Read Tzeltal Deuteronomio 12 Bible Online

Deuteronomio 12 - Tzeltal bible

Deuteronomio 12

¹Hich ay te bintic chapal soc te bintic halbil ta mandar te ya sc'an yac ach'uhunic spasel tey ta q'uinal te Jehová te Dios yu'un ame'atatic la ya'beyex awu'untayic te jayeb c'ahc'al cuxulex ta q'uinal.

²Te nacionetic te ya xc'oht awu'untaybeyic te sq'uinalic, jc'axel me xalajimbeyic spisil te lugartic banti la sch'uhuntayic te diosetic yu'unic, ta toyol witsiltic, ta tsehltsehltic soc ta ye'tal spisil te'etic te bayel ya'binal.

³Ya me ajimbeyic te scajtajib ta chiq'uel mahtaniletic yu'unic, ya me awuyticlambeyic te tehc'ambil tonetic yu'unic, ya me achiq'uic ta c'ahc' te sloc'omba Asera yu'unic, ya me awuyticlambeyic te sloc'ombahil te diosetic yu'unic, jc'axel me xatup'beyic sbihilic tey ta lugar.

⁴Ma me hichuc xach'uhuntayic te Jehová te Dios awu'unic te bin ut'il ya sch'uhuntayic te diosetic yu'unique.

⁵Ya me xbahex ta lugar te ya stsa ta awohlilic te Jehová te Dios awu'unic te banti ya xnahin te sbihile; tey me ya xbahex a.

⁶Tey yac awaq'uic a te scohtol chic'bil mahtaniletic, milbil mahtaniletic, te jun ta slajunebal, te tuchilambil mahtaniletic, te mahtaniletic yu'un te bin jc'axel awalojic ta jamal, te mahtaniletic yac awaq'uic scuenta sc'anojel awo'tanic, soc te sba-al te wacaxetic, tuminchijetic soc tentsunetic awu'unique.

⁷Tey ya xwe'ex a ta stojol te Jehová te Dios awu'unic, soc buen tse'eluc me awo'tanic, ha'ex soc te mach'atic ay awu'unic, yu'un spisil awa'tel la apasic te banti la ya'beyex bendición te Jehová te Dios awu'unique.

⁸Ma me xapasic te bin yacotic ta spasel ta ora ini, te tuhlultuhl ya spas te bin ya sc'an yo'tan stuquel,

⁹como ma to ba c'ohemex te banti yac acux awo'tanic soc te bin ya ya'beyex awu'untayic te Jehová te Dios awu'unique.

¹⁰Pero ya xc'axex bahel ta muc'ul-ha' Jordán soc ya xnahinex tey ta q'uinal ya ya'beyex ta acuentahic te Jehová te Dios awu'unique. Ha ya ya'beyex acux awo'tanic yu'un spisil acontrahic ta ajoyobal, hich mayuc xiwel ya xnahinex tey a.

¹¹Te lugar te ya stsa Jehová te Dios awu'unic bantic ya yac' te sbihile, tey me yac awaq'uic a spisil te bin ya calbeyex: ha te scohtol chic'bil mahtaniletic, milbil mahtaniletic, te jun ta slajunebal, te tuchilambil mahtaniletic awu'unic, soc spisil te bintic tsahbil te jc'axel awalojic ta jamal yac awa'beyic te Jehová.

¹²Buen tse'eluc me awo'tanic ta stojol te Jehová te Dios awu'unic, ha'at soc awal-anich'nab, te a'batetic soc criadahetic awu'unic, soc te levita te ya xnahin ta pueblohetic awu'unic, como ma ba pajal a'bot sq'uinalic soc te ha'exe.

¹³Tsahtaya me aba te ma ba yac awac' te scohtol chic'bil mahtaniletic awu'un ta bayuc nax te yac awile;

¹⁴ha nax me ta lugar te ya stsa te Jehová ta banti te jchahp ats'umbal, tey yac awac' a te scohtol chic'bil mahtaniletic awu'un soc tey yac apas a spisil te bintic ya jpasat ta mandar.

¹⁵Pero ya xhu' yac amil soc yac ati' ti'bal ta spisil te pueblohetic awu'un ta biluc ora te yac ac'ane, ha chican te bendición la ya'bat te Jehová te Dios awu'un. Te mach'a bohloben sc'oblal soc te mach'a lec sc'oblal ya xhu' ya swe', hich ya xc'oht te bin ut'il gacela-chij o muc'ul chij;

¹⁶ha nax ma me xawe'ic te ch'ich'e, ya me amal ta lum hich te bin ut'il ha'.

