Read Tzeltal Deuteronomio 13 Bible Online

Deuteronomio 13 - Tzeltal bible

Deuteronomio 13

¹Teme ay ya xchicnaj ta awohlil jtuhl jalwanej o hal-wayichil, te ya ya'bat awil jchahp señahil o te bin mayuc ilbil,

²teme c'oht ta pasel te jchahp señahil o te bin mayuc ilbil, teme hich ya yalbat: Con jt'untic yantic diosetic te ma xana'be sba, ya jch'uhuntaytic, teme xchihe,

³ma me xawa'iybe sc'op te jalwanej o te hal-wayichil, como te Jehová te Dios awu'unic yac stsajbelex yil teme c'ux yac awa'iy ta awo'tanic te Jehová te Dios awu'unic ta spisil awo'tanic soc ta spisil ach'uhlelic.

⁴Ya me at'unic te Jehová te Dios awu'unic soc ya me awich'ic ta muc', ya me ach'uhunic te mandariletic yu'un soc ya me awa'iybeyic te sc'ope; ya me awac' abahic ta a'batinel yu'un soc jun me awo'tanic ta stojol.

⁵Te jalwanej o hal-wayichil ya me yich' milel ta scaj te la ya'bat anop toybahil ta stojol Jehová te Dios awu'unic te la sloq'uesat tal ta sq'uinal Egipto soc te la scoltayat loq'uel tal ta mosohil, ya c'an ya'bat awihquitay hilel te be yalbeyejat at'un te Jehová te Dios awu'une. Hich me yac aloq'ues a te bin chopol ta awohlil.

⁶Teme abanquil o awihts'in, aquerem-nich'an, awantsil-nich'an, awihnam o awamigo te mero jun awo'tan aba soc, teme hich ya sjucat ta muquen: Conic, ya jch'uhuntic yantic diosetic te ma xana'be sba ni ha'uc te ame'atatic la sna'beyic sba,

⁷ha te diosetic yu'un te ants-winiquetic te ayic ta ajoyobal, teme nopol o namal te banti ayat, ta jun sti'il te q'uinal c'alal ta yan sti'il, teme xchihe,

⁸ma me xawac' aba soc, ma me xawa'iybe sc'op, ma me xana'be yo'bolil sba, ma me xac'uxultay o ma me xanac',

⁹ya me amil. Ha'at nahil yac ahach ac'ab ta smilel, patil ya shach sc'ab spisil te pueblohe.

¹⁰Ya me ach'oj ta ton ha to teme laj, yu'un ya c'an ya'bat awihquitay te Jehová te Dios awu'un te la sloq'uesat tal ta sq'uinal Egipto ta mosohil,

¹¹scuenta yu'un spisil Israel ya ya'iyic soc ya xiwic, scuenta yu'un ma ba hich ya xc'oht ta pasel yan buelta ta awohlilic.

¹²Teme ay yac awa'iy te ya yich' halbeyel sc'oblal junuc pueblo awu'un te a'botat yu'un te Jehová te Dios awu'un yu'un ya xnahinat tey a,

¹³te ay chicnaj bohl winiquetic ta awohlilic te la ya'beyic howiyuc yo'tanic te mach'atic nahinemic ta pueblo, te hich ya yalic: Conic, ya jch'uhuntaytic yantic diosetic te ma xana'beyic sba, teme xchihique,

¹⁴ya me atsahtay awil ta lec, ya me awil soc ya me ajoc'oy ta lec. Teme ya xchicnaj te melel, te hich la yich' pasel ta awohlil te bin mero ihlaybil,

¹⁵ya me amil ta espada te mach'atic nahinemic ta pueblo ini, jc'axel me xalajin spisil te bintic ay tey a, soc ya me amil ta espada te chambahlametic yu'unique.

¹⁶Yac atsobe spisil te sbiluc ta mero yohlil te pueblo, ya achic' te pueblo soc spisil sbiluc scuenta scohtol chic'bil mahtanil yu'un te Jehová te Dios awu'une. Stalel but'bil tsehl ya xhil ta jinel, ma me ayuc bin ora ya yich' xan pasel.

¹⁷Ma me xatsac te bin ac'bil ta scuenta lajel, scuenta yu'un te Jehová ya sloq'ues ta atojol te sc'ahc'al yilimba, ya sc'uxultayat soc ya sna'bat yo'bolil aba, ya yac' p'ohlucat, hich te bin ut'il jc'axel yalbeyej ta jamal te ame'atatic,

¹⁸te c'alal yac ach'uhumbe sc'op te Jehová te Dios awu'un, te yac ach'uhun spasel spisil te mandariletic yu'un te ya jpasat ta mandar ta ora ini, yu'un yac apas te bin stojil ta pasel ta stojol Jehová te Dios awu'une.