Read Tzeltal Deuteronomio 14 Bible Online

Deuteronomio 14 - Tzeltal bible

Deuteronomio 14

¹Te ha'ex yal-snich'nabex Jehová te Dios awu'unic, ma me xawehchentes abaq'uetalic, soc ma me xajoch stsotsel ajolic ta ati'bahic ta scaj te ay mach'a cham.

²Como te ha'ate ch'ul pueblohat yu'un te Jehová te Dios awu'un, soc te Jehová la stsahat loq'uel ta yohlil spisil te pueblohetic ta q'uinal scuenta yu'un ha'at nax atuquel pueblohat yu'un ya xc'ohat.

³Ma me xawe' te bin ilobtic sba.

⁴Hich ay te chambahlametic te ya xhu' yac awe'ic: ha te j'a'tel-wacax, tuminchij, tentsun,

⁵chij, gacela-chij, corzo-chij, ha'mal tentsun, íbice, antílope-chij, soc ha'mal tuminchij.

⁶Soc ya xhu' yac awe'ic spisil chambahlametic te xalal slots'ic soc te ya scha'jach' xan swe'elic.

⁷Yan te chambahlametic te ha nax ya scha'jach' xan swe'elic, o teme ha nax xalal slots'ic, ma xhu' yac awe'ic, hich te bin ut'il te camello, liebre[7] soc cohtom,[8] como ya scha'jach' xan swe'elic pero ma ba xalal slots'ic, ma me lecuc sc'oblal awu'unic;

⁸soc te chitam, aunque xalal slots' pero ma ba ya scha'jach' xan swe'el; ma me lecuc sc'oblal awu'unic. Ma me xawe'beyic sti'balul, soc ma me xapicbeyic sbaq'uetal te chamen chambahlam.

⁹Ta spisil te bin ayic ta ha' ya xhu' yac awe'ic te ay stut xic' soc suhlil.

¹⁰Pero spisil te mayuc stut xic' soc te mayuc suhlil ma me xawe'ic stuquel; ma me lecuc sc'oblal awu'unic.

¹¹Ya xhu' yac awe'ic spisil mutetic te lec sc'oblalic.

¹²Pero ma xhu' yac awe'ic ini: te jxic, quebrantahueso-jxic, xicul-ha',

¹³muc'ul ihc'al-hos, soc spisil ta chahp milano-mutetic,

¹⁴spisil ta chahp jojetic,

¹⁵avestruz-mut, muc'ul xcuj, saquil-pechul-ha', soc spisil ta chahp jxiquetic,

¹⁶tut xcuj, nahtil-ni'-mut, c'anal-oc-pech,

¹⁷muc'ul mutil-ha', aja'us-hos, sjojmutil-ha',

¹⁸nahtil-oc-mut, spisil ta chahp garza-mutetic, t'ohts-jol-mut, soc sots'.

¹⁹Spisil te bic'tal chambahlametic ya xwihlic[9], ma me lecuc sc'oblal awu'unic, ma xhu' ta we'el.

²⁰Pero spisil mutetic te lec sc'oblalic ya xhu' yac awe'ic.

²¹Ma me xawe'ic te bin ya xcham ta stuquel nax; ya xhu' yac awa'be te jyanlum te nahinem ta pueblohetic awu'unic, ya xhu' ya swe' stuquel; o ya xhu' yac achombe te jyanlum sohlel yacalic; como ha'at ch'ul pueblohat yu'un te Jehová te Dios awu'une. Ma me xapay ta ya'lel schu' sme' te tut tentsune.

²²Ya me awac' jun ta slajunebal spisil bintic ya sitin ta aq'uinal jujun ha'bil.

²³Yac awe' ta stojol Jehová te Dios awu'un ta lugar te ya stsa banti ya yac' ayinuc te sbihile, ha te jun ta slajunebal te trigo, cebada, vino soc te aceite awu'un, soc te sba-al te wacaxetic, tuminchijetic soc tentsunetic awu'un, scuenta yu'un yac anop yich'el ta muc' spisil ora a te Jehová te Dios awu'unique.

²⁴Teme namal ayex ta lugar te tsahbil yu'un Jehová te Dios awu'un te banti ya yac' ayinuc te sbihile, teme ya ya'bat bendición te Jehová, te hich ma xhu' yac awich' bahel yu'un naht te behele,

²⁵yac achon soc yac awich' tal te taq'uin ta lugar te ya stsa te Jehová te Dios awu'une.

²⁶Tey yac aman a te bintic yac amulan: chican teme wacaxetic, tuminchijetic, vino, bin pajuben, o ha chicanat bin yac amulan. Tey yac awe' a ta stojol te Jehová te Dios awu'un, tse'eluc me awo'tan soc te mach'atic ay awu'une.

²⁷Ma me xch'ay ta awo'tan te levita te nahinem ta pueblohetic awu'un, como mayuc yich'oj sq'uinal hich te bin ut'il ha'ate.

²⁸Ta slajel te oxoxeb ha'bil ya me aloq'ues spisil te jun ta slajunebal te bin ya xloc' awu'un ta ha'bil, ya me aq'uej ta pueblohetic awu'un.

²⁹Tey ya xtal a te levita, te mayuc yich'oj sq'uinal hich te bin ut'il ha'at, soc tey ya xtal a te jyanlum, te me'ba', soc te me'ba' ants te ayic ta pueblohetic awu'un, ya xwe' x'uch'ic, ya xnoj sch'uhtic yu'un; scuenta yu'un te Jehová te Dios awu'un ya ya'bat bendición ta stojol spisil awa'tel.