¹⁷Ma me xawe' ta pueblohetic awu'un te jun ta slajunebal te trigo, vino, aceite, te sba-al wacaxetic, tuminchijetic o tentsunetic, te mahtaniletic jc'axel awaloj ta jamal yac awac', te mahtaniletic yac awac' ta sc'anojel awo'tan, o te tuchilambil mahtaniletic awu'un te yac awac',

¹⁸ha nax yac awe' ta stojol Jehová te Dios awu'un, ta lugar te ya stsa stuquel, ha'at soc awal-anich'nab, te awa'bat, acriada soc te levita te ya xnahin ta pueblohetic awu'un. Tse'eluc me awo'tan ta stojol Jehová te Dios awu'un yu'un spisil awa'tel.

¹⁹Tsahtaya me aba te ma ba yac apihtes te levita te jayeb c'ahc'al ya xnahinat ta q'uinal.

²⁰Te c'alal ya smuc'ubtesbat aq'uinal te Jehová te Dios awu'un, hich te bin ut'il la yalbat, soc teme yac awal: Ya jti' ti'bal, teme xchihate, yu'un yac amulan sti'el, ya xhu' yac awe' te ban c'alal yac amulan.

²¹Teme namal ay te lugar te tsahbil yu'un Jehová te Dios awu'un banti ya xc'oht te sbihile, ya xhu' yac amil te wacaxetic, tuminchijetic soc tentsunetic awu'un te ya ya'bat te Jehová, hich te bin ut'il la jpasat ta mandar, ya xhu' yac awe' ta pueblohetic awu'un jayeb ya sc'an awo'tan.

²²Hich te bin ut'il ya yich' ti'el te gacela-chij soc te muc'ul chij, hich ya xhu' yac awe'; te mach'a bohloben sc'oblal soc te mach'a lec sc'oblal ya xhu' ya swe'.

²³Ha nax hichuc stalel awo'tan te ma ba yac awe' ch'ich', como ha cuxlejal te ch'ich', ma me pajaluc yac awe' soc scuxlejal te sti'balule.

²⁴Ma me xawe'; ya me amal ta lum hich te bin ut'il ha'.

²⁵Ma me xawe', scuenta yu'un lec ya xc'ohat soc lec ya xc'oht te patil awal-anich'nab, te c'alal yac apas te bin stojil ta pasel ta stojol Jehová.

²⁶Yan te bintic ch'uhltesbilic awu'un soc te bintic jc'axel awaloj ta jamal yac awac', ya me awich' talel ta lugar ta banti tsahbil yu'un Jehová;

²⁷tey yac awac' a te scohtol chic'bil mahtaniletic, te sti'balul soc te sch'ich'el, ta scajtajib ta chiq'uel mahtanil yu'un Jehová te Dios awu'un; te sch'ich'el te milbil mahtaniletic awu'un ya me yich' malel ta scajtajib ta chiq'uel mahtanil yu'un Jehová te Dios awu'un, ya xhu' yac awe'be te sti'balule.

²⁸Canantaya soc ch'uhuna spasel spisil te c'opetic ini te ya jpasat ta mandar, scuenta yu'un spisil ora lec ya xc'ohat soc lec ya xc'oht a te patil al-nich'anetic awu'un, te bin ut'il yac apas te bin lec soc te bin stojil ta pasel ta stojol Jehová te Dios awu'une.

²⁹Te c'alal lajimbilix yu'un Jehová te Dios awu'un te nacionetic te yac awu'untaybe sq'uinalic, teme ayix ta acuenta soc tey ayatix ta nahinel ta sq'uinalic a,

³⁰tsahtaya me aba te ma ba yac ac'ohchin aba yu'un st'unel bahel te bin ya spasic, te c'alal lajimbilix ta atojol a; ma me xajoc'obe sc'oblal te diosetic yu'unic, te hich yac awal: Te nacionetic ¿bin ut'il la sch'uhuntayic te diosetic yu'unic, yu'un hich nix ya jch'uhuntay? te xchihate.

³¹Ma me hichuc xapasbe te Jehová te Dios awu'un, como spisil te bintic ilobtic sba te ya yihlay te Jehová, la spasbeyic te diosetic yu'unique; ha la schiq'uic ta c'ahc' ta stojol te diosetic yu'unic te queremetic soc te ach'ixetic yu'unique.

³²Tsahtaya me ta spasel spisil bintic ya jpasat ta mandar; ma me xawa'be xan smohlol soc ma me ayuc bin yac aloq'uesbe.