Read Tzeltal Deuteronomio 11 Bible Online

Deuteronomio 11 - Tzeltal bible

Deuteronomio 11

¹C'ux me xawa'iy ta awo'tan te Jehová te Dios awu'un soc ya me ach'uhun spasel spisil ora te bintic yaloj, bintic chapal yu'un, bintic halbil ta mandar soc te mandariletic yu'une.

²Na'ahic me ta ora ini, (ma ba yacon ta c'op soc te awal-anich'nabic te ma ba sna'ojic soc ma ba yilojic te tojobtesel yu'un Jehová te Dios awu'unic), na'ahic me te smuc'ul yu'el, te yip sc'ab shachoj,

³te señahiletic soc te a'teliletic la spasticlan ta Egipto ta stojol faraón te ajwalil yu'un Egipto soc ta stojol spisil te sq'uinal;

⁴te bin la spasbe te soldadohetic yu'un Egipto, te cawuhetic soc carretahetic yu'unic; bin ut'il la yac' muhluc ta ha' ta Mar Rojo c'alal la snutsex bahel soc te jc'axel la slajinlan c'alal ora yo'tic;

⁵te bintic la spasbeyex ta jochol taquin q'uinal ha to c'alal hulex tal ta lugar ini;

⁶te bin la spasbe te Datán soc te Abiram snich'nab Eliab, te snich'an Rubén; bin ut'il la sjam sba te lum soc bic'otic cohel mach'atic ay yu'unic, te snahilpaq'uic soc spisil schansbahlamic, ta yohlil spisil Israel.

⁷Ha'ex awilojic spisil te smuc'ul ya'tel te la spas te Jehová.

⁸Ha yu'un canantayahic spisil te mandariletic te yacon ta yalel ta atojolic, scuenta yu'un hich yac awich' awipic soc hich ya x'ochex ta yu'untayel a te q'uinal te yac awich'ic,

⁹soc scuenta yu'un bayel c'ahc'al ya xcuxajex tey ta q'uinal te jc'axel yaloj ta jamal te Jehová ta stojol te ame'atatic te ya ya'be soc te sts'umbal, ha te q'uinal banti ya x'oquin leche soc chab.

¹⁰Te q'uinal yac awich'ic ma pajaluc soc te q'uinal yu'un Egipto ta banti loq'uex talel, te banti la ats'un ats'unubic soc la apucbeyic ya'lel ta awoquic, hich te bin ut'il ya sc'an pasel ta yawil sts'unubil itajetic.

¹¹Yan te q'uinal te ya x'och awu'untayic ay witsiltic soc spamlejetic te ya yuch' te ha'al yu'un te ch'ulchan.

¹²Ha q'uinal te ya xcanantayot yu'un Jehová te Dios awu'une. Spisil ora t'ojol sit Jehová te Dios awu'un ta stojol c'alal ta shahchel te ha'bil c'alal ta slajibal.

¹³Teme spisil awo'tanic yac ach'uhunic spasel te mandariletic yacon ta yalel ta atojolic ta ora ini, teme c'ux yac awa'iy ta awo'tanic te Jehová te Dios awu'unic soc te yac awac' abahic ta a'batinel yu'un ta spisil awo'tanic soc ta spisil ach'uhlelic,

¹⁴ya cac' taluc ha'al ta aq'uinalic ta yorahil, ha te nahil ya xtal soc te patil ya xtale, hich yac atsobe sit a te trigo soc cebada, vino, soc te aceite awu'une.

¹⁵Soc ya cac' coluc ha'maletic ta q'uinal te ya swe' te chambahlametic awu'unic, soc ya xwe' x'uch'at, ya xnoj ach'uht.

¹⁶Tsahtaya me abahic hiche te ma ba ya slo'loyex awo'tanic, te ya xloq'uex bahel ta sch'uhuntayel yantic diosetic soc yac aquejan abahic ta stojolic;

¹⁷te hich ya xtihl sc'ahc'al yo'tan Jehová ta atojolic, te ya smac te ch'ulchan te hich ma xtal ha'al a soc ma ba ya yac' sit te ts'unub awalil, te ora ya xlajex tey ta lequil q'uinal te ya ya'beyex te Jehová.

¹⁸Ha yu'un ya me awac' ta awo'tanic soc ta ach'uhlelic te c'opetic cu'un ini, soc ya me achuc ta ac'abic soc ta ati'bahic scuenta sna'ojibal awu'unic.

¹⁹Ya me awa'beyic snopic te awal-anich'nabic, halbeya ya'iyic c'alal ayat ta ana, c'alal ya xbehenat ta be, c'alal ya xbahat ta wayel soc te c'alal ya xhahchat.

²⁰Ya me ats'ihbay ta ste'el te ti'nahil soc ta sti'il ana,

²¹scuenta yu'un te jayeb c'ahc'al ay ta sba te bahlumilal te ch'ulchan, hich naht acuxlejalic soc scuxlejalic awal-anich'nab ta q'uinal te jc'axel la yalbe ta jamal Jehová te antiguo ame'atatic te ya ya'beyique.

²²Teme jun awo'tan yac ach'uhunic spisil te mandariletic ya ca'beyex yu'un yac apasic, teme c'ux yac awa'iy ta awo'tanic te Jehová te Dios awu'unic, teme ya xbehenex ta spisil te behetic yu'un soc teme yac at'unic bahele,

²³te Jehová ya stenticlan loq'uel ta atojolic spisil te nacionetic ini, soc yac awu'untaybeyic sq'uinal muc'ul nacionetic te c'ax hich yipic a te bin ut'il te ha'exe.

²⁴Spisil te lugar banti yac ateq'uic, ha awu'unic ya xc'oht; ta jochol taquin q'uinal c'alal ta Líbano, ta muc'ul-ha' Éufrates c'alal ta mar ay ta stojol banti ya xmahl c'ahc'al, ha aq'uinalic ya xc'oht.

²⁵Mayuc mach'a ya xhu' ya scomex. Te Jehová te Dios awu'unic ya me yac' te ya xi'ex ta spisil te q'uinal banti ya xbehenex, hich te bin ut'il la yalbeyex.

²⁶Yo'tic ya ca'beyex ta atojolic bendición soc chopol c'oblalil:

²⁷ha bendición teme yac ach'uhumbeyic spasel te mandariletic yu'un Jehová te Dios awu'unic te ya calbeyex ta ora ini;

²⁸ha chopol c'oblalil teme ma ba yac ach'uhumbeyic spasel te mandariletic yu'un Jehová te Dios awu'unic, soc teme yac awihquitayic hilel te bin ya calbeyex ta ora ini yu'un ha yac at'unic bahel yantic diosetic te ma xana'beyic sbahe.

²⁹Te c'alal la yaq'uex ochel a te Jehová te Dios awu'unic tey ta q'uinal te yac awich'ic, ya me awal te bendición ta wits Gerizim, soc te chopol c'oblalil ta wits Ebal,

³⁰ha te ayic ta jehch ha' Jordán, ta stojol banti ya xmahl c'ahc'al, ta sq'uinal te cananeohetic te ya xnahinic ta Arabá te snuhp'usitayej sba soc Gilgal, te nopol ay soc te jihte'etic yu'un More.

³¹Como ya xc'axex bahel ta Jordán yu'un yac awu'untayic te q'uinal te ya ya'beyex te Jehová te Dios awu'unique; ya me awich'ic soc ya xnahinex tey a.

³²Tsahtaya me abahic hiche te yac awaq'uic c'ohtuc ta pasel spisil te bintic chapal soc te bintic halbil ta mandar te yac ca'bebelex ta ora ini.