq'uetic ayic ta ch'ulchan.

¹¹¡Te Jehová, te Dios yu'un te ame'atatic, ac'a p'ohluquex mil buelta xan a te bin ut'il ayex ta ora ini, soc ac'a ya'beyex bendición hich te bin ut'il yaloj!

¹²¿Bin ut'il ya xhu' cu'un te jtuquel ya jcuchbeyex awocolic, awihcatsic soc te c'opetic awu'unique?

¹³Tsahahic loq'uel ta awohlilic, ta jujuchahp awu'unic, winiquetic te ay sp'ijilic, te ya sna'ic q'uinal soc te ay snopojibal yu'unic, scuenta yu'un ya ca'be ya'telic ta jcuentahinwanej awu'unic, xchihon.

¹⁴Hich la ajac'bonic te jc'ope: Buen lec ta pasel te bin yac awale, xchihex.

¹⁵Ha yu'un la jquic' te príncipaletic ta jujuchahp awu'unic, ha te winiquetic te ay sp'ijilic soc te ay snopojibal yu'unic, la jca'be ya'telic ta jcuentahinwanej ta atojolic, ha jcuentahinwanejetic yu'un lajunwinic yoxbahc' (1,000), yu'un ho'winic (100), yu'un lajuneb yoxwinic (50), soc yu'un lajuntuhl (10), soc jtsobawetic yu'un jujuchahp awu'unic.

¹⁶Soc hich la jcalbe mandar te juecetic awu'unic: Ya me awa'iyic te c'op ay ta yohlil te awermanotac, stojil me xachahpanic te winic soc yermano, o soc jyanlum.

¹⁷Ma me tsahbiluc awu'unic te mach'a ya xtal ta chahpanel, pajal me xawa'iybeyic sc'op te mach'a peq'uel soc te mach'a muc' sc'oblal. Ma me ayuc mach'a yac axi'ic, como ha yu'un Dios te chahpanele. Te c'op te chuhcul yac awa'iyic ya me awich'ic tal ta jtojol, ho'on ya chahpan, xchihon.

¹⁸Ta hich ora la jcalbeyex spisil te bintic la sc'an yac apasique.

¹⁹Loc'otic tal ta Horeb, la jbehentaytic spisil te xiweltic sba muc'ul jochol taquin q'uinal te awilojic, ta sbehlal te witsiltic yu'un amorreohetic, hich te bin ut'il la spasotic ta mandar te Jehová te Dios cu'untic, hich c'ohotic ta Cades-barnea.

²⁰Hich la jcalbeyex: Hulemex tal ta witsiltic yu'un te amorreohetic, ha te ya ya'botic te Jehová te Dios cu'untique.

²¹Ilawil, te Jehová te Dios awu'un, la ya'batix te q'uinale. Bahan, u'untaya, hich te bin ut'il la yalbat te Jehová te Dios yu'un te ame'atatique; ma me xiwat soc ma me xpehc'aj awo'tan, xchihon.

²²Pero ta apisilic hich tal awalbonic: Ha lec ya jticontic bahel winiquetic te ya xbaht yilic tal te q'uinale. Te c'alal ya suhtic tal ya yalbotic banti behil ya sc'an ya xbohotic soc bin yilel te pueblohetic te banti ya xc'ohotic, xchihex.

²³Lec la jca'iy te bin la awalic. Hich la jtsa lahchaytuhl winiquetic ta awohlilic, jujutuhl ta jujuchahp.

²⁴Te winiquetic loq'uic bahel, mohic bahel ta witsiltic, c'ohtic ta spamlej yu'un Escol, la stsahtayic te q'uinale.

²⁵La stulbeyic sit te awal-ts'unubil yu'un te q'uinale, la yich'botic tal soc hich la yalbotic: Mero lequil q'uinal te ya ya'botic te Jehová te Dios cu'untic, xchihic.

²⁶Pero ma ba la ac'anic te mohex bahel, la atoy abahic ta stojol te smandar Jehová te Dios awu'unic.

²⁷Hahchex ta wulajanel ta anahilpaq'uic, hich la awalic: Ya yilintayotic te Jehová, ha scuentahil te la sloq'uesotic tal ta sq'uinal Egipto yu'un ya yac'otic ta sc'ab te amorreohetic, hich ya slajinotic.

