Read Tzeltal Deuteronomio 10 Bible Online

Deuteronomio 10 - Tzeltal bible

Deuteronomio 10

¹Ta hich ora la yalbon te Jehová: Wahluya cha'pehch tonetic hich te bin ut'il te yantic ta nahil to, mohan tal ta jtojol ta wits, soc pasbeya scaxahul ta te'.

²Ya jts'ihbay ta tonetic te c'opetic ayic ta pehchel tonetic ta nahil to te la awuy; ya me aq'uej ta scaxahul, xchi.

³Hich la jpas scaxahul ta acacia-te', soc la jwahluy cha'pehch tonetic hich nix te bin ut'il te yantic ta nahil to, hich mohon bahel ta wits, quich'oj mohel ta jc'ab te cha'pehch tonetique.

⁴Dios la sts'ihbay ta pehchel tonetic hich te bin ut'il la sts'ihbay ta nahil to, ha te lajuneb mandariletic te la yalbeyex te Jehová ta wits ta yohlil c'ahc', ta yorahil te tsobleje. Ha la ya'bon te Jehová.

⁵Hich suhton cohel tal ta wits, la jcotses te tonetic ta yutil te scaxahul te la jpase. Tey ayic a, hich te bin ut'il la spason ta mandar te Jehová.

⁶(Ta patil, te snich'nab Israel loq'uic bahel ta Beerot-bene-jaacán, bahtic ta Mosera; tey cham a te Aarón soc tey la yich' muquel a. Ha och ta sjelol ta sacerdotehil te snich'an, ha te Eleazar.

⁷Loq'uic bahel tey a, bahtic ta Gudgoda; loq'uic bahel ta Gudgoda, bahtic ta Jotbata, ha q'uinal te banti ay uc'umetic.

⁸Ha yorahil a te Jehová parte la yac' te jchahp yu'un Leví, yu'un ha ya yich'ic bahel te scaxahul te chapbil-c'op yu'un te Jehová, scuenta yu'un ayic ta stojol Jehová soc ya yac' sbahic ta a'batinel yu'un, soc yu'un ya yaq'uic bendición ta scuenta sbihil, hich te bin ut'il c'alal ora.

⁹Ha scuentahil te Leví mayuc q'uinal a'bot ta yohlil te yermanotac; ha sq'uinalic c'ohem te Jehová, hich te bin ut'il halbot yu'un Jehová te Dios awu'une.)

¹⁰Halajon ta wits cha'winic (40) c'ahc'al soc cha'winic (40) ahc'abal, hich te bin ut'il ta nahil to. Yan buelta la ya'iybon jc'op te Jehová, hich ma ba la sc'an te la slajinat.

¹¹Soc hich la yalbon te Jehová: Hahchan, nahilijan bahel yu'un te pueblo, scuenta yu'un ya x'ochic soc ya yu'untayic te q'uinal te jc'axel la jcalbe ta jamal te sme'static te ya ca'beyique, xchi.

¹²Ta ora ini, Israel, ¿bin ya sc'ambat te Jehová te Dios awu'un? ha te yac awich' ta muc' te Jehová te Dios awu'un, te ya xbehenat ta spisil be yu'un, te c'uxuc me yac awa'iy ta awo'tan, te yac awac' aba ta a'batinel yu'un Jehová te Dios awu'un ta spisil awo'tan soc ta spisil ach'uhlel;

¹³soc te yac ach'uhun te mandariletic yu'un Jehová soc te bintic chapal yu'un, te ha ya calbat sc'oblal ta ora ini scuenta yu'un lec ya xc'ohat a.

¹⁴Ilawil, yu'un Jehová te Dios awu'un te ch'ulchan soc te mero toyol ch'ulchan, te bahlumilal soc spisil te bintic ay tey a.

¹⁵Pero te Jehová ha nax lec yo'tan ta stojol te ame'atatic soc c'ux la ya'iy ta yo'tan, soc ta patil la stsa te sts'umbalic, ha te ha'exe, ta yohlil spisil te nacionetic, hich te bin ut'il ta ora ini.

¹⁶Pasahic circuncisión ta awo'tanic, ma me xawac' tonobuc xan awo'tanic.

¹⁷Como te Jehová, te Dios awu'unic, ha Dios yu'un diosetic, soc ha Ajwalil yu'un ajwaliletic, ha muc'ul Dios, ay yu'el soc ay ta xi'el, ma tsahbiluc nax te mach'a ay sc'oblal ta yo'tan, soc ma stsac smahtan scuenta chahpanwanej;

¹⁸ya spas bin stojil ta stojol te me'ba' alal soc te me'ba' ants; soc ha nix c'ux ta yo'tan te jyanlum, ya ya'be swe'el soc sc'u' spac'.

¹⁹Ha yu'un c'ux me xawa'iy ta awo'tanic te jyanlum, como jyanlum ayinex ta sq'uinal Egipto.

²⁰Ich'a ta muc' te Jehová te Dios awu'un, ha nax me xawac' aba ta a'batinel yu'un. Ha me xat'un bahel stuquel, soc ha ta scuenta sbihil te ay bin jc'axel yac awal ta jamal.

²¹Ha me te yac awalbe yutsil sc'oblal, soc ha me te Dios awu'un, te la spas ta atojol te bin muc' soc te bin xiweltic sba te awiloj ta asit.

²²Lajuneb schanwinic (70) ta tuhl cohic bahel ta Egipto te ame'atat, pero Jehová la yac' te ya xp'ohlucat hich te bin ut'il eq'uetic ta ch'ulchan.