Read Tzeltal Deuteronomio 15 Bible Online

Deuteronomio 15 - Tzeltal bible

Deuteronomio 15

¹Ta huc-huqueb ha'bil ya me ach'ay betiletic.

²Hich ay ta ch'ayel betiletic: ya me sch'ay ta yo'tan te bin sbetanej te spat-xuhc; ma me sc'ambeyix sbet te spat-xuhc o te yermano, como la yich'ix halel te ha yorahil yu'un Jehová te sch'ayel betiletic.

³Te jyanlum ya xhu' yac ac'ambe stojol stuquel te bin awa'beyej; pero te awermano yac ach'aybe ta awo'tan stuquel te bin awa'beyej sbetan,

⁴scuenta yu'un hich mayuc pobrehetic ta awohlilic a; como te Jehová te Dios awu'un ya me ya'bat bayel bendición tey ta q'uinal te ya x'a'botat awich',

⁵teme jun awo'tan yac awa'iybe sc'op te Jehová te Dios awu'un, teme yac ach'uhun spasel spisil te mandariletic te ya jpasat ta mandar ta ora ini.

⁶Te bin ut'il ya ya'bat bendición te Jehová te Dios awu'un, hich te bin ut'il la yalbat, ay bin yac awa'be sbetan tsobol yantic nacionetic, pero te ha'at mayuc bin yac abetambe sbiluquic stuquel; yac acuentahin bayel nacionetic, pero ma ba ya scuentahinat stuquel.

⁷Teme ay pobre ta yohlil te awermanotac ta jpahm pueblo awu'un ta q'uinal te ya ya'bat te Jehová te Dios awu'un, ma me xtulanij awo'tan soc ma me xanop' ta tulan ac'ab ta stojol te awermano te pobre ay,

⁸ya me ajam ac'ab ta stojol, ya me awa'be smajan te bin ya xtuhun yu'une.

⁹Tsahtaya aba te ma ba ya xtal ta awo'tan te bin chopol, te hich yac awal: Nopolix te shuquebal ha'bil, ha te ya yich' ch'ayel betiletic, teme xchihat, te yan yilel asit ta stojol awermano te pobre ay, te hich mayuc bin yac awa'be. Ya xhu' ya x'awon ta stojol Jehová ta acontra, hich yac ata amul a.

¹⁰Ya me awa'be, ma socuc at'ut'il yac awa'be, como ha nix ta scuenta te ya ya'bat bendición te Jehová te Dios awu'un ta spisil awa'tel soc spisil te bintic yac apas.

¹¹Como spisil ora ay pobrehetic ta q'uinal, ha scuentahil te ya jpasat ta mandar te jamaluc me ac'ab ta stojol awermano, ta stojol te pobre soc te mach'a mayuc bin ay yu'un ta q'uinal.

¹²Teme ay ya schon sba ta a'batinel ta atojol te amohlol ta hebreohil, winic o ants, teme ya x'a'tej ta atojol waqueb ha'bil, ta shuquebal ha'bil ya me awac' ta libre.

¹³Te bin ora yac awac' ta libre, ma me jocholuc sc'ab a yac aticon bahel.

¹⁴Jamaluc me awo'tan xaloq'uesbe bahel ta banti te tuminchijetic soc tentsunetic awu'un, ta sq'uiyojibal atrigo soc ta sp'e'ojibal ats'usub; ya me aloq'uesbe ta banti la ya'bat bendición te Jehová te Dios awu'une.

¹⁵Ya me ana' te ayat ta mosohinel ta sq'uinal Egipto soc te la scoltayat loq'uel tal te Jehová te Dios awu'un; ha scuentahil te hich ya jpasat ta mandar ta ora ini.

¹⁶Yan teme hich ya yalbat: Ma ba ya xloc'on bahel ta atojol, teme xchihe, como c'ux ya ya'iyat ta yo'tan soc te mach'atic ay awu'un, soc lec c'oht awu'un ya yil;

¹⁷ha yu'un yac atsac shotojbil, yac ahotbe schiquin a ta ti'nahil, hich awa'bat ya xhil spisil ora. Ha nix hich xapasbe te acriada.

¹⁸Ma me wocoluc yac awa'iy te yac awac' ta libre, como j'ohlil stojol jtuhl j'a'tel te waqueb ha'bil te la yac' sba ta a'batinel awu'un. Hich te Jehová te Dios awu'un ya me ya'bat bendición ta spisil bintic yac apas.

¹⁹Parte me xawac' ta stojol Jehová te Dios awu'un teme squelmal te sba-al wacaxetic, tuminchijetic soc tentsunetic awu'une. Ma me xawac' x'a'tejuc te squelmal sba-al j'a'tel-wacax awu'un soc ma me xaloq'uesbe stsotsel te squelmal sba-al tuminchijetic o tentsunetic awu'un.

²⁰Ta stojol Jehová te Dios awu'un ya me awe' soc spisil mach'atic ay awu'un ta jujun ha'bil, ta lugar te banti ya stsa te Jehová.

²¹Teme ay banti jihnem yu'un, teme coxo', ts'o'sit, o biluc a te jihnem yu'une, ma me xawa'be stuquel ta milbil smahtan Jehová te Dios awu'une.

²²Ya me awe' ta banti pueblohetic awu'un; te mach'a bohloben sc'oblal soc te mach'a lec sc'oblal, pajal ya xhu' ya swe'ic, hich te bin ut'il gacela-chij o muc'ul chij;

²³ha nax ma me xawe'be sch'ich'el, ya me amal ta lum hich te bin ut'il ha'.