²⁸¿Banti ya xbohotic? Te quermanotactic la spehc'ambotic co'tantic c'alal la yalic: Te ants-winiquetic ini ha muc' xan soc naht xan a te bin ut'il te ho'otique; ha muq'uic te pueblohetic yu'unic soc ay sts'ahculetic c'alal ta ch'ulchan; soc la jquilcotic te sts'umbal Anac, xchihex.

²⁹Ha yu'un la jcalbeyex: Ma xiwex, ma me xaxi'ic.

³⁰Te Jehová te Dios awu'unic, ha te mach'a ya xnahilij bahel awu'unic, ya me yac' guerra ta acuentahic, hich te bin ut'il spisil te bintic la spas ta acuentahic ta Egipto te la awilique.

³¹Ta jochol taquin q'uinal awilojic te Jehová te Dios awu'unic te la spetex tal, hich te bin ut'il jtuhl winic ya spet snich'an, ta spisil te be banti behenemex ha to c'alal hulex tal ta lugar ini, xchihon.

³²Pero aunque hich ay, ma ba la ach'uhunic te Jehová te Dios awu'unic,

³³te mach'a nahilij bahel awu'unic ta be ta scuenta c'ahc' ta ahc'abal soc ta tocal ta c'ahc'alel, yu'un ya ya'beyex awilic te banti ya xbehenex soc banti yac apas acampamentohic.

³⁴Te c'alal la ya'iybeyex ac'opic te Jehová, ilin yu'un soc jc'axel la yal ta jamal:

³⁵Ni jtuhluc winic yu'un ha'i chopol jcaj ts'umbalil ini ya xc'oht yil te lequil q'uinal te jc'axel la jcal ta jamal te ya ca'be te ame'atatique;

³⁶ha nax te Caleb snich'an Jefone ya me yil stuquel, soc ya ca'be soc snich'nab te q'uinal te banti behen, como jun yo'tan la st'un bahel te Jehová, xchi.

³⁷Soc te Jehová ilin ta jtojol ta acuentahic, hich la yalbon: Ha nix hichat ma ba ya x'ochat tey a.

³⁸Te Josué snich'an Nun, te mach'a yac yac'bel sba ta a'batinel awu'un, ha ya x'och stuquel. A'beya yip yo'tan, como ha me ya ya'be yich' te q'uinal te Israel.

³⁹Soc te alaletic awu'unic, te la awalic te ya me yich'ic tsaquel bahel, te alaletic awu'unic te ma to sna'ic stsahtayel te bin lec soc te bin ma lecuc, ha te ya x'ochic tey a; ya ca'beyic soc ha ya yich'ic.

⁴⁰Yan te ha'exe, suhtanic bahel, bahanic ta jochol taquin q'uinal ta sbehlal te Mar Rojo, xchi.

⁴¹Ha yu'un hich la awalbonic: La jta jmulcotic ta stojol Jehová. Ya xbohotcotic, ya cac'cotic guerra, hich te bin ut'il spisil smandar la ya'botcotic te Jehová te Dios cu'untic, xchihex. Hich jujutuhlex la atsaquic te awa'tejibic yu'un guerra, la acuyic te ma ba wocol ya xmohex bahel ta witsiltic.

⁴²Pero la yalbon te Jehová: Halbeya: Ma me xbahex soc ma me xawaq'uic guerra, como ma ba ayon ta awohlilic; scuenta yu'un ma ba ya stsalex a te acontrahique, xchi.

⁴³Hich la jcalbeyex, pero ma ba la awa'iybonic te jc'ope; la atoy abahic ta sc'axuntaybeyel te smandar Jehová, mohex bahel ta scuenta atoybahilic ta witsiltic.

⁴⁴Pero loq'uic tal stahex te amorreohetic te nahinemic tey ta witsiltic, la snutsex bahel hich te bin ut'il ya spas xux, la stsalex bahel ta Seir c'alal ta Horma.

⁴⁵Hich suhtex tal, la awoq'uetay abahic ta stojol Jehová, pero ma ba la ya'iybeyex ac'opic, ma ba la sts'ehchiquintayex.

⁴⁶Ha scuentahil te bayel c'ahc'al hilex ta Cades.